ބަންޑުން ޖަހާލި ބޯޓުގެ ބައިތައް އޮޔާދަނީ، ރޭގަނޑު ދަތުރުކުރާއިރު ސަމާލުވުމަށް އިލްތިމާސްކޮށްފި

މާލެ ކައިރިން ބަންޑުން ޖަހާލި މުދާ އުފުލާ ބޯޓުގެ ބައިތައް އޮޔާދާތީ، އެ ސަރަހައްދުން ދަތުރުކުރާ އުޅަނދުފަހަރު ސަމާލުވުމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން މިއަދު އިލްތިމާސްކޮށްފިއެވެ.

ހަތަރު މީހުންނާއެކު ދަތުރު ކުރަމުން ދަނިކޮށް ބަންޑުން ޖަހާލާފައިވަނީ "ބަލްމާ-6" ނަމަކަށް ކިޔާ މުދާ އުފުލާ ބޯޓެކެވެ. މި ހާދިސާ ހިނގާފައިވަނީ މިއަދު ހެނދުނު 07:27 އެހާކަންހާއިރު ކަމަށް އެމްއެންޑީއެފްއިން މައުލޫމާތު ދެއެވެ.

މި ބޯޓުން ދަތުރުކުރި ހަތަރު މީހުންގެ ތެރެއިން ދެ މީހަކު ވަނީ ސަލާމަތް ކުރެވިފައެވެ. ނަމަވެސް ގެއްލުނު އަނެއް ދެ މީހުން ހޯދުމުގެ މަސައްކަތް ފުލުހުންނާއި އެމްއެންޑީއެފް ގުޅިގެން ކުރަމުންދަނިކޮށް، އޭގެ ތެރެއިން އެކެއްގެ ހަށިގަނޑު މިހާރު ވަނީ ފެނިފައެވެ.

އެމްއެންޑީއެފްއިން ވިދާޅުވީ ގެއްލިގެން ހޯދަމުންދިޔަ މީހާގެ ހަށިގަނޑު ފެނިފައިވަނީ ތާޖް އެގްޒޯޓިކާ ރިޒޯޓު ކައިރިން ކަމަށެވެ. އަދި އެ ހަށިގަނޑު މިހާރު ވަނީ ފުލުހުންނާ ހަވާލުކޮށްފައެވެ. އަދިވެސް އިތުރު އެކަކު ހޯދުމުގެ މަސައްކަތް ދަނީ ކުރަމުންނެވެ.

މިއަދު ހެނދުނު ކާފު އަތޮޅު އެނބޫދޫފިނޮޅު ކައިރިން "ބަލަމާ 6" ދޯނި ބަންޑުން ޖަހާލައި ހިނގި ހިތާމަވެރި ހާދިސާގައި، އެ ދޯނީގެ ކެޕްޓަން ނިޔާވެފައިވާއިރު، ގެއްލިފައިވާ ބިދޭސީ މީހާ ހޯދުމުގެ މަސައްކަތް ފުލުހުން ދަނީ ކުރަމުންނެވެ.

މި ދޯނި ބަންޑުން ޖަހާލުމާ ގުޅިގެން ދޯނީގައި ހުރި…

— Maldives Police (@PoliceMv) January 18, 2026

ތާޖް އެގްޒޯޓިކާ ރިޒޯޓު ކައިިރިއަށް ބަންޑުންޖަހާލި މި ބޯޓާއި ބޯޓުގައި ހުރި ބައެއް މުދާތައް އޮޔާ ދާތީ، އެމްއެންޑީއެފްއިން ވަނީ "މި ސަރަހައްދުން ރޭގަނޑު ދަތުރުކުރާ ދަތުރުވެރިން ހާއްސަ ސަމާލުކަމެއް ދިނުމަށް" އިލްތިމާސްކޮށްފައެވެ. މިއީ ކަނޑުދަތުރުފަތުރު ކުރާ ފަރާތްތަކުގެ ސަލާމަތާއި ރައްކާތެރިކަމަށްޓަކައި ކުރި އިލްތިމާސެކެވެ.