މިިދިޔަ އަހަރު ރާއްޖޭގެ ޤައުމީ އުފެއްދުންތެރިކަމުގެ މިންގަނޑު 105 ބިލިޔަން ރުފިޔާއަށް އަރާފައިވާ ކަމަށް ތަފާސްހިސާބުތަކުން ދައްކައިފި

މިދިޔަ އަހަރު ރާއްޖޭގެ ޤައުމީ އުފެއްދުންތެރިކަމުގެ މިންގަނޑު ނުވަތަ ގްރޮސް ޑޮމެސްޓިކް ޕްރޮޑަކްޓް (ޖީޑީޕީ) 105 ބިލިޔަން ރުފިޔާއަށް އަރާފައިވާ ކަމަށް މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ތަފާސްހިސާބުތަކުން ދައްކައިފިއެވެ.

މިއީ އޭގެ ކުރީ އަހަރާ އަޅާބަލާއިރު 5.4 އިންސައްތައިގެ ކުރިއެރުމެކެވެ.

އެމްއެމްއޭއިން އާންމުކޮށްފައިވާ އެންމެ ފަހުގެ ތަފާސްހިސާބުތައް ދައްކާގޮތުން، މިދިޔަ އަހަރު ނިމުނުއިރު ރާއްޖޭގެ ޤައުމީ އުފެއްދުންތެރިކަން ހުރީ 105.8 ބިލިޔަން ރުފިޔާގައެވެ. 2024 ވަނަ އަހަރު މި އަދަދު 100.4 ބިލިޔަން ރުފިޔާގައި ހުރިއިރު، މިއީ އިޤްތިޞާދީ ގޮތުން ހޯދުނު ބޮޑު ކުރިއެރުމެއްގެ ގޮތުގައި ފާހަގަކުރެވެއެވެ. ޤައުމީ އުފެއްދުންތެރިކަމުގެ މިންގަނޑަކީ ޤައުމެއްގެ ބޯޑަރުގެ އެތެރޭގައި އުފައްދާ ހުރިހާ މުދަލާއި ޚިދުމަތްތަކުގެ އަގަށް ބަލައިގެން ކަނޑައަޅާ މިންގަނޑެކެވެ.

ޤައުމީ އުފެއްދުންތެރިކަމަށް އައި މި ކުރިއެރުމުގެ އެންމެ ބޮޑު ހިއްސާއެއް ކުރަނީ ފަތުރުވެރިކަމުގެ ސިނާޢަތުންނެވެ. އެގޮތުން މިދިޔަ އަހަރު ފަތުރުވެރިކަމުގެ ދާއިރާއިން ޖީޑީޕީއަށް 23.8 ބިލިޔަން ރުފިޔާ ހިއްސާކޮށްފައިވާއިރު، މިއީ 5.7 އިންސައްތައިގެ ކުރިއެރުމެކެވެ. މި ކުރިއެރުން ލިބިފައިވަނީ މިދިޔަ އަހަރު ރާއްޖެއަށް 2.2 މިލިއަނަށްވުރެ ގިނަ ފަތުރުވެރިން ޒިޔާރަތްކުރުމާ ގުޅިގެން ކަމަށް އެމްއެމްއޭއިން ވިދާޅުވެއެވެ.

ފަތުރުވެރިކަމުގެ އިތުރުން އެހެނިހެން ދާއިރާތަކުންވެސް ވަނީ ފާހަގަކޮށްލެވޭ ކުރިއެރުންތަކެއް ހޯދާފައެވެ. އެގޮތުން ވިޔަފާރީގެ ދާއިރާއިން 7.0 އިންސައްތަ، ދަތުރުފަތުރާއި މުވާސަލާތީ ދާއިރާއިން 6.8 އިންސައްތަ، އަދި އިމާރާތްކުރުމުގެ ދާއިރާއިން 4.7 އިންސައްތަ ކުރިއަރާފައިވެއެވެ. މަސްވެރިކަމުގެ ސިނާއަތުން ޖީޑީޕީއަށް 3.4 ބިލިޔަން ރުފިޔާ ހިއްސާކޮށްފައިވާއިރު، އެ ދާއިރާއިންވެސް ވަނީ 3.0 އިންސައްތައިގެ ކުރިއެރުމެއް ހޯދާފައެވެ.

މަރުކަޒީ ބޭންކުން ލަފާކުރާ ގޮތުގައި 2025 ވަނަ އަހަރު ރާއްޖޭގެ އިޤްތިޞާދު 4.5 އާއި 5.6 އިންސައްތައާ ދެމެދުގެ މިންވަރަކަށް ކުރިއަރާނެއެވެ. އަދި 2026 ވަނަ އަހަރު ޖީޑީޕީ 4.8 އާއި 5.3 އިންސައްތައާ ދެމެދުގެ މިންވަރަކަށް ކުރިއަރާނެ ކަމަށް ވަނީ ލަފާކޮށްފައެވެ. މި ކުރިއެރުން ބިނާވެފައިވަނީ ފަތުރުވެރިކަމާއި، ދަތުރުފަތުރާއި، މުވާސަލާތީ ޚިދުމަތްތަކުގެ އިތުރުން ހޯލްސޭލް އަދި ރީޓެއިލް ވިޔަފާރީގެ ދާއިރާއަށް އަންނާނެ ކުރިއެރުންތަކުގެ މައްޗަށެވެ.

މީގެ އިތުރުން، ވެލާނާ އިންޓަނޭޝަނަލް އެއަރޕޯޓް ފުރިހަމައަށް އޮޕަރޭޝަނަށް ގެނައުމާއެކު، 2026 ވަނަ އަހަރު ނިމޭއިރު ރާއްޖެއަށް ޒިޔާރަތްކުރާ ފަތުރުވެރިންގެ އަދަދު 2.4 މިލިޔަނަށް އަރާނެ ކަމަށް އެމްއެމްއޭއިން ލަފާކުރެއެވެ. މިއީ އަހަރަކަށްވުރެ އަހަރެއް 8.8 އިންސައްތައިގެ ކުރިއެރުމެކެވެ.