މިއަހަރު ނިމޭއިރު ރާއްޖޭގެ އުފެއްދުންތެރިކަން 111.4 ބިލިޔަން ރުފިޔާއަށް އަރާނެކަމަށް އެމްއެމްއޭއިން ލަފާކޮށްފި

 މިއަހަރު ނިމޭއިރު ރާއްޖޭގެ ޤައުމީ އުފެއްދުންތެރިކަމުގެ މިންގަނޑު (ޖީޑީޕީ) 111.4 ބިލިޔަން ރުފިޔާއަށް އަރާނެކަމަށް މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ލަފާކޮށްފިއެވެ. މިއީ ރާއްޖޭގެ މާލީ ހާލަތު ރަނގަޅު ކުރުމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރާއި މަރުކަޒީ ބޭންކުން ގުޅިގެން އަޅަމުންދާ ހަރުދަނާ ފިޔަވަޅުތަކުގެ ނަތީޖާއެއް ކަމަށް އެބޭންކުން ފާހަގަކުރެއެވެ.

އެމްއެމްއޭއިން އާންމުކޮށްފައިވާ އެންމެ ފަހުގެ ތަފާސްހިސާބުތަކަށް ބަލާއިރު، މިދިޔަ އަހަރު ނިމުނުއިރު ރާއްޖޭގެ ޤައުމީ އުފެއްދުންތެރިކަން ހުރީ 105.8 ބިލިޔަން ރުފިޔާގައެވެ. އަދި 2024 ވަނަ އަހަރު މި އަދަދު 100.4 ބިލިޔަން ރުފިޔާގައި ހުރިއިރު، މިއީ ގާތްގަނޑަކަށް 5.4 އިންސައްތައިގެ ކުރިއެރުމެކެވެ.

މަރުކަޒީ ބޭންކުގެ އަންދާޒާތަކުން ދައްކާގޮތުގައި، މި ހިނގާ 2026 ވަނަ އަހަރު ރާއްޖޭގެ އިޤްތިޞާދު 4.8 އާއި 5.3 އިންސައްތައާ ދެމެދުގެ މިންވަރަކަށް ކުރިއަރާނެއެވެ. މިއާއެކު ރިއަލް ޖީޑީޕީ 111.4 ބިލިޔަން ރުފިޔާއަށް އުފުލިގެންދާނެ ކަމަށް ވަނީ ލަފާކޮށްފައެވެ. މީގެ އިތުރުން، ބާޒާރުގައި ތަކެތީގެ އަގަށް އަންނަ ބަދަލުތަކަށް ރިއާޔަތްކޮށް ހިސާބުކުރާ ނޮމިނަލް ޖީޑީޕީވެސް މިއަހަރުގެ ތެރޭގައި އިތުރުވާނެއެވެ. އެގޮތުން މިދިޔަ އަހަރު 116.3 ބިލިޔަން ރުފިޔާގައި ހުރި ނޮމިނަލް ޖީޑީޕީ، މިއަހަރު ނިމޭއިރު 124.4 ބިލިޔަން ރުފިޔާއަށް އަރާނެ ކަމަށް ލަފާކުރެވެއެވެ.

އެމްއެމްއޭއިން ވިދާޅުވި ގޮތުގައި މި ކުރިއެރުން އަންނާނެ ކަމަށް ބެލެވެނީ އިޤްތިޞާދުގެ މައިގަނޑު ސިނާއަތްތަކަށް އަންނަ ހެޔޮ ބަދަލުތަކުގެ ސަބަބުންނެވެ. އޭގެ ތެރޭގައި ފަތުރުވެރިކަމުގެ ދާއިރާއާއި، ދަތުރުފަތުރާއި، މުވާސަލާތީ ޚިދުމަތްތަކުގެ އިތުރުން ހޯލްސޭލް އަދި ރީޓެއިލް ވިޔަފާރީގެ ދާއިރާ ހިމެނެއެވެ. ވަކިން ޚާއްޞަކޮށް، މިއަހަރުގެ ތެރޭގައި ރާއްޖެއަށް 2.4 މިލިޔަން ފަތުރުވެރިން ޒިޔާރަތްކުރާނެ ކަމަށް ލަފާކުރެވޭތީ، މިއީ ޤައުމީ އުފެއްދުންތެރިކަން އިތުރުވުމަށް ލިބޭނެ ބޮޑު ބާރެކެވެ.

ޤައުމީ އުފެއްދުންތެރިކަމުގެ މިންގަނޑު ނުވަތަ ޖީޑީޕީއަކީ ޤައުމެއްގެ ބޯޑަރުގެ އެތެރޭގައި އުފައްދާ ހުރިހާ މުދަލާއި ޚިދުމަތެއްގެ ޖުމްލަ އަގަށް ކިޔާ ނަމެކެވެ. މީގެ ތެރޭގައި ބާޒާރުގައި ވިއްކާ މުދަލުގެ އިތުރުން، ސަރުކާރުން ހިލޭ ފޯރުކޮށްދޭ ދިފާއީ ޚިދުމަތްތަކާއި ތައުލީމީ ޚިދުމަތްތައް ފަދަ މުހިންމު ކަންކަންވެސް ހިމެނެއެވެ.