ވީއައިއޭގައި މާރާމާރީ ހިންގި ދެ ބިދޭސީން ހައްޔަރުކޮށް، ބަންދަށް މުއްދަތު ޖަހައިފި

ވެލާނާ އިންޓަރނޭޝަނަލް އެއާޕޯޓުގައި މިމަހުގެ 9 ވަނަ ދުވަހު ހިންގި ހަމަނުޖެހުމާއި ގުޅިގެން ދެ ބިދޭސީއަކު ހައްޔަރުކޮށް، އެމީހުންގެ ބަންދަށް މުއްދަތު ޖަހައިފިއެވެ.

ދިވެހި ފުލުހުންގެ ޚިދުމަތުން މައުލޫމާތު ދެއްވި ގޮތުގައި، މި ހަމަނުޖެހުން ހިނގާފައިވަނީ މިމަހުގެ 9 ވަނަ ދުވަހުގެ ރޭ 12:15 ހާއިރުއެވެ. މި މައްސަލައާ ގުޅިގެން ހައްޔަރުކޮށްފައިވަނީ ސްރީލަންކާއަށް ނިސްބަތްވާ ދެ ފިރިހެނުންނެވެ. އެއީ ތިލަކް ޗޯމަޗަންދްރަ މަޑެތަލަވޭ ކަންކަނަމަލަގޭ އާއި ޕްރިޔަންތަ ސިލްވާދެވަނިއްތިގެ އެވެ.

ފުލުހުން ވިދާޅުވީ، މި ދެމީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، އެމީހުން ބަންދުގައި ބޭތިއްބުމަށް 15 ދުވަހުގެ މުއްދަތެއް ކޯޓުން ވަނީ ދީފައެވެ.

މި ހާދިސާ ހިނގަން މެދުވެރިވި ސަބަބާއި، ހަމަނުޖެހުމާ ގުޅޭ އިތުރު ތަފްސީލު ހޯދުމަށް ފުލުހުން މިހާރު ދަނީ މި މައްސަލަ އިތުރަށް ތަޙުޤީޤު ކުރަމުންނެވެ.