ސީޝެލްސްއަށް ކަނޑައެޅުއްވި ސަފީރުގެ ފަތްކޮޅު އަރުވައިފި

ދިވެހިރާއްޖެއިން ސީޝެލްސްއަށް ކަނޑައަޅުއްވާފައިވާ ނޮން-ރެސިޑެންޓް ސަފީރު މަސްޢޫދު އިމާދު، އެޤައުމުގެ ރައީސް ޑރ. ޕެޓްރިކް ހަރމިނީއަށް ސަފީރުކަމުގެ ފަތްކޮޅު އަރުވައިފިއެވެ. މި ރަސްމިއްޔާތު ބާއްވާފައިވަނީ ސީޝެލްސްގެ ވެރިރަށް ވިކްޓޯރިއާގައި ހުންނަ ރިޔާސީ ގަނޑުވަރުގައެވެ.

ފަތްކޮޅު އެރުވުމުގެ ރަސްމިއްޔާތަށްފަހު ބޭއްވި ބައްދަލުވުމުގައި، ސަފީރު މަސްޢޫދު ވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ފަރާތްޕުޅުން ސީޝެލްސްގެ ރައީސަށާއި އެޤައުމުގެ ރައްޔިތުންނަށް ހެޔޮއެދުންތަކާއި ތަހުނިއްޔާ އަރިސްކުރައްވާފައެވެ. ސަފީރުގެ ވާހަކަފުޅުގައި ސީޝެލްސް ސަރުކާރުން ދެންނެވި ހޫނު މަރުހަބާއަށް ޝުކުރު އަދާކުރައްވައި، ދެ ޤައުމުގެ ދެމެދުގައި އޮތް ގުޅުން އިތުރަށް ހަރުދަނާކުރުމަށް މަސައްކަތް ކުރައްވާނެ ކަމުގެ ޔަޤީންކަން ދެއްވިއެވެ.

މި ބައްދަލުވުމުގައި ދެ ޤައުމަށްވެސް މުހިންމު ދާއިރާތައް ކަމުގައިވާ މަސްވެރިކަމާއި، ފަތުރުވެރިކަން އަދި ވިޔަފާރީގެ ދާއިރާއިން ގުޅުން ބަދަހިކުރުމުގެ މުހިންމުކަމާ ގުޅޭގޮތުން ދެބޭފުޅުން މަޝްވަރާ ކުރެއްވިއެވެ. ސީޝެލްސްގެ ރައީސް ޑރ. ޕެޓްރިކް ހަރމިނީ ވަނީ ސަފީރު މަސްޢޫދަށް މަރުހަބާ ދަންނަވައި، ސަފީރުގެ ދައުރުގައި ދެ ޤައުމުގެ ގުޅުން އައު އުސްމިންތަކަކަށް ވާސިލްވާނެ ކަމަށް އުއްމީދު ކުރައްވާ ކަމަށް ވިދާޅުވެފައެވެ.

މީގެ އިތުރުން، ސަފީރު މަސްޢޫދު ވަނީ ސީޝެލްސްގެ ނައިބު ރައީސް ސަބޭސްޓިއަސް ޕިއްލޭގެ އަރިހަށްވެސް އިޙްތިރާމުގެ ޒިޔާރަތެއް ކުރައްވާފައެވެ. މި ބައްދަލުވުމުގައިވެސް ދެ ޤައުމުގެ މަސްލަހަތު ހިމެނޭ ކަންކަމާ ގުޅޭގޮތުން ވާހަކަފުޅު ދެއްކެވިއެވެ.

ސަފީރު މަސްޢޫދު އިމާދަކީ މިވަގުތު ދިވެހިރާއްޖެއިން ސްރީލަންކާއަށް ކަނޑައަޅުއްވާފައި ހުންނަވާ ހައިކޮމިޝަނަރެވެ. ދިވެހި ޚާރިޖިއްޔާއިން މަޢުލޫމާތު ދެއްވާގޮތުގައި، ސީޝެލްސްގެ ސަފީރުކަމުގެ މަސްއޫލިއްޔަތުތައް މަސްޢޫދު އަދާކުރައްވާނީ ލަންކާގައި ހުންނަވައިގެން ނޮން-ރެސިޑެންޓް ސަފީރެއްގެ ގޮތުގައެވެ.