އިމިގްރޭޝަނުން ބަންގްލަދޭޝްގެ 4 މީހަކު ހޯދަން ޢިޢުލާނުކޮށްފި

މޯލްޑިވްސް އިމިގްރޭޝަނުން ބަންގްލަދޭޝްއަށް ނިސްބަތްވާ ހަތަރު މީހަކު ހޯދުމަށް ފޮޓޯއާއި ވަނަވަރާއެކު މިއަދު އާންމުކޮށް އިއުލާނުކޮށްފިއެވެ.

 އެ އިދާރާއިން މި މީހުންގެ މައުލޫމާތު އާންމުކޮށްފައިވަނީ އެ މީހުން ހޯދުމަށް ކުރި މަސައްކަތުން މިހާތަނަށް ފެނިފައިނުވާތީއެވެ.

ހޯދަމުންދާ މީހުންގެ ތަފްސީލް

އިމިގްރޭޝަނުން ހޯދަމުންދާ ބަންގްލަދޭޝްގެ ހަތަރު މީހުންނަކީ: ޖިއާއުރް ރަހްމާން ބިޝްވާސް (46 އަހަރު)، ރަފީގުލް (32 އަހަރު)، އެމްޑީ އާރިފް ޓަޓީ (22 އަހަރު) އަދި އެމްޑީ ސަހާދަތް ހޮސެއިން (27 އަހަރު) އެވެ. ނަމަވެސް މި މީހުން ހޯދަނީ ސީދާ ކޮން މައްސަލައަކާ ގުޅިގެން ކަމެއް އިމިގްރޭޝަނުން ހާމަކޮށްފައެއް ނުވެއެވެ.

އެ އިދާރާއިން ވަނީ މި ހަތަރު މީހުންނާ ބެހޭ އެއްވެސް މައުލޫމާތެއް ލިބިފައިވާ ފަރާތެއް ވާނަމަ، އިމިގްރޭޝަންގެ ހޮޓްލައިން ނަންބަރު 7980408 އަށް ގުޅައި އެ މައުލޫމާތު ހިއްސާކުރުމަށް އެދިފައެވެ.

ރާއްޖޭގައި ގަވައިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީއާއި، މޯލްޑިވްސް ޕޮލިސް ސާވިސްގެ އިތުރުން އިމިގްރޭޝަނުން ގުޅިގެން ދަނީ ހާއްސަ އޮޕަރޭޝަންތަކެއް ހިންގަމުންނެވެ. މި މަސައްކަތުގެ ދަށުން މިދިޔަ އަހަރުގެ ތެރޭގައި ވެސް ގަވައިދާ ހިލާފަށް އުޅެމުންދިޔަ ގިނަ އަދަދެއްގެ ބިދޭސީން ވަނީ ރާއްޖެއިން ފޮނުވާލާފައެވެ.