ފަހު ވަގުތު ޔުނައިޓެޑުން ކާމިޔާބުކުރި ގޯލާއެކު އާސެނަލް ބަލިވެ ލީޑު ކުޑަވެއްޖެ

އިނގިރޭސި ޕްރިމިއަރ ލީގުގައި އާދީއްތަ ދުވަހުގެރޭ މެންޗެސްޓަރ ޔުނައިޓެޑާއި އާސެނަލް ބައްދަލުކުރި މެޗު ނިމެން ކައިރިވެފައި ވަނިކޮށް، ޔުނައިޓެޑުގެ މެތިއުޒް ކޫނާ ކާމިޔާބުކުރި ގޯލާއެކު 3-2އިން އާސެނަލް ބަލިވެ، ލީގުގެ އެއްވަނައިގައި އެ ޓީމަށް އޮތް ލީޑު 4 ޕޮއިންޓަށް ކުޑަވެއްޖެއެވެ.

އަދި ލީގު ތައްޓާއި މިހާރު އެންމެ ކައިރިން ވާދަކުރަމުންދާ މެންޗެސްޓަރ ސިޓީ އާއި އެސްޓަން ވިލާ ވެސް މި ހަފްތާގައި މޮޅުވެފައިވުމުން، ޔުނައިޓެޑާއި ދެކޮޅަށް 3 ޕޮއިންޓު ގެއްލުމަކީ އާސެނަލްއަށް ކުރިމަތިވި ބޮޑު ޕްރެޝަރެކެވެ.

އާސެނަލްގެ އެމިރޭޓްސް ސްޓޭޑިއަމްގައި ކުޅުނު މި މެޗުގައި ޔުނައިޓެޑުގެ ލިސާންޑްރޯ މާޓިނޭޒްގެ އަތުން ބައިކޮޅަށް ވަތް ގޯލަކުން 29ވަނަ މިނެޓުގައި އާސެނަލްއަށް ލީޑު ލިބުނު ނަމަވެސް، މާޓިން ޒުބަމެންޑީއަށް ހެދުނު ގޯހެއްގެ ބޭނުން ހިފައި، ޔުނައިޓެޑުން ވަނީ ފަހު ހާފުގައި ލީޑު ނަގާފައެވެ.

ޔުނައިޓެޑަށް ނަތީޖާ ހަމަހަމަކޮށްދިނީ ބްރްޔަން އެމްބޫމޯ ފުރަތަމަ ހާފުގައި ކާމިޔާބުކުރި ގޯލުންނެވެ. އަދި ދެވަނަ ހާފުގެ 5ވަނަ މިނެޓުގައި ޕެޓްރިކް ޑޯރގޫ ވަނީ ޔުނައިޓެޑަށް ލީޑު ނަގައިދީފައެވެ. 

އޭގެ ފަހުން ބަދަލުކުޅުންތެރިއެއްގެ ގޮތުގައި ނިކުތް އާސެނަލްގެ މިކެލް މެރީނޯ މެޗުގެ 84ވަނަ މިނެޓުގައި ކާމިޔާބުކުރި ގޯލާއެކު އެ ޓީމަށް މެޗުން ޕޮއިންޓެއް ލިބޭނެކަމަށް ބެލެވުނު ނަމަވެސް، މެޗު ނިމެން 3 މިނެޓަށް ވެފައިވަނިކޮށް ޕެނަލްޓީ އޭރިއާގެ ބޭރުން ގޯލުގެ ދުރު ކަނަށް ކޫނާ ފޮނުވާލި ބޯޅައާއެކު މެޗު ނިމުނީ ލީގު ތައްޓަށް އެންމެ ކައިރިން ވާދަކުރަމުން އަންނަ އާސެނަލްއަށް ބޮޑު ހާސްކަމެއް ގެނުވަމުންނެވެ. 

މި ނަތީޖާއާއެކު މެންޗެސްޓަރ ސިޓީ އާއި އާސެނަލްއާ ދެމެދު އޮތީ 4 ޕޮއިންޓުގެ ފަރަގެކެވެ. 

އަދި މައިކަލް ކެރިކްގެ އިރުޝާދުގެ ދަށުން ޔުނައިޓެޑުން މިދިޔަ ހަފްތާގައި ސިޓީ 2-0އިން ބަލިކުރުމަށްފަހު، އަނެއްކާ މި ހަފްތާގައި އާސެނަކް ބަލިކުރުމާއެކު އެ ޓީމު ވަނީ ލިވަޕޫލް އަދި ޗެލްސީ ފަހަތަށް ޖައްސާލުމަށްފަހު ލީގުގެ ގަދަ ހަތަރަކަށް އަރާފައެވެ.