ކުޅިވަރު

އެފްއޭއެމް ވިމެންސް ލީގު: މާޒިޔާ އާއި ނިއުރޭޑިއަންޓަށް ބޮޑު މޮޅެއް

އެފްއޭއެމް ވިމެންސް ލީގު: މާޒިޔާ އާއި ނިއުރޭޑިއަންޓަށް ބޮޑު މޮޅެއް

މާޒިޔާގެ ސަފީނާ ބޯޅަ ފޮނުވާލަނީ / ފޮޓޯ: އެފްއޭއެމް

މިފްތާޙް މުޙައްމަދު

މިފްތާޙް މުޙައްމަދު

16 ނޮވެމްބަރު 2026، 04:24

16 ނޮވެމްބަރު 2026، 04:24

އެފްއޭއެމް ވިމެންސް ލީގު 2026 އާދީއްތަ ދުވަހު ފެށިގެން ދިޔައިރު، އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނާއި ނިއުރޭޑިއަންޓް ސްޕޯޓްސް ކްލަބުން ތަފާތު ބޮޑު ނަތީޖާތަކަކާއެކު މުބާރާތުގެ ފެށުން ވަރުގަދަކޮށްފިއެވެ.

މުބާރާތުގެ ފުރަތަމަ މެޗުގައި، ލީގު ދިފާއުކުރުމުގެ އަޒުމުގައި ނުކުތް މާޒިޔާއިން ވަނީ 8-0 ގެ ތަފާތު ބޮޑު ނަތީޖާއަކުން މޯލްޑިވްސް ސޮކާ މޭޓްސް (އެމްއެސްއެމް) ބަލިކޮށްފައެވެ. ތަފާތު ބޮޑު ނަތީޖާއަކުން މެޗު ނިމިގެން ދިޔަނަމަވެސް، މެޗުގެ ފުރަތަމަ 20 މިނެޓުގައި އެމްއެސްއެމް އިން ވަނީ ވަރުގަދަ ޑިފެންސިވް ކުޅުމެއް ދައްކައި މާޒިޔާ ހިފަހައްޓާފައެވެ. ނަމަވެސް މާޒިޔާއިން މެޗުގެ ކޮންޓްރޯލް ނަގައި، ފުރަތަމަ ހާފު ނިންމާލީ 4-0 ގެ ލީޑަކާއެކުގައެވެ. ފުރަތަމަ ހާފުގައި މާޒިޔާގެ ޝަހުލާ ތައުފީގު ދެ ލަނޑު ޖެހިއިރު، އަނެއް ދެ ލަނޑު ކާމިޔާބުކޮށްދިނީ ސަފީނާ ރުޝާނިޔާ އަދި ފަދުވާ ޒާހިރެވެ.

ދެވަނަ ހާފުގައި ފެނިގެންދިޔައީ މާޒިޔާގެ ސަފީނާގެ މޮޅު ކުޅުމެވެ. ހިލޭޖެހުންތަކުން ކާމިޔާބުކުރި ފުރިހަމަ ދެ ލަނޑާއެކު އޭނާ ވަނީ މި ހާފުގައި ހެޓްރިކް ފުރިހަމަކޮށް، މެޗުގައި ޖުމްލަ ހަތަރު ލަނޑު ހަމަކޮށްފައެވެ. ފަހު ހާފުގައި ފަދުވާ ވެސް އިތުރު ލަނޑެއް ކާމިޔާބުކުރިއެވެ. 

މުބާރާތުގެ ދެވަނަ މެޗުގައި ނިއުރޭޑިއަންޓުން ވަނީ ދަ ގްރާންޑޭ ސްޕޯޓްސް ކްލަބްގެ މައްޗަށް 15-0 ގެ ތާރީޚީ އަދި ބޮޑު މޮޅެއް ހޯދާފައެވެ. ހަމަލާތަކުގައި ފުރިހަމަ އަދި އަވަސް ކުޅުމެއް ދެއްކި ނިއުރޭޑިއަންޓުން ވަނީ ފުރަތަމަ ހާފު ނިމުމުގެ ކުރިން 7-0 ގެ ބޮޑު ލީޑެއް ނަގާފައެވެ.

މި މެޗުގައި ނިއުރޭޑިއަންޓްގެ ސުމަޔާ މަޓްސުޝިމާ ވަނީ 5 ލަނޑު ޖަހައި މޮޅު ކުޅުމެއް ދައްކާފައެވެ. މީގެއިތުރުން މައީޝާ އަބްދުލް ހަންނާނާއި ސަބީނާ ޚާތޫން، މިއިން ކޮންމެ ކުޅުންތެރިއަކު ހެޓްރިކް ހެދިއިރު، މަރިޔަމް ނޫރާ ވަނީ ދެ ލަނޑު ޖަހާފައެވެ. އަދި އާމިނަތު ފަޒްލާ އާއި ސުމާ މުހައްމަދު ވެސް ވަނީ މިއިން ކޮންމެ ކުޅުންތެރިއަކު ލަނޑެއް ކާމިޔާބުކޮށްފައެވެ.

މިއަހަރުގެ އެފްއޭއެމް ވިމެންސް ލީގުގައި ވާދަކުރަނީ ހަތަރު ޓީމެވެ. މުބާރާތް ކުރިއަށް ގެންދިއުމަށް ހަމަޖެހިފައިވަނީ ރައުންޑް-ރޮބިން އުސޫލުން، ކޮންމެ ޓީމެއް ކޮންމެ ޓީމަކާ ދެ ފަހަރު ބައްދަލުކުރާ ގޮތަށެވެ.

Ads by MSS

Ads by MSS

މި ލިޔުން ކިޔާލުމުން

ކިޔުންތެރިންގެ ހިޔާލު
450