ޓީ20 ކްރިކެޓް ވޯލްޑް ކަޕު އިންޑިއާގައި ކުޅޭތީ މުބާރާތުން ވަކިވާން ބަނގުލަދޭޝް ނިންމައިފި

ޓުވެންޓީ20 ކްރިކެޓް ވޯލްޑް ކަޕު އިންޑިއާގައި ކުޅޭތީ މުބާރާތުން ވަކިވާން ބަނގުލަދޭޝް ނިންމައިފިއެވެ. ރިޕޯޓުތައް ބުނާގޮތުން، ބަނގުލަދޭޝްގެ މި ނިންމުމާ ގުޅިގެން އެ ޓީމުގެ ޖާގަ ދިނުމަށް އިންޓަނޭޝަނަލް ކްރިކެޓް ކައުންސިލް (އައިސީސީ) އިން ނިންމާފައި ވަނީ ސްކޮޓްލަންޑަށެވެ.

އިންޑިއާއަށް ނުދިއުމަށް ބަނގުލަދޭޝްއިން ނިންމީ، ސަލާމަތްތެރިކަން ނުލިބިދާނެ ކަމުގެ ބިރަށްޓަކައިކަމަށް ވެސް ރިޕޯޓުތައް ބުނެއެވެ. އެއީ އިންޑިއަން ޕްރިމިއަރ ލީގު (އައިޕީއެލް) ކުޅުމަށް އެ ޤައުމުގެ ޓީމަކުން 1.5 މިލިއަން އޮސްޓްރޭލިއަން ޑޮލަރުގެ އަގަކަށް މިދިޔަ ޑިސެމްބަރު މަހު ގެންދިޔަ ބަންގްލަދޭޝްގެ ބާރު އުކުންތެރިޔާ މުސްތަފިޒުރު ރަހުމާނަށް އިންޑިޔާގެ ހިންދޫން ބިރު ދައްކައި އޭނާ އިންޑިޔާއިން ފޮނުވާލުމާ ގުޅިގެންނެވެ.

މިކަމާ ގުޅުވައި ބަނގުލަދޭޝްގެ ސަރުކާރުން ބުނަނީ، ކުޅުންތެރިންނަށް ރައްކާތެރިކަން ލިބޭނެކަމުގެ ޔަޤީންކަން ނެތުމުން އެ ޤައުމުގެ ކުޅުންތެރިން އިންޑިއާއަށް ނުފޮނުވޭނެ ކަމަށެވެ. 

މިކަމާ ގުޅިގެން ބަނގުލަދޭޝްއިން އައިސީސީއަށް ހުށަހެޅީ އެ ޤައުމުގެ މެޗުތައް ސްރީ ލަންކާއަށް ބަދަލުކޮށްދިނުމަށެވެ. ނަމަވެސް އެގޮތަށް ބަދަލު ނުކުރުމަށް އައިސީސީން ވަނީ ނިންމާފައެވެ.

 ބަނގްލަދޭޝްގެ ކްރިކެޓް ބޯޑުގެ އޮފިޝަލް އާސިފް ނަޒަރުލް ވިދާޅުވީ، މިކަމުގައި އިންޑިޔާ ދެކެ ބިރުން އައިސީސީން ދައްކާ އެއްވެސް ވާހަކަ އެއް އަޑުނާހާނެ ކަމަށެވެ. އަދި މި ނިންމުމަކީ ބަނގްލަދޭޝްގެ ސަރުކާރުގެ ނިންމުމެއް ކަމަށާއި މިއީ އެއްގޮތަކަށް ވެސް ކުޅުންތެރިންގެ ނިންމުމެއް ނޫން ކަމަށެވެ.

ބަނގްލަދޭޝް އާއި އިންޑިޔާއާ ދެމެދު ސިޔާސީ ހިތްހަމަނުޖެހުންތަކެއް ވެސް އެބައުޅެ އެވެ. އޭގެ ސަބަބަކީ ބަނގްލަދޭޝްގެ ރައްޔިތުންގެ ނުކުމެ މުޒާހަރާކޮށް ސަރުކާރު ވައްޓާލުމުން އެ ގައުމުގެ ކުރީގެ ބޮޑު ވަޒީރު ޝައިހް ހަސީނާ ފިއްލަވައިގެން އިންޑިޔާއަށް ވަޑައިގެން އެ ގައުމުގެ ހިމާޔަތް ހޯއްދަވާފައިވާތީއެވެ.