ފާއިތުވި ދެ އަހަރުގެ ތެރޭގައި ޑަޔަލިސިސްގެ ޚިދުމަތް 10 ރަށެއްގައި ފަށައިފި

ދިވެހިރާއްޖޭގެ ޞިއްޙީ ނިޒާމު ރަނގަޅުކޮށް، ރައްޔިތުންނާ ގާތުން ޞިއްޙީ ޚިދުމަތްތައް ދިނުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން، ފާއިތުވި ދެ އަހަރުގެ ތެރޭގައި ޑަޔަލިސިސްގެ ޚިދުމަތް 10 ރަށެއްގައި ފަށާފައިވާނެކަމަށް ޞިއްޙީ ވަޒީރު ޢަބްދުﷲ ނާޠިމް އިބްރާހީމް ވިދާޅުވެއްޖެއެވެ.

ދ. އަތޮޅު ހޮސްޕިޓަލުގައި ޑަޔަލިސިސްގެ ޚިދުމަތް ރަސްމީކޮށް ފެށުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ޞިއްޙީ ވަޒީރު ވިދާޅުވީ، ދ. އަތޮޅު ހޮސްޕިޓަލަކީ މި ވޭތުވެދިޔަ ދެ އަހަރު ތެރޭގައި މި ޚިދުމަތް ފެށި 10 ވަނަ ހޮސްޕިޓަލު ކަމަށެވެ. އަދި މިކަމުގެ ސަބަބުން އެ ރަށްރަށުގެ ރައްޔިތުން ޑަޔަލިސިސް ހެދުމަށްޓަކައި އެހެން ރަށްރަށަށް ކުރަންޖެހޭ ދަތުރުތައް ހުއްޓި، ބޮޑު ލުޔެއް ލިބިގެންދާނެ ކަމަށް ވަޒީރު ފާހަގަކުރެއްވިއެވެ.

މިކަމާ ގުޅިގެން ވާހަކަފުޅު ދައްކަވަމުން ވަޒީރު އިތުރަށް ވިދާޅުވީ، ޑަޔަލިސިސް ހަދަންޖެހޭ ބަލި މީހުންނަށް ނުވަތަ ބަލި މީހުންގެ އާއިލާއަކަށް މެނުވީ އެކަމުން އުފުލަންޖެހޭ ތަކުލީފާއި ވޭން އިހުސާސް ނުކުރެވޭނެ ކަމަށެވެ. އެހެންކަމުން އަސާސީ ޚިދުމަތެއް ރައްޔިތުން ތިބި ރަށަކުން ލިބޭނެ އިންތިޒާމު ހަމަޖެއްސުމަކީ ސަރުކާރުން ވަރަށް ބޮޑަށް އިސްކަމެއް ދެއްވާ ކަމެއް ކަމުގައި ވިދާޅުވިއެވެ. 

ޑަޔަލިސިސްގެ ޚިދުމަތް އަލަށް ފެށި ރަށްތައް:

• އާމިނާދިޔޯ ޞިއްޙީ މަރުކަޒު
• ގއ. އަތޮޅު ހޮސްޕިޓަލް
• ށ. އަތޮޅު ހޮސްޕިޓަލް
• ނ. ވެލިދޫ ޞިއްޙީ މަރުކަޒު
• މުލި ރީޖަނަލް ހޮސްޕިޓަލް
• ތ. އަތޮޅު ހޮސްޕިޓަލް
• އއ. އަތޮޅު ހޮސްޕިޓަލް
• އދ. އަތޮޅު ހޮސްޕިޓަލް
• ބ. ދަރަވަންދޫ ޞިއްޙީ މަރުކަޒު
• ދ. އަތޮޅު ހޮސްޕިޓަލް

ރާއްޖޭގައި ގައިންގަޔަށް ނާރާ ބޮޑެތި ބަލިތަކުގެ ތެރޭގައި އެންމެ ގިނައިން ބޭސްފަރުވާއަށް ރާއްޖެއިން ބޭރަށް ދިޔުމަށް ދައުލަތުން ޚަރަދުކުރާ އެއް ބައްޔަކީ ކިޑްނީގެ ބަލިތަކެވެ. ކިޑްނީ ބަލީގެ ފަރުވާ ރާއްޖޭގައި ފުޅާކުރުމަށް ސަރުކާރުން އަންނަނީ މަސައްކަތް ކުރައްވަމުންނެވެ. ކިޑްނީ ބަލީގެ ސަބަބުން ހަފްތާއަކު ދެތިން ދުވަހު ޑަޔަލިސިސްގެ ޚިދުމަތް ހޯދަންޖެހޭ މީހުންގެ ޢަދަދު އަންނަނީ އިތުރުވަމުންނެވެ.

ރާއްޖޭގައި މިވަގުތު ޑަޔަލިސިސްގެ ޚިދުމަތް ނުފެށި އޮތީ، ވ. އަތޮޅުގެ އިތުރުން ފ.އަތޮޅުގައެވެ.