ޤައުމީ ފުޓްސަލް ޓީމަށް މަރުހަބާ ކިޔުމަށް ޚާއްޞަ ހަރަކާތްތަކެއް

ސައުތު އޭޝިއަން ފުޓުބޯޅަ ފެޑެރޭޝަން (ސާފް)އިން ފުރަތަމަ ފަހަރަށް ބޭއްވި ސާފް ފުޓްސަލް ޗެމްޕިއަންޝިޕް ކާމިޔާބުކުރި ދިވެހިރާއްޖޭގެ ފިރިހެން ފުޓްސަލް ޓީމަށް މަރުޙަބާ ކިޔުމަށް ޚާއްޞަ ހަރަކާތްތަކެއް ބޭއްވުމަށް ކުޅިވަރު ވުޒާރާއި ފުޓުބޯޅަ އެސޯސިއޭޝަން އޮފް ދަ މޯލްޑިވްސް (އެފްއޭއެމް)އިން ނިންމައިފިއެވެ.

ސައްތައިންސައްތަ ރެކޯޑަކާއެކު އެއްވެސް މެޗަކުން ބަލިނުވެ މުބާރާތް ނިންމާލި ރާއްޖޭގެ ޓީމު މާލެ އައުމަށް ހަމަޖެހިފައި ވަނީ އަންގާރަ ދުވަހުގެ ރެއެވެ. ޓީމަށް މަރުޙަބާ ކިއުމުގެ ހަރަކާތްތައް ވެލާނާ އިންޓަނޭޝަނަލް އެއާރޕޯޓުގެ އިތުރުން މާލޭގައި ވެސް ބޭއްވުމަށް ވަނީ ނިންމާފައެވެ.

ވީއައިއޭގެ ވީއައިޕީން ކުޅުންތެރިންނަށް މަރުޙަބާ ކިއުމަށްފަހު، ކުޅުންތެރިން މާލެ އައިސް އަމީނީ މަގާއި މަޖީދީމަގުގައި ޓްރޮފީ ޕެރޭޑެއް ބޭއްވުމަށް ވަނީ ނިންމާފައެވެ. އަދި އާރޓިފިޝަލް ބީޗުގައި ޓީމަށް މަރުޙަބާ ކިއުމުގެ ޚާއްސަ ހަރަކާތްތަކެއް ކުރިޔަށް ގެންދިއުމަށް ވަނީ ހަމަޖެހިފައެވެ.

މީގެއިތުރުން، މި ތާރީޚީ ކާމިޔާބީ ފާހަގަކުރުމަށް މާދަމާރޭ 10:00 ގައި ހަވާ އެރުވުމަށްވެސް ވަނީ ހަމަޖެހިފައެވެ.

ފުޓްސަލް ޓީމުގެ ކާމިޔާބީ ފާހަގަކޮށް، ކުޅުންތެރިންނާ އޮފިޝަލުންނަށް ހިތްވަރު ދިނުމުގެ ގޮތުން ޤައުމީ ފުޓުބޯޅަ ޓީމު ހިމެނޭހެން، ބޯނަސްގެ ގޮތުގައި އެއް މިލިއަން ރުފިޔާ ދިނުމަށް ވެސް ރައީސުލްޖުމްހޫރިއްޔާ ވަނީ ނިންމަވާފައެވެ.