ސަރަޙައްދީ ފުޓްސަލްގެ ރަސްގެފާނުންގެ ގޮތުގައި ރާއްޖެއިން މުބާރާތް ނިންމާލައިފި

ދެކުނު އޭޝިއާގެ ފުޓްސަލްގެ ރަސްގެފާނުންގެ ގޮތުގައި ދިވެހިރާއްޖޭގެ ފިރިހެން ފުޓްސަލް ޓީމުން، ސާފް ފުޓްސަލް ޗެމްޕިއަންޝިޕް ކާމިޔާބުކޮށް މުބާރާތް ނިންމާލައިފިއެވެ.

މުޅިން އަލަށް ސައުތު އޭޝިއަން ފުޓުބޯޅަ ފެޑެރޭޝަން (ސާފް) އިން ބޭއްވި ފުޓްސަލް މުބާރާތުގެ ތަށި ދިވެހިރާއްޖެއިން ކާމިޔާބުކުރީ ކުޅުނު 6 މެޗުން ވެސް މޮޅުވެ، ސައްތައިންސައްތަ ރެކޯޑަކާއެކުއެވެ. 

އުޒްބަކިސްތާނުގެ ކޯޗު ފަރޫކް ޒަކިރޯވްގެ އިރުޝާދުގެ ދަށުން މި މުބާރާތަށް ނިކުތް ރާއްޖޭގެ ޓީމުން ވަނީ 6 މެޗުން 28 ގޯލު ކާމިޔާބުކޮށްފައެވެ. އަދި އެއްވެސް މެޗަކުން ބަލިނުވެ މުބާރާތް ނިންމާލި ހަމައެކަނި ޓީމަކީ ވެސް ދިވެހިރާއްޖެއެވެ.

_{ރާއްޖޭގެ ކޯޗާއި ކުޅުންތެރިން އުފާފާޅުކުރަނީ / ފޮޓޯ: އެފްއޭއެމް}

ސާފް ފުޓްސަލް ޗެމްޕިއަންޝިޕް 2026ގައި ރާއްޖެއިން ނެރުނު ނަތީޖާތައް:

• ޕާކިސްތާން 1-7 ދިވެހިރާއްޖެ
• ދިވެހިރާއްޖެ 6-1 ބަނގުލަދޭޝް
• ދިވެހިރާއްޖެ 5-0 އިންޑިއާ
• ދިވެހިރާއްޖެ 2-1 ނޭޕާލް
• ބޫޓާން 1-3 ދިވެހިރާއްޖެ
• ސްރީލަންކާ 2-5 ދިވެހިރާއްޖެ

ރާއްޖެއިން މިއަދު މުބާރާތުގެ ފަހު މެޗު ކުޅުނު ނަމަވެސް، ބާކީ އެއް މެޗު އޮއްވައި، ބޫޓާންއާ ދެކޮޅަށް ކުޅުނު މެޗު ކާމިޔާބުކޮށް ރާއްޖެއިން ވަނީ ތަށި ޔަޤީން ކޮށްފައެވެ. 

މުބާރާތް ނިންމާލިއިރު އެންމެ ފާހަގަކޮށްލެވޭ އެއް ކަމަކީ، ރާއްޖެއާ އެންމެ ވާދަވެރި އިންޑިއާއަށް ރާއްޖެ ކޮޅަށް އެއްވެސް ގޯލެއް ކާމިޔާބު ނުކުރެވުމެވެ. 

އަދި ރާއްޖޭގެ ގޯލްކީޕަރު ޒައިދާން އަޙުމަދު ގޯލެއް ކާމިޔާބު ކުރުމުގެ އިތުރުން، ރާއްޖޭގެ ކެޕްޓަން މުޙައްމަދު އިމްރާން ކޮންމެ މެޗެއްގައި ގޯލު ކާމިޔާބުކޮށްފައިވުމީ، ތާރީޙުގައި ރަން އަކުރުން ފަވާލެވޭނެ ފަޚުރުވެރި ކާމިޔާބީތަކެކެވެ.