ހުޅުމާލެ ދެވަނަ ޖީޕީ ކްލިނިކުން މާޗް މަހު ޚިދުމަތް ދޭން ފަށާނެ: ހުޅުމާލެ ހޮސްޕިޓަލް

ހުޅުމާލެ ދެވަނަ ފިޔަވަހީގައި ތަރައްޤީކުރާ ދެވަނަ ޖީޕީ ކްލިނިކުގެ ޚިދުމަތް އަންނަ މާޗްމަހު ފެށުމަށް ތައްޔާރުވަމުން އަންނަކަމަށް ހުޅުމާލެ ހޮސްޕިޓަލުން ހާމަކޮށްފިއެވެ.

މި ކްލިނިކް ޤާއިމްކުރަނީ ދެވަނަ ފިޔަވަހީގައި އަލަށް ތަރައްޤީކޮށްފައިވާ އަމާން އުދަރެސް ޓަވަރުގައެވެ.

ހުޅުމާލެ ހޮސްޕިޓަލުން ވިދާޅުވީ ޖީޕީ ކްލިނިކްގެ ޚިދުމަތް ދިނުމަށްޓަކައި ސެޓަޕް ބަދަލުކުރުމުގެ މަސައްކަތް މިހާރު ކުރަމުން އަންނަކަމަށެވެ. މި މަޝްރޫޢުގެ މައިގަނޑު އަމާޒަކީ ދެވަނަ ފިޔަވަހީގައި ތަރައްޤީކޮށްފައިވާ 4000 ފްލެޓަށް މީހުން ބަދަލުވަމުންދާއިރު، އެ ސަރަޙައްދުން ފަސޭހަކަމާއެކު ސިއްޙީ ޚިދުމަތްތައް ފޯރުކޮށްދިނުން ކަމަށް އެ ހޮސްޕިޓަލުން ފާހަގަކުރެއެވެ.

އަމާން އުދަރެހުގެ 6 ވަނަ ޓަވަރުގައި މި ކްލިނިކް ގާއިމްކުރުމަށްޓަކައި، ފަހި ދިރިއުޅުން ކޯޕަރޭޝަން (އެފްޑީސީ) އާއި މާލެ ސިޓީ ގްރޫޕް އޮފް ހޮސްޕިޓަލްސްއާ ދެމެދު ކޮމާޝަލް ޔުނިޓް ބޭނުންކުރުމުގެ އެއްބަސްވުމުގައި ސޮއިކޮށްފައިވަނީ މިދިޔަ މަހުގައެވެ. މި އެއްބަސްވުމުގެ ދަށުން 6788.43 އަކަފޫޓުގެ ޖާގައެއް ވަނީ ކްލިނިކް ހިންގުމަށް ދޫކޮށްފައެވެ.

ކްލިނިކުން ލިބޭނެ ޚިދުމަތްތައް
އަލަށް ހުޅުވާ މި ކްލިނިކުންވެސް އާއްމު ބަލިތަކުގެ ޑޮކްޓަރަށް ދެއްކުމާއި، ލެބޯޓްރީ ސާމްޕަލް ނެގުމުގެ އިތުރުން އެކްސްރޭ ނެގުމުގެ ޚިދުމަތް ލިބިގެންދާނެއެވެ. އަދި ސްޕެޝަލިސްޓް ޑޮކްޓަރަކަށް ދައްކަން ބޭނުންވާ ބަލިމީހުންނަށް އެ ކްލިނިކް މެދުވެރިކޮށް ރިފަރަލް ހަދައިދިނުމުގެ އިންތިޒާމްވެސް ހަމަޖެހިގެންދާނެއެވެ.

ހުޅުމާލެ ދެވަނަ ފިޔަވަހީގައި މިހާރުވެސް ހިޔާ ޓަވަރު 16 ގައި ޖީޕީ ކްލިނިކެއް ހިންގަމުންދެއެވެ. އެ ކްލިނިކުން 24 ގަޑިއިރު ޚިދުމަތް ދޭން ފަށާފައިވަނީ މިދިޔަ ސެޕްޓެމްބަރު މަހުގެ ތެރޭގައެވެ. މިއީ އާންމު ސިއްހަތުގެ ނިޒާމު ހަރުދަނާކުރުމަށް ސަރުކާރުން ކުރިއަށްގެންދާ މަސައްކަތުގެ ބައެކެވެ.

މާލެ ސަރަޙައްދުގައި ތަރައްޤީކުރާ މިފަދަ ޖީޕީ ކްލިނިކްތަކުގެ އިތުރުން، ރާއްޖޭގެ އެކި އަތޮޅުތަކުގައިވެސް މިފަދަ އާބަން ޕްރައިމަރީ ހެލްތު ކެއަރ ސެންޓަރުތައް ތަރައްޤީކުރުމަށް ސަރުކާރުން ވަނީ ނިންމާފައެވެ.