ޤައުމީ ފުޓްސަލް ޓީމުގެ ޓްރޮފީ ޕެރޭޑު ކުރިޔަށް ދާނީ އަމީނީ މަގާއި މަޖީދީ މަގުގައި

ސައުތު އޭޝިއަން ފުޓުބޯޅަ ފެޑެރޭޝަން (ސާފް)އިން ބޭއްވި ސާފް ފުޓްސަލް ޗެމްޕިއަންޝިޕްގެ ހުރިހާ މެޗެއް ކާމިޔާބުކޮށް، ފަޚުރުވެރިކަމާއެކު މުބާރާތުގެ ތަށި އުފުލާލި ދިވެހި ޤައުމީ ފުޓްސަލް ޓީމު މިރޭ އަނބުރާ ދިވެހިރާއްޖެއަށް އައުމަށް ހަމަޖެހިފައިވާއިރު، ޓީމުގެ ޓްރޮފީ ޕެރޭޑު ކުރިޔަށް ގެންދިއުމަށް ނިންމާފައި ވަނީ އަމީނީ މަގާއި މަޖީދީ މަގުގައި ކަމަށް، ކުޅިވަރާއި ބެހޭ ވުޒާރާއިން ހާމަކޮށްފިއެވެ.

ޕެރޭޑު ފެށުމަށްޓަކައި މާލެ ދިއުމަށް ޤައުމީ ޓީމު ވެލާނާ އިންޓަނޭޝަނަލް އެއާރޕޯޓުގެ ވީއައިޕީ ޓާރމިނަލުން ނައްޓާލާނީ މިރޭ 9:15ގައެވެ. އަދި ސިނަމާލެ ބުރިޖުން މާލެއަށް ދަތުރުކޮށް، ޕެރޭޑު ފަށާނީ އަމީނީ މަގުން، ހެންވޭރުން މާފަންނަށެވެ. 

ޤައުމީ ފުޓްސަލް ޓީމުން ހޯދި މި ކާމިޔާބީގައި އެންމެން ބައިވެރިވުމަށް ފުރުސަތު ދިނުމުގެ ގޮތުން ކުރިޔަށް ގެންދާ މި ޕެރޭޑު އަމީނީ މަގުން ގޮސް ބޮޑުތަކުރުފާނު މަގަށް އަޅައި، އައިޖީއެމްއެޗް ކައިރިން ގޮސް ދެން އަޅާނީ މަޖީދީ މަގަށެވެ. އަދި އެ މަގުން ގޮސް އާޓިފިޝަލް ބީޗަށް ދެވޭނެކަމަށް ލަފާކޮށްފައި ވަނީ މިރޭގެ 10:00އަށެވެ. އެއަށްފަހު އޮންނާނީ އާރޓިފިޝަލް ބީޗުގައި ކުރިޔަށްގެންދާ ޚާއްޞަ ހަރަކާތްތަކެކެވެ.

_{ސާފް ފުޓްސަލް ޗެމްޕިއަންޝިޕްގެ ތައްޓާއެކު ދިވެހި ޤައުމީ ޓީމު އާޓިފިޝަލް ބީޗަށް ދިއުމަށް ދަތުރުކުރާނެ ރޫޓު---}

މި ކާމިޔާބީ ފާހަގަކުރުމަށް އާޓިފިޝަލް ބީޗުގައި ބާއްވާ ޙާއްސަ ހަރަކާތްތަކުގައި ރައީސުލްޖުމްހޫރިއްޔާ ޑރ. މުޙައްމަދު މުއިއްޒު އާއި ކުޅީވަރާ ބެހޭ ވަޒީރު ބައިވެރިވެވަޑައިގަންނަވާނެއެވެ.

މި ހަރަކާތުގެ ތެރެއިން ރައީސް، ޤައުމީ ޓީމުގެ ކުޅުންތެރިންނާ ބައްދަލުކުރައްވައި ވާހަކަފުޅުދައްކަވާނެއެވެ. އަދި ރައީސްގެ އަތްޕުޅަށް ސާފް ފުޓްސަލް ޗެމްޕިއަންޝިޕްގެ ޓްރޮފީ އެރުވުމަށް ވެސް ހަމަޖެހިފައިވާއިރު، ހަވާ އެރުވުމުގެ ޙާއްސަ ހަރަކާތެއް ވެސް މިރޭ އޮންނާނެއެވެ.

ލީގު އުސޫލުން ކުޅުނު މި މުބާރާތުގެ ތަށި ރާއްޖޭގެ ޤައުމީ ފުޓްސަލް ޓީމުން ޔަޤީން ކުރީ ބާކީ އެއް މެޗު އޮއްވައެވެ. މުޅި މުބާރާތުގައި ދިވެހި ޓީމުން 28 ގޯލު ކާމިޔާބުކުރިއިރު، ކެޕްޓަން މުޙައްމަދު އިމްރާން ވަނީ ކޮންމެ މެޗެއްގައި ވެސް ގޯލުޖަހާފައެވެ. 

މިއީ ފުޓްސަލްއިން ރާއްޖެއަށް ލިބުނު ފުރަތަމަ ބައިނަލްއަޤުވާމީ ކާމިޔާބެވެ.