ހުޅުމާލެ ދެވަނަ ފިޔަވަހީގައި އިތުރު ސްކޫލެއް އެޅުމުގެ މަސައްކަތް ކުރަނީ

ހުޅުމާލެ ދެވަނަ ފިޔަވަހީގައި އިތުރު ސްކޫލެއް ތަރައްޤީކުރުމުގެ މަސައްކަތް ކުރަމުންދާކަމަށް ތަޢުލީމީ ވަޒީރު ޑރ. އިސްމާޢީލު ޝަފީޢު ވިދާޅުވެއްޖެއެވެ. 

ހުޅުމާލެ ދެވަނަ ފިޔަވަހީގައި ތަރައްޤީކޮށްފައިވާ ޝަހީދު ޢަލީ ސްކޫލު ރަސްމީކޮށް ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން، ތަޢުލީމީ ދާއިރާއިން ކުރިއަށް ހުރި މަޝްރޫޢުތަކަށް އަލިއަޅުވާލައްވައި ވަޒީރު ވިދާޅުވީ، ރާއްޖޭގެ ތަޢުލީމީ ނިޒާމު ހަރުދަނާ ކުރުމަށް ވޭތުވެދިޔަ ދެ އަހަރު ތެރޭ ގިނަ މަސައްކަތްތަކެއް ކޮށްފައިވާ ކަމަށެވެ. އެގޮތުން ސަރުކާރުން މަސައްކަތް ކުރަމުން ދަނީ މާލޭގެ ސްކޫލްތަކާއި އަތޮޅުތެރޭގެ ސްކޫލްތައް ތަފާތުނުކޮށް ކުރިއެރުން ގެނަސްދިނުމަށްކަމަށް ވަޒީރު ވިދާޅުވިއެވެ.

އަދި ފާއިތުވެދިޔަ ދެ އަހަރުގެ ތެރޭގައި ސްކޫލުތައް މަރާމާތު ކުރުމާއި، ޢުމްރާނީ ގޮތުން ސްކޫލުތަކަށް ގެންނަންޖެހޭ ބަދަލުތައް ގެނައުމުގައި މުހިންމު މަސައްކަތްތަކެއް ކުރެވިފައިވާކަން ވަޒީރު ފާހަގަކުރެއްވިއެވެ. 

ވަޒީރު ވިދާޅުވީ، ރާއްޖޭގެ ތަޢުލީމީ ނިޒާމު ހަރުދަނާ ކުރުމަށް ކުރާ މަސައްކަތްތަކުގެ ތެރެއިން މިހާރުވެސް ހުޅުމާލެ ދެވަނަ ފިޔަވަހީގައި އިތުރު ސްކޫލެއް ތަރައްޤީ ކުރުމުގެ މަސައްކަތް ކުރަމުންދާ ކަމަށެވެ.

އެގޮތުން އެ ސްކޫލްގެ ކޮންސެޕްޓް ފައިނަލްކޮށް ޑިޒައިން މަރުހަލާ ފަށާފައިވާކަމަށް ވަޒީރު ވިދާޅުވިއެވެ.

ހުޅުމާލޭ ފޭސް ދޭއްގައި މިއަދު ހުޅުވި ޝަހީދު ޢަލީ ސްކޫލަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން، ރަޝީދު ކާޕެންޓްރީ ކޮންސްޓްރަކްޝަން (އާރުސީސީ) އާ ހަވާލުކޮށްގެން 2023 ވަނަ އަހަރުގެ ޑިސެމްބަރު މަހުގެ ތެރޭގައި ފެށި މަސައްކަތެކެވެ. 

އެ ސްކޫލުގައި މަލްޓިޕާޕަސް ހޯލަކާއި، ޒަމާނީ ވަޞީލަތްތަކުގެ އިތުރުން ޓާފްދަނޑަކާއި އިންޑޯ ކުޅިވަރުތައް ކުޅޭވޭނެ އިންތިޒާމްތައް ވަނީ ހަމަޖައްސަވާފައެވެ. ހަމަ އެއާއެކު، 400 ކުދިންގެ ޖާގައިގެ އޮޑިޓޯރިއަމަކާއި، ލައިބްރަރީ އާއި، ކޮމްޕިއުޓަރު ލެބާއި، 3 ސައިންސް ލެބާއި، އިންޑޯ ހޯލަކާއި، ބޭރުގައިވެސް ކުޅިވަރު ކުޅޭވޭނެ އިންތިޒާމްތައް ވަނީ ހަމަޖައްސާފައެވެ.

މިއީ ހުޅުމާލެ ދެވަނަ ފިޔަވަހީގައި ތަރައްޤީކުރި ދާއިމީ 2 ވަނަ ސުކޫލަށްވީއިރު، މި ސްކޫލަކީ 1،500 ކުދިންގެ ޖާގައިގެ ސްކޫލެއްކަމަށް ތަޢުލީމީ ވުޒާރާއިން ވިދާޅުވެއެވެ.