ޝަރުޢީ ދާއިރާގެ މާލީ މިނިވަންކަން ކަށަވަރުކުރުމަށް ޚާއްޞަ އުސޫލެއް އެކުލަވާލައި ގެޒެޓްކޮށްފި

ރާއްޖޭގެ ޝަރުޢީ ދާއިރާގެ މިނިވަންކަން ކަށަވަރުކޮށްދެއްވައި، އެ ދާއިރާގެ ހިންގުމަށް މިނިވަން ނިޒާމެއް ގެނައުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ތަސައްވަރާ އެއްގޮތަށް، 'ޝަރުޢީ ދާއިރާގެ ގުޅުންހުރި މާލީ ކަންކަމުގައި ޢަމަލުކުރާނެ ގޮތުގެ އުސޫލު' މިނިސްޓްރީ އޮފް ފައިނޭންސްއިން މިއަދު ޝާއިއުކޮށްފިއެވެ.

މި އުސޫލަކީ ޢަދުލު އިންސާފުގެ ދާއިރާއަށް ދައުލަތުގެ ބަޖެޓުން ކަނޑައަޅާ ފައިސާ ރޭވުމާއި، ދޫކުރުމާއި، ބެލެހެއްޓުމުގެ އިތުރުން ރިޕޯޓްކުރުމަށްޓަކައި އެ ދާއިރާއަށް ޚާއްޞަ އޮނިގަނޑެއް އެކަށައެޅުމުގެ މަޤްޞަދުގައި އެކުލަވާލާފައިވާ އުސޫލެކެވެ. ދައުލަތުގެ މާލިއްޔަތު ޤާނޫނާ އެއްގޮތްވާ ގޮތުގެ މަތިން އެކުލަވާލި މި އުސޫލުގެ ސަބަބުން، ދައުލަތުގެ މާލީ ނިޒާމުގެ ތެރޭގައި އެއް މިންގަނޑުތަކެއް ހިފެހެއްޓުމާއެކު، ޝަރުޢީ ދާއިރާގެ މަސައްކަތްތަކަށް ބޭނުންވާ ޚާއްޞަ އިންތިޒާމުތަކަށް މަގުފަހިވެގެންދާނެއެވެ.

ބަޖެޓު ކަނޑައެޅުމާއި އާމްދަނީގެ އިންސައްތަ

މި އުސޫލުގައިވާ ގޮތުން، ކޮންމެ އަހަރަކު ވެސް ރައްޔިތުންގެ މަޖިލީހުން ފާސްކުރާ ދައުލަތުގެ ބަޖެޓުގައި ޝަރުޢީ ދާއިރާއަށް ބޭނުންވާ ފައިސާ ހިމަނަންވާނެއެވެ. އަދި ކޮންމެ އަހަރެއް ފެށުމުގައި، ދައުލަތަށް ލިބޭނެކަމަށް އަންދާޒާކުރާ އާމްދަނީގެ %2 އަށްވުރެ މަދުނޫން މިންވަރެއް ޝަރުޢީ ދާއިރާއަށް ކަނޑައަޅަންޖެހެއެވެ. ނަމަވެސް، ވަކި ކަމަކަށް ޚާއްޞަކޮށްފައިވާ އާމްދަނީއާއި އަލަށް ތަޢާރަފުކުރާ އާމްދަނީގެ ފިޔަވަޅުތަކުން ލިބޭ ފައިސާ މި އިންސައްތަ ހިސާބުކުރުމަކު ނުހިމެނޭނެއެވެ.

މާލީ މުޢާމަލާތްތަކާއި ޚާއްޞަ އެކައުންޓް

ޝަރުޢީ ދާއިރާއަށް ދެވޭ 'ޖުޑީޝަރީ ސެކްޓޯރަލް ގްރާންޓް' އެހީ ލިބުމާއި ޚަރަދުކުރުން ކުރިއަށްގެންދަންވާނީ މޯލްޑިވްސް މަނިޓަރީ އޮތޯރިޓީ (އެމް.އެމް.އޭ) ގައި ހުޅުވާފައިވާ ޚާއްޞަ އެކައުންޓެއް މެދުވެރިކޮށެވެ. މި ހުރިހާ މުޢާމަލާތްތަކެއް ހިންގަންވާނީ ދައުލަތުގެ ޕަބްލިކް އެކައުންޓިންގ ސިސްޓަމް މެދުވެރިކޮށް ކަމަށްވުމުން، މާލީ ކަންކަން ކޮންޓްރޯލްކުރުމާއި ތަފްސީލު ހޯދުމަށް ފަސޭހަވެގެންދާނެއެވެ.

ބަޖެޓު ތައްޔާރުކުރުމާއި އިޖުރާއަތްތައް

ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީ.ޖޭ.އޭ) އިން ކޮންމެ އަހަރެއްގެ ސެޕްޓެމްބަރު 30 ގެ ކުރިން މާލީ ވުޒާރާއަށް ބަޖެޓު ހުށަހަޅަންޖެހެއެވެ. ބަޖެޓު ޑެފިސިޓްވާ ޙާލަތްތަކުގައި ޚަރަދުތައް ހުންނަންވާނީ ލިބޭނެކަމަށް ލަފާކުރާ ޖުމްލަ އާމްދަނީއާއި ބޭންކް ބެލެންސްއަށްވުރެ އިތުރުނުވާ މިންވަރެއްގައެވެ. މަޝްރޫޢުތަކަށް ފައިސާ ހޯދުމާއި ސިޔާސަތުތައް އެކަށައެޅުމުގެ ޒިންމާ ޗީފް ޖުޑީޝަލް އެޑްމިނިސްޓްރޭޓަރު އުފުއްލަވާއިރު، ބަޖެޓުން ބޭރުން ކުރަންޖެހޭ ޚަރަދެއް ކުރިމަތިވެއްޖެނަމަ ސަޕްލިމެންޓްރީ ބަޖެޓެއް ފާސްކުރަންޖެހެއެވެ.

މަޝްރޫޢުތަކާއި މުވައްޒަފުންގެ ކަންކަން

ޝަރުޢީ ދާއިރާގެ ތަރައްޤީގެ މަޝްރޫޢުތަކަށް (ޕީ.އެސް.އައި.ޕީ) ޚަރަދުކުރާނީ ސެކްޓޯރަލް ގްރާންޓްގެ ތެރެއިންނެވެ. އަދި މުވައްޒަފުންގެ މުސާރައާއި އިނާޔަތްތައް ދިނުމުގައި ޕޭ ކޮމިޝަންގެ މިންގަނޑުތަކަށާއި ވަޒީފާއާބެހޭ ޤާނޫނަށް ޢަމަލުކުރަންޖެހެއެވެ. މީގެ އިތުރުން، ކުއްޔާއި ބިލްތައް ފަދަ މުހިންމު ޚަރަދުތަކަށް ފައިސާ ހުރިކަން ކަށަވަރުނުކޮށް އިތުރު ޚަރަދުތަކެއް ނުކުރުމަށް އުސޫލުގައި ބާރުއަޅާފައިވެއެވެ.

ދެފުށް ފެންނަ ނިޒާމެއް

ދެފުށް ފެންނަ ގޮތަށް ކަންކަން ހިންގުމަށްޓަކައި، ކޮންމެ މަހަކު ކުރެވޭ ޚަރަދުތަކުގެ ތަފުސީލު އެ މަސް ނިމުމުގެ ކުރިން އާންމުކުރަންޖެހެއެވެ. އަދި ޚަރަދުގެ ރިޕޯޓު ޖެހިގެން އަންނަ މަހުގެ 15 ގެ ކުރިން މާލީ ވުޒާރާއަށް ހުށަހަޅަންޖެހެއެވެ.

މި އައު ބަދަލާއެކު ދިވެހިރާއްޖޭގެ ޖުޑިޝަރީގެ މާލީ މިނިވަންކަން ކަށަވަރުވެ، ބަޖެޓު ތަންފީޒުކުރުމާއި ރިޕޯޓުކުރުމުގެ ނިޒާމު ކުރިއަށްވުރެ ހަރުދަނާވެގެންދާނެ ކަމަށް ބެލެވެއެވެ.