ނަފުރަތު ފަތުރާ ކަމުގެ ތުހުމަތުގައި އިސްރާއީލުގެ އިންފްލުއެންސަރެއްގެ ވިސާ އޮސްޓްރޭލިއާއިން ކެންސަލްކޮށްފި

އިސްލާމްދީނާ ދެކޮޅަށް ކެމްޕޭން ކުރަމުންދާ އިސްރާއީލުގެ ސޯޝަލް މީޑިއާ އިންފްލުއެންސަރެއް ކަމަށްވާ ސެމީ ޔަހޫދު، ނަފުރަތު ފެތުރުމަށް މަސައްކަތް ކުރާ ކަމަށް ބުނެ އޭނާގެ ވިސާ އޮސްޓްރޭލިއާ ސަރުކާރުން ކެންސަލްކޮށްފިއެވެ.

އޮސްޓްރޭލިއާގެ ހޯމް އެފެއާޒް މިނިސްޓަރު ޓޯނީ ބާކް ވިދާޅުވީ، ނަފުރަތު ފެތުރުމަކީ އެ ގައުމަށް ޒިޔާރަތް ކުރުމަށް އޮތް ރަނގަޅު ސަބަބެއް ނޫން ކަމަށެވެ.

ޔަހޫދުގެ ވިސާ ކެންސަލްކޮށްފައިވަނީ އޭނާ އިސްރާއީލުން ފުރަން ތިން ގަޑިއިރަށް ވެފައި ވަނިކޮށެވެ. އޭގެ ކުޑަވަގުތުކޮޅެއް ކުރިން އޭނާ ވަނީ އެކްސްގައި އިސްލާމްދީނަކީ "މުޑުދާރު އައިޑިއޮލޮޖީއެއް" ކަމަށް ސިފަކޮށް، ދީނާ ދެކޮޅަށް ބަދުބަސް ބުނެފައެވެ. އަދި އޭނާ ވަނީ އެމެރިކާގެ މުސްލިމް މެންބަރު އިލްހާން އުމަރު ޑީޕޯޓް ކުރުމަށާއި، ފަލަސްތީނުގެ ރެފިއުޖީންނަށް އެހީވާ ޔޫއެންއާރުޑަބްލިއުއޭ (UNRWA) އަށް ވެސް ފާޑުކިޔާފައެވެ.

މިނިސްޓަރު ބާކް ވިދާޅުވީ އޮސްޓްރޭލިއާއަށް ޒިޔާރަތް ކުރަން ބޭނުންވާ ފަރާތްތަކުން ރަނގަޅު މަގްސަދެއްގައި ސައްހަ ވިސާއަށް އެދެން ޖެހޭނެ ކަމަށެވެ. އޮސްޓްރޭލިއާއިން ވަނީ މި މަހުގެ ކުރީކޮޅު އެ ގައުމުގެ ނަފުރަތުގެ ކުށްތަކާ ބެހޭ ގާނޫނުތައް އިތުރަށް ހަރުކަށިކޮށްފައެވެ. މިއީ ސިޑްނީގެ ބޮންޑައި ބީޗުގައި ދިން ހަމަލާއަކާ ގުޅިގެން ގެނައި ބަދަލުތަކެކެވެ.

މީގެ ކުރިން ވެސް އޮސްޓްރޭލިއާއިން ވަނީ އިސްލާމްދީނާ ދެކޮޅަށް ވާހަކަދައްކާ އިސްރާއީލުގެ އެކްޓިވިސްޓުންނާއި ސިޔާސީ ބޭފުޅުންގެ ވިސާ ކެންސަލްކޮށްފައެވެ. އޭގެ ތެރޭގައި ހިލޭލް ފުލްޑް އާއި އިސްރާއީލުގެ ކޯލިޝަން ސަރުކާރުގެ މެންބަރު ސިމްޗާ ރޮތްމަން ހިމެނެއެވެ. މި ފިޔަވަޅުތައް އަޅަނީ މުޖުތަމައުގެ ތެރޭގައި ބައިބައިވުން އުފެދިދާނެތީ ކަމަށް ސަރުކާރުން ބުނެއެވެ.

ވިސާ ކެންސަލް ކުރުމާ ގުޅިގެން ޔަހޫދު ބުނީ އޭނާ އޮސްޓްރޭލިއާއަށް ވަނުން މަނާކުރީ ގާނޫނާ ހިލާފަށް ކަމަށާއި، އެ މައްސަލާގައި ފިޔަވަޅު އަޅާނެ ކަމަށެވެ. "މިއީ އަނިޔާވެރިކަމާއި، ސެންސަރުކުރުމާއި އަދި ކޮންޓްރޯލް ކުރުމުގެ ވާހަކައެއް،" އޭނާ އެކްސްގައި ލިޔެފައިވެއެވެ. އޭނާ އިސްރާއީލުން އަބޫދާބީއަށް ދަތުރުކުރި ނަމަވެސް، މެލްބަންއަށް ދާން އޮތް ފްލައިޓަށް އެރުން ވަނީ ހުރަސް އަޅާފައެވެ.

ޔަހޫދު އޮސްޓްރޭލިއާއަށް ދައުވަތު ދިން ކޮންޒަވޭޓިވް އޮސްޓްރޭލިއަން ޖޫވިޝް އެސޯސިއޭޝަނުން ވަނީ ބޮޑުވަޒީރު އެންތަނީ އަލްބަނީޒްގެ ސަރުކާރުން ނިންމި މި ނިންމުން ހަރުކަށި އިބާރާތުން ކުށްވެރިކޮށްފައެވެ.