ނަރުހުންގެ ރަޖިސްޓްރޭޝަނަށް ބަދަލުތަކެއް, ސެޓްފިކެޓް ނެތްނަމަ ދެން ދޫކުރާނީ ވަގުތީ ރަޖިސްޓްރޭޝަނެއް

ދިވެހި ނަރުހުން އަލަށް ރަޖިސްޓްރީވުމަށް ހުށަހަޅާއިރު، ކޯސް ނިންމިކަމުގެ ލިޔުން ހުށަހެޅި ނަމަވެސް އަސްލު ކޮލިފިކޭޝަން ސެޓްފިކެޓް ހުށަނާޅާ ފަރާތްތަކަށް ދޫކުރާނީ ވަގުތީ ރަޖިސްޓްރޭޝަނެއް ކަމަށް މޯލްޑިވްސް ނާސިން އެންޑް މިޑްވައިފަރީ ކައުންސިލުން ނިންމައިފިއެވެ.

މި ބަދަލު ގެނައުމަށް ނިންމާފައިވަނީ އަންނަ މަހުގެ ފުރަތަމަ ދުވަހުން ފެށިގެންނެވެ. މޯލްޑިވްސް ނާސިން އެންޑް މިޑްވައިފަރީ ކައުންސިލުން ވިދާޅުވި ގޮތުގައި، މިހާރު އަމަލުކުރަމުންދާ އުސޫލުގެ ދަށުން ކޯސް ނިންމިކަމުގެ ލިޔުމަށް ބިނާކޮށް ދާއިމީ ރަޖިސްޓްރޭޝަނަކާއެކު ޕްރޮވިޝަނަލް ލައިސަންސެއް ދޫކުރެއެވެ. ނަމަވެސް، ގިނަ ފަރާތްތަކަކުން ކޯސް ނިންމިކަމުގެ ލިޔުން ހުށަހެޅި ނަމަވެސް، ފަހުން ކޮލިފިކޭޝަން ސެޓްފިކެޓް ހުށަހަޅަމުން ނުދާކަން އެ ކައުންސިލަށް ވަނީ ފާހަގަކުރެވިފައެވެ.

އައު އުސޫލަށް އަމަލުކުރަން ފެށުމުން، ކޯސް ނިންމިކަމުގެ ލިޔުމާއެކު ރަޖިސްޓްރީވުމަށް ހުށަހަޅާ ފަރާތްތަކަށް ދޫކުރެވޭނީ:

• ޕްރޮވިޝަނަލް (ވަގުތީ) ރަޖިސްޓްރޭޝަން
  
• ޕްރޮވިޝަނަލް (ވަގުތީ) ޕްރެކްޓިސިންގ ލައިސަންސް

މީގެ އިތުރުން، ކޮމްޕިޓެންސީ އިމްތިހާނުން ފާސްވެގެން ލައިސަންސް ހޯދުމަށް ހުށަހަޅާ ނަރުހުންނާއި، އަދި އިތުރު ކޮލިފިކޭޝަނެއް ރަޖިސްޓްރީގައި ހިމަނަން އެދޭ ނަރުހުންވެސް، ކޯސް ނިންމިކަމުގެ ލިޔުމުގެ ބަދަލުގައި ރަސްމީ ކޮލިފިކޭޝަން ސެޓްފިކެޓް ހުށަހަޅަންޖެހޭނެ ކަމަށް އެ ކައުންސިލުން ވަނީ ބަޔާންކޮށްފައެވެ.

މި ނިންމުމަކީ ނަރުހުންގެ ފެންވަރު ހިފެހެއްޓުމަށާއި، ރަޖިސްޓްރޭޝަންގެ ކަންކަން އިތުރަށް ހަރުދަނާކުރުމަށް ނިންމި ނިންމުމެއް ކަމަށް ބެލެވެއެވެ. މި ބަދަލަށް އަމަލުކުރަން ފެށުމުން، ދާއިމީ ރަޖިސްޓްރޭޝަން ލިބޭނީ ހަމައެކަނި ރަސްމީ ސެޓްފިކެޓް ހުށަހަޅާ ފަރާތްތަކަށް އެކަންޏެވެ.