ބީއެމްއެލްގެ "އެފޯޑަބަލް ހައުސިންގ" 5 މަޝްރޫއެއްގެ އަމަލީ މަސައްކަތް ފަށައިފި

ބޭންކް އޮފް މޯލްޑިވްސް (ބީއެމްއެލް) ގެ ސަބްސިޑަރީ ކުންފުންޏެއް ކަމަށްވާ "އެފޯޑަބަލް ހޯމް ލީސިންގ" އިން ހިންގާ ބޯހިޔާވަހިކަމުގެ ފަސް މަޝްރޫއެއްގެ އަމަލީ މަސައްކަތް ރަސްމީކޮށް ފަށައިފިއެވެ.

ހުޅުމާލޭގައި ބޭއްވި ޚާއްސަ ރަސްމިއްޔާތެއްގައި މި މަސައްކަތްތައް ފައްޓަވައިދެއްވީ އިމާރާތްކުރުމާއި ގެދޮރުވެރިކަމާއި ބިނާރާބެހޭ ވަޒީރު ޑރ. ޢަބްދުﷲ މުއްޠަލިބާއި، ބީއެމްއެލްގެ ޗެއާޕަރސަން އަޙްމަދު ޢަލީ ޙަބީބުގެ އިތުރުން އެ ބޭންކުގެ ސީއީއޯ އަދި މެނޭޖިންގ ޑިރެކްޓަރު މުޙައްމަދު ޝަރީފެވެ.

މި މަޝްރޫއަކީ މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އެކުލަވާލާފައިވާ އިންކްލޫސިވް ނޭޝަނަލް އެފޯޑަބަލް ހައުސިންގ ސިޔާސަތުގެ މަގުސަދުތައް ހާސިލްކުރުމަށްޓަކައި ބީއެމްއެލްގެ ދަށުން އުފެއްދި ކުންފުންޏަކުން ކުރިއަށްގެންދާ މުހިންމު މަސައްކަތެކެވެ.

މި ރަސްމިއްޔާތުގައި ވާހަކަދައްކަވަމުން ވަޒީރު ޑރ. މުއްޠަލިބު ވިދާޅުވީ، މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދުރުވިސްނޭ ސިޔާސަތުގެ ދަށުން، އިޤްތިސާދީ ގޮންޖެހުންތަކާ އެކުވެސް ރައްޔިތުންނަށް ބޯހިޔާވަހިކަން ފޯރުކޮށްދިނުމަށް އެޅުނު މުހިންމު ފިޔަވަޅެއް ކަމަށެވެ. އަދި ބީއެމްއެލުން މާލެ ސަރަޙައްދުގައި ތަރައްގީކުރާ 3،260 ހައުސިންގ ޔުނިޓަކީ ސަރުކާރުގެ ފަސް އަހަރުގެ ދައުރުގެ ތެރޭގައި މަސައްކަތް ފަށައި، ނިންމައި، ވެރިފަރާތްތަކާ ހަވާލުކުރެވޭނެ ފުރަތަމަ މަޝްރޫޢަށް ވެގެންދާނެ ކަމަށްވެސް ވަޒީރު ފާހަގަކުރެއްވިއެވެ.

ބީއެމްއެލްގެ ސީއީއޯ މުޙައްމަދު ޝަރީފް ވިދާޅުވި ގޮތުގައި، މި މަޝްރޫއުތައް ހަވާލުކޮށްފައިވަނީ ބައިނަލްއަގުވާމީ މިންގަނޑުތަކާ އެއްގޮތަށް ބަލައި އިވެލުއޭޓްކުރުމަށްފަހު ހޮވުނު ރާއްޖެއާއި ރާއްޖޭން ބޭރުގެ ކުންފުނިތަކާއެވެ. އޭގެ ތެރޭގައި ރާއްޖޭގެ އަމީން ކޮންސްޓްރަކްޝަން، އެފްޑަބްލިއު ކޮންސްޓްރަކްޝަން އަދި ރަޝީދު ކާޕެންޓްރީ (އާރްސީސީ) ހިމެނެއެވެ. ބޭރުގެ ކުންފުނިތަކުގެ ތެރޭގައި ހިމެނެނީ ޗައިނާގެ ބެއިޖިން އަރބަން ކޮންސްޓްރަކްޝަން ގްރޫޕާއި ޗައިނާ މެޝިނަރީ އިންޖީނިއަރިންގ ކޯޕަރޭޝަނެވެ.

ޝަރީފް އިތުރަށް ވިދާޅުވީ ބޭންކުން އަބަދުވެސް ހައުސިންގ ސެކްޓާއަށް ބޮޑު އިސްކަމެއްދޭ ކަމަށެވެ. އެގޮތުން މިދިޔަ އަހަރުގެ ނިޔަލަށް މި ދާއިރާއަށް ދޫކޮށްފައިވާ ލޯނުގެ އަދަދު 5.4 ބިލިޔަން ރުފިޔާއަށް އަރާއިރު، ހަމައެކަނި މިދިޔަ އަހަރުވެސް 2.1 ބިލިޔަން ރުފިޔާ ދިވެހި ކުންފުނިތަކާއި ފަރުދުންނަށް ދޫކޮށްފައިވާނެ ކަމަށް އޭނާ ވިދާޅުވިއެވެ.

މި މަޝްރޫއުގެ ދަށުން ހުޅުމާލޭގެ ފޭސް 1، ފޭސް 3 އަދި ވިލިމާލޭގައި 3،200 އަށްވުރެ ގިނަ ހައުސިންގ ޔުނިޓް ބިނާކުރެވޭނެއެވެ. ބީއެމްއެލުން ބުނާ ގޮތުގައި މި ޔުނިޓްތަކަކީ ކުޑަ ކުއްޔެއްގައި ދޫކުރެވޭ، އަދި ކުލި ދައްކާ ނިމުމުން މިލްކުވާނެ ތަންތަނެވެ. މި މަޝްރޫއުތައް އެއްކޮށް ނިންމާލެވޭނެ ކަމަށް ލަފާކުރެވެނީ 2028 ވަނަ އަހަރުގެ ޖުލައި މަހުގެ ނިޔަލަށެވެ.