ހިމާލަޔާގެ ގެއްލުންތަކަށް ފަންޑެއް ގާއިމްކުރުމަށް ރާއްޖެއިން ގޮވާލައިފި

މޫސުމަށް އަންނަ ބަދަލުތަކުގެ ސަބަބުން ހިމާލަޔާ ފަރުބަދަތަކަށް ލިބޭ ގެއްލުންތަކަށް ބަދަލު ދިނުމަށް ފަންޑެއް ގާއިމްކުރުމަށް ދިވެހި ރާއްޖެއިން ބައިނަލްއަޤްވާމީ މުޖުތަމަޢުއަށް ގޮވާލައްވައިފިއެވެ.

މިހާރު ކުރިއަށްދާ ކޮޕް 29 ގެ ސައިޑް އިވެންޓެއްގައި ރާއްޖެ ތަމްސީލު ކުރައްވާ ވާހަކަފުޅުދައްކަވަމުން މިނިސްޓަރ އޮފް ކްލައިމެޓް ޗޭންޖް އެންވަޔަރަންމަންޓް، އެންޑް އެނާރޖީ،  ޠާރިޤް އިބްރާހީމް ވިދާޅުވީ  މޫސުމަށް އަންނަ ބަދަލުތަކުގެ ސަބަބުން ހިމާލަޔާ ފަރުބަދަތަކަށް ލިބެމުންދާ ގެއްލުންތަކަކީ ކަންބޮޑުވާންޖެހޭ މައްސަލައެއް ކަމަށާއި، މިކަމަށް އަވަސް ހައްލެއް ހޯދުމަކީ މުހިންމު ކަމެއް ކަމުގައެވެ.

"މައުންޓެއިންސް އިން ޕެރިލް: އެޑްރެސިންގ ލޮސް އެންޑް ޑެމޭޖް އިން ދަ ހިމާލަޔާސް" ގެ ނަމުގައި ބޭއްވުނު މި ސައިޑް އިވެންޓްގައި މިފަދަ ގެއްލުންތަކަށް ބަދަލު ދިނުމަށްޓަކައި ފަންޑެއް ގާއިމްކޮށް، އެ ފަންޑު އަވަހަށް ހިންގަން ފެށުމަށް ބައިނަލްއަޤްވާމީ މުޖުތަމަޢުއަށް ގޮވާލައްވާފައެވެ.

މޫސުމަށް އަންނަ ބަދަލުތަކުގެ ސަބަބުން އެންމެ ބޮޑަށް އަސަރުކުރާ ޤައުމުތަކުގެ ތެރޭގައި ރާއްޖެ ހިމެނޭއިރު، މިފަދަ ގެއްލުންތަކަށް ބަދަލު ދިނުމުގެ މުހިންމުކަން ރާއްޖެއިން އަބަދުވެސް ފާހަގަކުރަމުން އަންނަ ކަމަށް މިނިސްޓަރ ޠާރިޤް ވިދާޅުވިއެވެ.

ކޮޕް 29 ގައި ރާއްޖެއިން ބައިވެރިވެ، މޫސުމަށް އަންނަ ބަދަލުތަކާ ގުޅޭ ގޮތުން ރާއްޖޭގެ ކަންބޮޑުވުންތައް ފާޅުކުރަމުންދާއިރު، މި ބައްދަލުވުމުގައި އިތުރު ގިނަ ޤައުމުތަކަކުން ވެސް މިފަދަ ގެއްލުންތަކަށް ބަދަލު ދިނުމުގެ މުހިންމުކަން ފާހަގަކޮށްފައިވެއެވެ.