ތައްޓާއެކު ޤައުމީ ފުޓްސަލް ޓީމު އައުމުން ހޫނު މަރުޙަބާއެއް ކިޔައިފި

ސައުތު އޭޝިއަން ފުޓުބޯޅަ ފެޑެރޭޝަން (ސާފް) އިން ފުރަތަމަ ފަހަރަށް ބޭއްވި ސާފް ފުޓްސަލް ޗެމްޕިއަންޝިޕްގައި ވާދަކޮށް، ސައްތައިން ސައްތަ ރިކޯޑަކާއެކު މުބާރާތުގެ ޗެމްޕިއަންކަން ހޯދި ރާއްޖޭގެ ފަޚުރުވެރި ޤައުމީ ފުޓްސަލް ޓީމު މާލެ އައުމުން ހޫނު މަރުޙަބާއެއް ކިޔައިފިއެވެ.

އަންގާރަ ދުވަހުގެރޭ ޤައުމީ ޓީމު މާލެ އައުމުން ވެލާނާ އިންޓަނޭޝަނަލް އެއާޕޯޓުގެ ވީއައިޕީން ޓީމަށް މަރުހަބާ ދެންނެވީ ކުޅިވަރާއި ހަށިހެޔޮކަމާއި ބެހޭ ވަޒީރު ޢަބްދުﷲ ރާފިޢު އާއި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސް އަޙްމަދު ޠާރިޤްއެވެ. މީގެ އިތުރުން ކުޅިވަރު ޢާއިލާ އާއި ފުޓްސަލްއަށް ލޯބިކުރާ ގިނަ ފަރާތްތަކަކުން ވަނީ އެއާރޕޯޓަށް އެއްވެ ޓީމަށް ހޫނު މަރުހަބާއެއް ކިޔާފައެވެ.

މީގެ އިތުރުން ކުޅުންތެރިންގެ އާއިލާތަކުން ވެސް ވީއައިޕީއިން ޓީމަށް މަރުޙަބާ ކިޔާފައިވެއެވެ.

ޓީމު މާލެ އައުމަށްފަހު، އަމީނީ މަގާއި މަޖީދީ މަގުން، އާންމުންނަށް ފެންނަ ގޮތަށް ޓްރޮފީއާއެކު ދަތުރުކޮށް އާޓިފިޝަލް ބީޗު ސަރަހައްދަށް ދިޔައިރު، އެތަނަށް ވެސް އާންމުންގެ ގިނަ ބަޔަކު ޓީމަށް މަރުޙަބާ ކިޔުމަށް އެއްވެ ތިއްބެވެ. 

އާންމުންނަށް ބައިވެރިވެވޭގޮތަށް އާރޓިފިޝަލް ބީޗުގައި ކުރިއަށްގެންދިޔަ ޚާއްޞަ ހަރަކާތުގެ ތެރެއިން ހަވާއެރުވުމާއި ބޮޑުބެރުގެ ހަރަކާތްތައް ކުރިޔަށް ގެންދިޔައެވެ. އަދި ޤައުމީ ފުޓްސަލް ޓީމުގެ ކުޅުންތެރިންނާއި ޓްރޮފީއާއެކު ފޮޓޯ ނެގުމުގެ ފުރުސަތު ވެސް ދީފައިވެއެވެ.

އާރޓިފިޝަލް ބީޗުގައި ކުރިޔަށްދިޔަ ހަރަކާތުގައި ކުޅިވަރާ ބެހޭ ވަޒީރު ޢަބްދުﷲ ރާފިޢު ވިދާޅުވީ، ޤައުމީ ޓީމުން ހޯދާ ކޮންމެ ކާމިޔާބީއެއްގައި ސަޕޯޓަރުންގެ ހިއްސާ މުހިންމު ދައުރެއް އަދާކުރާކަމަށެވެ.

ލީގު އުސޫލުން ކުޅުނު މި މުބާރާތުގެ ތަށި ރާއްޖޭގެ ޤައުމީ ފުޓްސަލް ޓީމުން ޔަޤީން ކުރީ ބާކީ އެއް މެޗު އޮއްވައެވެ. މުޅި މުބާރާތުގައި ދިވެހި ޓީމުން 28 ގޯލު ކާމިޔާބުކުރިއިރު، ކެޕްޓަން މުޙައްމަދު އިމްރާން ވަނީ ކޮންމެ މެޗެއްގައި ވެސް ގޯލުޖަހާފައެވެ.