ދިވެހި ލީގުގައި މިރޭ ނިއު ރޭޑިއަންޓު މޮޅުނުވެއްޖެނަމަ މާޒިޔާއަށް ލީގު ކަށަވަރުވާނެ

ދިރާގު ދިވެހި ޕްރިމިއަރ ލީގުގައި މިރޭ މާޒިޔާ ސްޕޯޓްސް އެންޑް ރެކްރިއޭޝަން އާއި ނިއު ރޭޑިއަންޓް ބައްދަލުކުރާ މެޗުން މާޒިޔާއަށް ޕޮއިންޓެއް ހޯދުނަސް، އެ ޓީމަށް ލީގު ކަށަވަރުވާނެއެވެ.

ލީގުގައި ކޮންމެ ޓީމަކަށް ވެސް ބާކީ ދެ މެޗު އޮތްއިރު، މާޒިޔާ ވަނީ 44 ޕޮއިންޓު ހޯދާފައެވެ. އަދި ދެވަނައިގައި އޮތް އޮޑި ސްޕޯޓްސް ކްލަބަށް ލިބިފައި ވަނީ 38 ޕޮއިންޓެވެ. އެހެންކަމުން މިރޭ ނިއު ރޭޑިއަންޓާ ދެކޮޅަށް ކުޅޭ މެޗު އެއްވަރު ވިޔަސް، މާޒިޔާއަށް ލީގު ޔަޤީންވާނެއެވެ.

ނަމަވެސް މިރޭގެ މެޗުން މާޒިޔާ ބަލިވެއްޖެނަމަ، ލީގުގެ ފަހު ހަފްތާ ވަރަށް ފޯރިގަދަވާނެއެވެ. ފަހު މެޗުގައި މާޒިޔާއިން ނިކުންނާނީ ދެވަނައިގައި އޮތް އޮޑިއާ ދެކޮޅަށެވެ. އެ މެޗުގެ ކުރިން މިއަދު ހަވީރު ބުރު ސްޕޯޓްސް ކްލަބާ ދެކޮޅަށް ކުޅޭ މެޗު ކާމިޔާބު ކުރުމަށްފަހު، ފަހު މެޗުގައި އޮޑިން މާޒިޔާ ބަލިކޮށްފިނަމަ، މާޒިޔާ އާއި އޮޑި ޕޮއިންޓުގެ ގޮތުން ހަމަހަމަވާނެއެވެ.

އެހެންނަމަވެސް އޮޑިއަށް ލީގު ހޯދޭނީ މި ދެ މެޗުން ގިނަ ގޯލުތަކެއް ވެސް ޖަހައިގެންނެވެ. އެއީ މިވަގުތު މާޒިޔާއަށް އޮތް ފައިދާ ގޯލުގެ އަދަދު އިތުރުވުމުންނެވެ. ލީގުގައި 17ވަނަ މެޗަށް ނިކުންނައިރު މާޒިޔާގެ ފައިދާ ގޯލުގެ އަދަދަކީ 43 އެވެ. އަދި އޮޑި ސްޕޯޓްސްގެ އޮތީ 29 ގޯލާއެކުއެވެ. 

ލީގުގެ ފުރަތަމަ ބުރުގައި މާޒިޔާ އާއި ނިއު ރޭޑިއަންޓު ބައްދަލުކުރި މެޗު 2-1އިން ކާމިޔާބުކުރީ މާޒިޔާއެވެ. އަދި އޮޑިއާ ދެކޮޅަށް ކުޅުނު މެޗު ވެސް ކާމިޔާބުކުރި މާޒިޔާއެވެ. އެއީ 1-0އިންނެވެ. 

_{ލީގުގެ ފުރަތަމަ ބުރުގައި ނިއު ރޭޑިއަންޓުގެ ކޮޅަށް ގޯލު ޖެހުމަށްފަހު މާޒިޔާގެ ހަމްޒާ މުޙައްމަދު އުފާފާޅުކުރަނީ / ފޮޓޯ: މާޒިޔާ}

މާޒިޔާއަށް މިހާތަނަށް ގެއްލިފައިވަނީ ދެވަނަ ބުރުގައި ޓީސީ ސްޕޯޓްސް ކްލަބާ ދެކޮޅަށް ކުޅުނު މެޗު އެއްވަރުވުމުން ގެއްލުނު 2 ޕޮއިންޓު އެކަންޏެވެ. 

ލީގުގައި ފަހު 2 މެޗަކީ ރެލިގޭޝަނުން ސަލާމަތްވުމަށް ކްލަބް ގްރީން ސްޓްރީޓްސް، ކްލަބް ވެލެންސިއާ އަދި ޔުނައިޓެޑް ވިކްޓަރީ (ޔޫވީ)އަށް ވެސް މުހިންމު މެޗުތަކެކެވެ. ތާވަލު މިހާރު އޮތް ގޮތުން، 11 ޕޮއިންޓާއެކު ގްރީން ސްޓްރީޓްސް އޮތީ 8ވަނައިގައެވެ. އަދި 8 ޕޮއިންޓާއެކު ވެލެންސިއާ 9ވަނައިގައި އޮތްއިރު، ފުލުގައި އޮތް ޔޫވީއަށް ލިބިފައި ވަނީ 7 ޕޮއިންޓެވެ. 

ލީގު ތާވަލުގައި އެންމެ ފުލަށްދާ ދެ ޓީމެއް އެ ޓީމެއް ނިސްބަތްވާ ރީޖަނަލް ލީގަށް ރެލިގޭޓު ވާނެއެވެ. އަދި ލީގުގެ 8ވަނަ އާއި 7ވަނަ ޓީމު ދާނީ ރެލިގޭޝަން ޕްލޭއޮފް ބުރަށެވެ. ޕްލޭއޮފްގައި ވާދަކުރާނީ އެ ދެ ޓީމާއި، ރީޖަނަލް ލީގުތަކުގެ ޗެމްޕިއަނުންނެވެ. އެއީ ނޯތު ރީޖަން، ސެންޓްރަލް ރީޖަން، ސައުތު ރީޖަން އަދި ދެވަނަ ޑިވިޝަނުގެ ޗެމްޕިއަނުންނެވެ.