ގިނަ ޢަދަދެއްގެ ދަރިވަރުންނާއެކު އޯލެވެލް އިމްތިހާން ފަށައިފި

ގިނަ ޢަދަދެއްގެ ދަރިވަރުންނާއެކު 2025 ވަނަ އަހަރުގެ އެސްއެސްސީ އަދި އޯލެވެލް އިމްތިހާން ފަށައިފި އެވެ.

2025 ވަނަ އަހަރުގެ އޯލެވެލް އިމްތިހާން ފަށާފައިވަނީ މިއަދު ހެނދުނު 9:30 ގައެވެ. މި އިމްތިހާނު މިއަދުން ފެށިގެން މާރިޗް މަހުގެ 6 ވަނަ ދުވަހުގެ ނިޔަލަށް ކުރިއަށް ދާނެއެވެ.

ތަޢުލީމީ ވުޒާރާއިން ހިއްސާކޮށްފައިވާ ތަފާސް ހިސާބުތަކުން ދައްކާގޮތުގައި އައިޖީސީއީ އޯލެވެލް އަދި އެސްއެސްސީ އިމްތިހާނުގައި މިއަހަރު ޖުމްލަ 8،218 ދަރިވަރަކު ބައިވެރިވެއެވެ. އަދި މިފަހަރުގެ އިމްތިހާނު 267 ސެންޓަރެއްގައި ކުރިއަށްދާކަމަށްވެސް އެ ވުޒާރާއިން ވިދާޅުވެފައިވާއިރު، މާލޭގައި އިމްތިހާންތައް ކުރިއަށްގެންދަނީ 21 ސެންޓަރެއްގައެވެ. ހަމަ އެއާއެކު، އަތޮޅުތަކުގެ 246 ސެންޓަރެއްގައި އިމްތިހާންތައް ކުރިއަށްދާނެކަމަށް އެ ވުޒާރާއިން ވިދާޅުވިއެވެ.

މިއީ މިދިޔަ 2025 ވަނަ އަހަރު ގްރޭޑް 10 ނިންމި ދަރިވަރުންގެ އޯ ލެވެލް އިމްތިހާނަށްވާއިރު، މިހާރު ގްރޭޑް 10 ކިޔަވަމުންދާ ދަރިވަރުންގެ އޯލެވެލް އިމްތިހާނު އޮންނާނީ މިއަހަރުގެ އޮކްޓޫބަރު/ ނޮވެމްބަރުގައެވެ.

މީގެ އިތުރުން، މި އަހަރުން ފެށިގެން އޯލެވެލް އިމްތިހާނުތައް ބާއްވާނީ ކޮންމެ އަހަރެއްގެ ވެސް އޮކްޓޫބަރު/ނޮވެމްބަރުގައިކަމަށް ތަޢުލީމީ ވުޒާރާއިން މަޢުލޫމާތުދެއެވެ.