އިޤްތިޞާދީ މައިގަނޑު ސިނާޢަތްތަކުން ވަޒީފާގެ ފުރުޞަތުތައް އިތުރުވެއްޖެ: އެމްއެމްއޭ

މިދިޔަ އަހަރުގެ ފަހު ކުއާޓާގައި ރާއްޖޭގެ އިޤްތިޞާދުގައި ހިއްސާކުރާ މައިގަނޑު ސިނާޢަތްތަކުން ވަޒީފާތަކަށް މީހުން ނެގި މިންވަރު އިތުރުވެފައިވާ ކަމަށް މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ހާމަކޮށްފިއެވެ.

އެމްއެމްއޭއިން މިކަން ހާމަކޮށްފައިވަނީ އެ އިދާރާއިން ނެރުނު ކުއާޓަލީ ބިޒްނަސް ސާވޭ ރިޕޯޓުގައެވެ. މި ސާވޭގައި ރާއްޖޭގެ އިޤްތިޞާދުގެ މައިގަނޑު 4 ސިނާޢަތެއްގައި ހަރަކާތްތެރިވާ 113 ވިޔަފާރިއަކުން މަޢުލޫމާތު އެއްކޮށްފައިވެއެވެ. މީގެ ތެރޭގައި ހިމެނެނީ މީރާއަށް އެންމެ ގިނައިން އާމްދަނީ ލިބޭ ކަމަށް ރިޕޯޓްކޮށްފައިވާ ކުންފުނިތަކެވެ.

ފަތުރުވެރިކަމުގެ ސިނާޢަތް: އެންމެ ބޮޑު ކުރިއެރުމެއް

ސާވޭއިން ދައްކާގޮތުގައި އެންމެ ބޮޑު ކުރިއެރުމެއް ހޯދާފައިވަނީ ފަތުރުވެރިކަމުގެ ސިނާޢަތުންނެވެ. ފަތުރުވެރިކަމުގެ ޕީކް ސީޒަނާ ދިމާކޮށް މި ސިނާޢަތުގެ އެމްޕްލޮއިމެންޓް އިންޑެކްސް ވަނީ 56 ޕޮއިންޓުން 57 ޕޮއިންޓަށް އުފުލިފައެވެ. އާމްދަނީއާއި މުވައްޒަފުންގެ މުސާރައަށް ކުރާ ޚަރަދުވެސް އިތުރުވެފައިވާއިރު، މިއަހަރުގެ ފުރަތަމަ ކުއާޓާގައިވެސް މި ދުވެލި ހިފަހައްޓާނެ ކަމަށް އެމްއެމްއޭއިން ލަފާކުރެއެވެ.

ވިޔަފާރިއާއި އިމާރާތްކުރުމުގެ ދާއިރާ
ހޯލްސޭލް އަދި ރީޓެއިލް ވިޔަފާރީގެ ދާއިރާގައި އާންމު ވިޔަފާރި ކުޑަކޮށް ދަށްވި ނަމަވެސް، ވަޒީފާގެ އިންޑެކްސް ވަނީ 46 އިން 69 އަށް ވަރަށް ބޮޑަށް މަތިވެފައެވެ. ހަމައެއާއެކު، އިމާރާތްކުރުމުގެ ދާއިރާގައި އައު މަޝްރޫޢުތައް އިތުރުވުމާ ގުޅިގެން އެ ދާއިރާގެ އެމްޕްލޮއިމެންޓް އިންޑެކްސް ވަނީ 29 އިން 36 އަށް އުފުލިފައެވެ.

ދަތުރުފަތުރާއި މުވާސަލާތީ ޚިދުމަތް
ދަތުރުފަތުރާއި މުވާސަލާތީ ދާއިރާގެ ވަޒީފާގެ އިންޑެކްސް 14 ޕޮއިންޓުގައި ހިފެހެއްޓިފައި ހުރި ނަމަވެސް، އެއްވެސް ވިޔަފާރިއަކުން ވަޒީފާތައް މަދުކޮށްފައި ނުވާކަން އެމްއެމްއޭއިން ފާހަގަކުރެއެވެ. ނަމަވެސް މި ދާއިރާގައި މުވައްޒަފުންނަށް ކުރާ ޚަރަދު ވަނީ އިތުރުވެފައެވެ.

ޖުމްލަގޮތެއްގައި ހުރިހާ ސިނާޢަތަކުންވެސް ވިޔަފާރީގެ ކުރިއެރުން ހޯދަމުންދާއިރު، ރައީސް ޑރ. މުޙައްމަދު މުޢިއްޒުގެ ސަރުކާރުން އިޤްތިޞާދު ކުރިއެރުވުމަށް ކުރައްވާ މަސައްކަތްޕުޅުތަކުގެ ތެރެއިން، މިއަހަރުގެ ފުރަތަމަ ކުއާޓާގައިވެސް ހުރިހާ ދާއިރާއަކުން ރަނގަޅު ނަތީޖާއެއް ފެންނާނެ ކަމަށް މަރުކަޒީ ބޭންކުން ލަފާކުރެއެވެ.