ބައެއް އަތޮޅުތަކުގެ ހުރިހާ ގޭބިސީތަކަށް މަސްދަޅު ބަހާ ނިމިއްޖެ

ސަރުކާރުން ރޯދަ މަހާ ދިމާކޮށް ރައްޔިތުންނަށް ފޯރުކޮށްދޭ "ރޯދަ ހަދިޔާ" މަސްދަޅު ކޭސް ބެހުމުގެ މަސައްކަތް އަތޮޅުތެރޭގައި ވަރަށް ބާރުދުވެލީގައި ކުރިއަށް އެބަދެއެވެ. 

ހއ. އަތޮޅަށް ބަލާއިރު، މިހާތަނަށް އެ އަތޮޅުގެ ތިން ރަށަކަށް މަސްދަޅު ފޮނުވާފައިވެއެވެ. މީގެ ތެރެއިން ހއ. މުރައިދޫގެ ގޭބިސީތަކަށް މަސްދަޅު ބަހައި މިހާރު ވަނީ އެއްކޮށް ނިންމާލާފައެވެ. އެ ރަށުގެ ޖުމްލަ 137 ގޭބިސީއަކަށް މަސްދަޅު ކޭސް ދޫކޮށްފައިވާ ކަމަށް މަޢުލޫމާތު ލިބެއެވެ.

ހދ. އަތޮޅުގައިވެސް މި މަސައްކަތް ދަނީ ވަރަށް ހަލުވިކަމާއެކު ކުރިއަށެވެ. އެގޮތުން ހދ. ފިނޭގެ 100 ގޭބިސީއަކަށާއި، ނޮޅިވަރަންފަރުގެ 350 ގޭބިސީއަކަށް މަސްދަޅު ކޭސް ބަހައި މިހާރު ވަނީ ނިންމާފައެވެ. މީގެ އިތުރުން ހދ. ނޮޅިވަރަމުގައި މަސްދަޅު ކޭސް ބެހުމުގެ މަސައްކަތް މިހާރުވެސް ދަނީ މެދުކެނޑުމެއް ނެތި ކުރިއަށްދަމުންނެވެ.

ނޫނު އަތޮޅުގެ ހާލަތަށް ބަލާއިރު، އެ އަތޮޅުގެ މީހުން ދިރިއުޅޭ ހުރިހާ ރަށަކަށް ބޭނުންވާ މަސްދަޅު މިހާރު ވަނީ ފޮނުވައި ނިމިފައެވެ. އަދި ޅ. އަތޮޅުގެ ހަތަރު ރަށަކަށް މަސްދަޅު ފޮނުވާފައިވާއިރު، އެ އަތޮޅު އޮޅުވެލިފުށީގެ 137 ގޭބިސީއަކަށް މަސްދަޅު ބަހައި މިހާރު ވަނީ ނިންމާލާފައެވެ.

މި މަޝްރޫޢަކީ ރޯދަ މަހު ރައްޔިތުންގެ ދިރިއުޅުމުގެ ޚަރަދުތަކަށް ލުޔެއް ހޯދައިދިނުމަށް ސަރުކާރުން ކުރިއަށްގެންދާ މުހިންމު މަސައްކަތެކެވެ. ރަށްރަށުގެ ކައުންސިލްތަކާ ގުޅިގެން ކުރިއަށްގެންދާ މި މަސައްކަތުގައި، ހުރިހާ ރަށެއްގެ ގޭބިސީތަކަށްވެސް ވީހާވެސް އަވަހަކަށް މަސްދަޅު ފޯރުކޮށްދިނުމަށް ސަރުކާރުން ދަނީ މަސައްކަތް ކުރަމުންނެވެ.