އިންތިޚާބަށް ކުރިމަތިލާ ފަރާތްތަކަށް ލުޔެއް، ފޯމު ހުށަހަޅާ ވަގުތު އިލެކްޝަންސް ކޮމިޝަނުން އިތުރުކޮށްފި

ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގައި ވާދަކުރުމަށް ފޯމު ހުށަހެޅުމަށް ދީފައިވާ ވަގުތު، ކޮންމެ ދުވަހަކުވެސް ދެ ގަޑިއިރަށް އިތުރުކުރުމަށް އިލެކްޝަންސް ކޮމިޝަނުން ނިންމައިފިއެވެ.

މި އިންތިޚާބަށް ކުރިމަތިލުމަށް އެދޭ ފަރާތްތަކުން ފޯމު ހުށަހަޅަން ޖެހެނީ އެ ކޮމިޝަނުގެ މައި ޕޯޓަލް މެދުވެރިކޮށެވެ. މި މަހުގެ 17 ވަނަ ދުވަހު ފޯމު ހުށަހެޅުމުގެ ފުރުޞަތު ހުޅުވާލިއިރު، ކުރިން ކަނޑައަޅާފައި އޮތީ ހުކުރު ދުވަސް ފިޔަވައި ކޮންމެ ދުވަހަކު ހެނދުނު 8:30 އިން މެންދުރުފަހު 15:30 އަށެވެ. އަދި ހުކުރު ދުވަސްތަކުގައި މެންދުރުފަހު 15:30 އިން ހަވީރު 18:00 އަށެވެ.

ނަމަވެސް، އިލެކްޝަންސް ކޮމިޝަނުން މިހާރު ގެނައި ބަދަލާއެކު، އަންނަ ހަފުތާގެ އާދީއްތަ ދުވަހުގެ ނިޔަލަށް، ހުކުރު ދުވަސް ފިޔަވައި ކޮންމެ ދުވަހަކު ހެނދުނު 8:30 އިން ހަވީރު 05:30 އަށް ޕޯޓަލް މެދުވެރިކޮށް ފޯމު ބަލައިގަންނާނެއެވެ. އަދި ހުކުރު ދުވަހު ފޯމު ބަލައިގަންނާނީ މެންދުރުފަހު 03:30 އިން ރޭގަނޑު 08:00 އަށެވެ.

މި ބަދަލު ގެނައުމަށް އިލެކްޝަންސް ކޮމިޝަނުން ނިންމެވީ، ފޯމު ހުށަހެޅުމަށް މިހާރު ދީފައިވާ ވަގުތަކީ އެކަށީގެންވާ ވަގުތެއް ނޫން ކަމަށް ބައެއް ސިޔާސީ ޕާޓީތަކުންނާއި ސިޔާސީ ފަރާތްތަކުން ފާހަގަކޮށްފައިވާ ދަނޑިވަޅެއްގައެވެ.

އިންތިޚާބުގައި ވާދަކުރުމަށް މިހާތަނަށް ޖުމްލަ 2,254 ފޯމު ވަނީ ހުށަހަޅާފައެވެ. އޭގެ ތެރޭގައި ހިމެނެނީ ކައުންސިލްތަކަށް ވާދަކުރުމަށް ހުށަހެޅި 1,276 ފޯމާއި، އަންހެނުންގެ ކޮމިޓީތަކަށް ވާދަކުރުމަށް ހުށަހެޅި 978 ފޯމެވެ. ނަމަވެސް، މީގެ ތެރެއިން މިހާތަނަށް ކެންޑިޑެސީ ޤަބޫލުކޮށްފައިވަނީ 1,857 މީހުންނެވެ.

އިލެކްޝަންސް ކޮމިޝަނުން ވިދާޅުވި ގޮތުގައި، ބައެއް ފަރާތްތަކުގެ ކެންޑިޑެސީ ޤަބޫލުނުކުރާ މައިގަނޑު ސަބަބުތަކުގެ ތެރޭގައި ކުށާއި ދަރަނީގެ ރެކޯޑުތައް އުސޫލާ އެއްގޮތަށް ހުށަހަޅާފައި ނެތުމާއި، ކަރެކްޝަނަލް ސަރވިސްގެ ރެކޯޑުތައް ފުރިހަމަނުވުން ހިމެނެއެވެ. އެހެންކަމުން، ފޯމު ހުށަހަޅާއިރު މިފަދަ ކަންކަމަށް ޚާއްޞަ ސަމާލުކަމެއް ދިނުމަށް އެ ކޮމިޝަނުން ވަނީ އިލްތިމާސްކުރައްވާފައެވެ.