ނ. ވެލިދޫގައި ސީ އެމްބިއުލާންސްގެ ޚިދުމަތް ފަށައިފި

ނޫނު އަތޮޅު ވެލިދޫގައި ސީ އެމްބިއުލާންސްގެ ޚިދުމަތް ރަސްމީކޮށް ފަށައިފިއެވެ. މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެ ރަށުގެ ރައްޔިތުންނަށް ވެވަޑައިގެންފައިވާ މުހިއްމު ވަޢުދުފުޅެއްގެ ފެށުމެކެވެ.

މިދިޔަ އަހަރުގެ ޖުލައި މަހުގެ 23 ވަނަ ދުވަހު ވެލިދޫ ރައްޔިތުންނާ ބައްދަލުކުރައްވައި ރައީސް ޑރ. މުޢިއްޒު ވަނީ، 2026 ވަނަ އަހަރުގެ ޖަނަވަރީ މަހުން ފެށިގެން އެރަށަށް ޚާއްޞަ ސީ އެމްބިއުލާންސްގެ ޚިދުމަތް ޤާއިމްކޮށްދެއްވާނެ ކަމަށް ވިދާޅުވެފައެވެ. ނަމަވެސް ސަރުކާރުން ވަނީ މި މަސައްކަތް އަވަސްކޮށް، ކަނޑައެޅި ތާރީޚަށްވުރެ ކުރިން މި ޚިދުމަތް ފަށާފައެވެ.

ނ. އަތޮޅުގައި މިހާތަނަށް ސީ އެމްބިއުލާންސްގެ ޚިދުމަތް ދެމުން އައީ ހަމައެކަނި މަނަދޫގައި އޮންނަ އުޅަނދުންނެވެ. އެ އުޅަނދުން ބައެއް ފަހަރު މާލެއަށް ބަލި މީހުން އުފުލަން ޖެހުމުގެ ސަބަބުން އަތޮޅު ތެރޭގައި ބަލި މީހުން އުފުލުމަށް ބޮޑެތި ގޮންޖެހުންތަކެއް ކުރިމަތިވަމުން ދިޔައެވެ. ދިފާޢީ ވުޒާރާއިން ވިދާޅުވި ގޮތުގައި، ވެލިދޫގައި މި ޚިދުމަތް ފެށުމާއެކު މިހާރު ދިމާވާ ދަތިތަކަށް ބޮޑު ލުޔެއް ލިބިގެންދާނެއެވެ.

ވެލިދޫގައި މި ޚިދުމަތް ފެށުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ދިފާއީ ވަޒީރުގެ ނައިބު ފާޠިމަތު މިޒުނާ ޢަލީ ވިދާޅުވީ، ރައީސުލްޖުމްހޫރިއްޔާގެ ވަޢުދުފުޅާ އެއްގޮތަށް މި ޚިދުމަތް ޤާއިމްކުރުމަށްޓަކައި އެ ވުޒާރާއަށް ބޭނުންވާ ހުރިހާ އެހީތެރިކަމެއް ރައީސް ދެއްވި ކަމަށެވެ. އަދި ނ. އަތޮޅަކީ ފަތުރުވެރިކަން ފުޅާވެފައިވާ ސަރަހައްދަކަށް ވުމުން، މި ޚިދުމަތަކީ އިޤްތިޞާދީ ގޮތުންނާއި ޞިއްޙީ ގޮތުން ލިބޭނެ ވަރުގަދަ އައްޑަނައެއް ކަމަށް އޭނާ ފާހަގަކުރެއްވިއެވެ.

"މި ޚިދުމަތުގެ ފައިދާ މުޅި ނ. އަތޮޅަށް ފުޅާވެގެންދާނެ. މިއީ، އަތޮޅުގެ ޞިއްޙީ ނިޒާމަށް ލިބުނު އިންޤިލާބީ ބަދަލަކަށްވާތީ މަނަދޫގައި ހުންނަ ހޮސްޕިޓަލުގައި އައިސީޔޫގެ ޚިދުމަތް ޤާއިމްވެފައިވުމާއި، ލަންދޫ ފަދަ ރަށްރަށުގައި ޞިއްޙީ މަރުކަޒުތައް 24 ގަޑިއިރަށް ބަދަލުކޮށްފައިވާއިރު، މި ސީ އެމްބިއުލާންސްއަކީ މި ހުރިހާ ޚިދުމަތެއް އެކަކު އަނެކަކަށް ގުޅުވާލަދޭނެ ވަރަށް މުހިއްމު ބޮޅެއް،" މިޒުނާ ވިދާޅުވިއެވެ.

ދިފާޢީ ވުޒާރާއިން އިތުރަށް ހާމަކުރެއްވި ގޮތުގައި، މިއަހަރުގެ ތެރޭގައި ދިވެހި ދައުލަތުގެ ޚަރަދުގައި މުޅިން އައު 9 ސީ އެމްބިއުލާންސް ހޯދައި، ރާއްޖޭގެ 9 ރަށެއްގައި އަލަށް މި ޚިދުމަތް ފެށުމަށް ވަނީ ހަމަޖެހިފައެވެ. މީގެ އިތުރުން ޚިދުމަތް މެދުކެނޑިފައިވާ 3 ރަށެއްގައި އަލުން ޚިދުމަތް ފަށައި، މިހާރު ބޭނުންކުރާ ފްލީޓް އަޕްގްރޭޑް ކުރުމުގެ މަސައްކަތްވެސް ބާރުމިނުގައި ކުރިއަށްދާ ކަމަށް އެ ވުޒާރާއިން ވިދާޅުވިއެވެ.