ސަތޭކަ އިންސައްތަ ދިވެހި ޓީމަކާއެކު އައްޑޫ އިކުއެޓޯރިއަލް ހޮސްޕިޓަލުގައި ކެތު ލެބުގެ ޚިދުމަތް ފަށައިފި

މާލެއިން ބޭރުގައި ރާއްޖޭގެ ރަށެއްގައި ޤާއިމުކުރި ފުރަތަމަ ކެތު ލެބުގެ ޚިދުމަތް އައްޑޫ އިކުއެޓޯރިއަލް ހޮސްޕިޓަލް (އޭއީއެޗް) ގައި ރަސްމީކޮށް ފަށައިފިއެވެ. މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް، އަތޮޅުތެރޭގެ ޞިއްޙީ ނިޒާމު ހަރުދަނާކުރުމަށް އެޅުނު މުހިންމު ފިޔަވަޅެކެވެ.

ރައީސުލްޖުމްހޫރިއްޔާގެ ވަޢުދުފުޅާ އެއްގޮތަށް މި ޚިދުމަތް ފެށުމަށްޓަކައި، އިމާރާތަށް ގެންނަންޖެހޭ ބަދަލުތައް ގެނެސް، ބޭނުންވާ މެޝިނަރީޒް އިންސްޓޯލްކުރުމުގެ މަސައްކަތް ވަނީ ނިންމާފައެވެ. އައްޑޫ އިކުއެޓޯރިއަލް ހޮސްޕިޓަލާއި އައިޖީއެމްއެޗް ގުޅިގެން ފެށި މި ޚިދުމަތުގެ ދަށުން މިހާތަނަށް 7 މީހަކަށް ވަނީ ފަރުވާދީފައެވެ.

މި ޚިދުމަތް ފެށުމާ ގުޅިގެން ބޭއްވި ނޫސްވެރިންގެ ބައްދަލުވުމުގައި މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް ޢަބްދުއްރައްޒާޤް ޙަލީމް ވިދާޅުވީ، މިއީ ސަތޭކަ އިންސައްތަ ދިވެހި ޓީމަކާއެކު ފެށިގެންދިޔަ ޚިދުމަތެއް ކަމަށެވެ. މީގެ ކުރިން ރާއްޖޭގައި މިފަދަ ޚިދުމަތްތައް ފަށާފައިވަނީ ބޭރުގެ ކުންފުނިތަކާ ގުޅިގެން ކަން ފާހަގަކުރައްވައި ޙަލީމް ވިދާޅުވީ، ސަރުކާރުގެ އަމާޒަކީ ދިވެހިންގެ އަތްމަތީގައި ބާއްވައިގެން ޞިއްޙީ ޚިދުމަތް ފުޅާކުރުން ކަމަށެވެ.

އޭއީއެޗްގެ ސީއީއޯ އިބްރާހިމް ޔާސިރު ވިދާޅުވީ، އައްޑޫގައި ކެތު ލެބު ޤާއިމްކުރީ 2023 ވަނަ އަހަރު ކަމަށްވީ ނަމަވެސް، ޚިދުމަތް ނުފެށި ގިނަ ދުވަސްތަކެއް ވެފައިވާ ކަމަށެވެ. ނަމަވެސް މި ސަރުކާރުން ކުރެއްވި ހިތްވަރުގަދަ މަސައްކަތުން މި ޚިދުމަތް ފެށުމަކީ މުޅި ދެކުނުގެ އަތޮޅުތަކަށް ލިބުނު ވަރަށް ބޮޑު ކުރިއެރުމެއް ކަމަށް އޭނާ ފާހަގަކުރެއްވިއެވެ.

މި ޚިދުމަތުގެ މުހިންމުކަމާ ގުޅޭގޮތުން ވާހަކަދައްކަވަމުން ހޮސްޕިޓަލުގެ މެޑިކަލް ޑިރެކްޓަރ ޑރ. ފާތިމަތު އަމާނީ ނަސީރު ވިދާޅުވީ، އައްޑޫއިން އެމަރޖެންސީގައި މާލެ ފޮނުވާ ކޮންމެ 5 މީހަކުން އެކަކީ ހިތުގެ ބައްޔަކަށް ފަރުވާ ހޯދަން ފޮނުވާ މީހެއް ކަމަށެވެ. އަދި އެމަރޖެންސީ ނޫން ގޮތްގޮތަށްވެސް ހަފްތާއަކު 5 ވަރަކަށް މީހުން މާލެއަށް ނުވަތަ ރާއްޖެއިން ބޭރަށް ފޮނުވަން ޖެހޭ ކަމަށެވެ.

މި ޚިދުމަތް އޭއީއެޗްގައި ފެށުމުން ބަލި މީހުންނަށާއި އާއިލާތަކަށް ސީދާ ގޮތުންނާއި ނުސީދާ ގޮތުން ވަރަށް ބޮޑެތި ލުއިފަސޭހަތަކެއް ލިބިގެންދާނެ

ޑރ. އަމާނީ 

މިވަގުތު އައިޖީއެމްއެޗްގެ ޑޮކްޓަރުންނާ ގުޅިގެން ސާރޖަރީތައް ކުރިއަށްގެންދިޔަ ނަމަވެސް، ކުރިއަށް އޮތްތަނުގައި ތަމްރީނުތައް ނިމުމުން އޭއީއެޗްގެ އަމިއްލަ ޑޮކްޓަރުންނާއި ނަރުހުން މި ޚިދުމަތް ދިނުމުގައި ހަރަކާތްތެރިވާނެ ކަމަށް އައިޖީއެމްއެޗުން މަޢުލޫމާތު ދެއެވެ.