ބާކީ އެއް މެޗު އޮއްވައި މާޒިޔާއިން ދިވެހި ލީގު ޔަޤީންކޮށްފި

ބާކީ އެއް މެޗު އޮއްވައި މާޒިޔާ ސްޕޯޓްސް އެންޑް ރެކްރިއޭޝަނުން ދިވެހި ޕްރިމިއަރ ލީގު ޔަޤީންކޮށްފިއެވެ. މިއީ ޖެހިޖެހިގެން މާޒިޔާއަށް ލީގު ލިބޭނެ 5ވަނަ ސީޒަނެވެ. 

މާޒިޔާއަށް ލީގު ޔަޤީންވީ، ބުދަ ދުވަހުގެ ހަވީރު ކުޅުނު މެޗުގައި ލީގުގެ ދެވަނައިގައި އޮތް އޮޑި ސްޕޯޓްސް ކްލަބާއި، ހަތަރުވަނައިގައި އޮތް ބުރު ސްޕޯޓްސް ކްލަބު ބައްދަލުކުރި މެޗު 1-1އިން އެއްވަރުވެގެން ނިމުމާއި ގުޅިގެންނެވެ. އެހެންކަމުން އޮޑި ސްޕޯޓްސްއަށް ދެން މާޒިޔާއާ އެއްވަރަށް ޕޮއިންޓު ނުހޯދޭނެކަން ވަނީ ކަށަވަރުވެފައެވެ.

އޮޑި ސްޕޯޓްސް އެ މެޗުން މޮޅުވި ނަމަވެސް، ރޭ މާޒިޔާ އާއި ނިއު ރޭޑިއަންޓް ސްޕޯޓްސް ކްލަބް ބައްދަލުކުރި މެޗުން މާޒިޔާއަށް ލީގު ޔަޤީންކުރެވުނީހެވެ. އެ މެޗުން ލީގު ޔަޤީން ކުރަން މާޒިޔާ ބޭނުންވީ އެންމެ ޕޮއިންޓެކެވެ. އެ ޓީމުން އެކަން ކުރިއެވެ. 

ރަސްމީ ފުޓުބޯޅަ ދަނޑުގައި ރޭ މާޒިޔާ އައި ނިއު ރޭޑިއަންޓު ބައްދަލުކުރި މެޗު ނިމުނީ 2-2އިން އެއްވަރުވެގެނެވެ. 

އެ މެޗުގައި މާޒިޔާއިން ލީޑު ނެގީ ދެވަނަ ހާފުގެ ފުރަތަމަ މިނެޓުގައި ޙަސަން ނަޒީމް ކާމިޔާބުކުރި ރީތި ގޯލަކުންނެވެ. ނިއު ރޭޑިއަންޓުގެ ޕެނަލްޓީ އޭރިއާ ތެރެއިން ކަނާތް ފަރާތުން ކުޅުންތެރިއެއްގެ ކައިރިން ނައްޓާލުމަށްފަހު އޭނާ ބޯޅަ އަމާޒުކުރީ ގޯލުގެ ދުރު ކަނަށެވެ.

މާޒިޔާގެ ދެވަނަ ގޯލަކީ އޭގެ 9 މިނެޓު ފަހުން ކެޕްޓަން ސަމޫޙް ޢަލީ ކާމިޔާބުކޮށްދިން ގޯލެކެވެ. އެއީ އިބްރާޙިމް އައިސަމް ނަގައިދިން ކޯނަރަކަށް އަރައި، "ނިއަރ ޕޯސްޓް"އިން ސަމޫޒު ބޮލުން ޖެހި ގޯލެކެވެ.

ނަމަވެސް އޭގެ ތިން މިނެޓު ފަހުން ނިއު ރޭޑިއަންޓުން އުއްމީދު ހޯދިއެވެ. އެއީ އެ ޓީމަށް ފުލުފުލުން ލިބުނު 3 ކޯނަރުގެ ބޭނުން ހިފައި، އަލްހާޖީ ގެރޯ ކާމިޔާބުކުރި ގޯލެކެވެ.

ނިއު ރޭޑިއަންޓުން މެޗުގެ ނަތީޖާ ހަމަހަމަކުރީ، މެޗުގެ އިތުރު ވަގުތުގެ 6ވަނަ މިނެޓުގައި އެ ޓީމަށް ލިބުނު ޕެނަލްޓީއަކުން ޢަލީ އަޝްފާގު ކާމިޔާބުކުރި ގޯލުންނެވެ.

ލީގު ތާވަލު މިހާރު އޮތް ގޮތުން، ލީގުގެ ގަދަ ހަތަރަކަށް އެއްވެސް ބަދަލެއް ނާންނާނެއެވެ. އެހެންކަމުން ލީގުގެ ދެވަނަ އޮޑި ސްޕޯޓްސްއިން ޔަޤީންކޮށްފައިވާއިރު، ނިއު ރޭޑިއަންޓަށް ލިބޭނީ ތިންވަނައެވެ. އަދި ހަތަރު ވަނައިގައި އޮތީ ބުރު ސްޕޯޓްސް ކްލަބެވެ. 

މީގެ އިތުރުން ލީގުގެ ފަސްވަނަ އާއި ހަވަނައަށް ވާދަކުރާ ކްލަބް އީގަލްސް އާއި ވިކްޓަރީ ސްޕޯޓްސް ކްލަބުން ވަނީ ރެލިގޭޝަންގެ ބިރު ފިލުވާލާފައެވެ.