ޗެމްޕިއަންސް ލީގު: ބެންފީކާ މެޗުން ބަލިވެ ރެއާލް ޕްލޭއޮފަށް

ޔޫއެފާ ޗެމްޕިއަންސް ލީގުގެ، ލީގު ފޭސްގެ ފަހު ބުރުގެ މެޗުތައް ރޭ ކުޅުނުއިރު، މުބާރާތް އެންމެ ގިނަ ފަހަރު ކާމިޔާބުކޮށްފައިވާ ސްޕެއިންގެ ރެއާލް މެޑްރިޑާއި ބެންފީކާ ބައްދަލުކުރި މެޗުން ރެއާލް ބަލިވެ، އެ ޓީމް ޕްލޭ-އޮފް ބުރު ކުޅެންޖެހިއްޖެއެވެ.

މިދިޔަ ސީޒަނުން ފެށިގެން ޗެމްޕިއަންސް ލީގުގެ އައު ފޯމެޓަށް ކުޅެމުންދާއިރު، ލީގު ފޭސްގެ 1ވަނައިން 8ވަނައަށްދާ ޓީމުތައް ދާނީ ސީދާ ނޮކްއައުޓް ބުރަށެވެ. އަދި 9ވަނައިން 24ވަނައާ ދޭތެރޭގައި ހިމެނޭ ޓީމުތައް ޕްލޭއޮފް ބުރެއް ކުޅެން ޖެހެއެވެ. އެ ބުރުގައި ކޮންމެ ޓީމެއް ވެސް ޖެހޭނީ އެއް ޓީމަކާއެކު ހޯމް އެންޑް އަވޭ މެޗެއް ކުޅޭށެވެ. އެތަނުން މުބާރާތުގެ ނޮކްއައުޓް ބުރަށް ދާނީ އެގްރިގޭޓް ސްކޯއިން ޕްލޭއޮފް ކާމިޔާބުކުރާ ޓީމެވެ.

އެގޮތުން ރެއާލް ރޭގެ މެޗުން ބަލިވުމުން، އެ ޓީމު އޮތީ 15 ޕޮއިންޓާއެކު ލީގުގެ 9ވަނައަށް ވެއްޓިފައެވެ. 

ރެއާލްގެ ކޯޗެއްގެ ގޮތުގައި 2010 އިން 2013އާ ދެމެދު މަސައްކަތްކޮށްފައިވާ ޕޯޗުގަލްގެ ހޯޒޭ މޮރީނިއޯގެ އިރުޝާދުގެ ދަށުން ޕޯޗުގަލްގައި ބެންފީކާއާ ދެކޮޅަށް ކުޅުނު މި މެޗުން ރެއާލް ބަލިވީ 4-2އިންނެވެ.

މި މެޗުގެ 30 ވަނަ މިނިޓުގައި ކީލިއަން އެމްބައްޕޭ ވަނީ ގޯލެއް ކާމިޔާބުކޮށް ރެއާލްއަށް ކުރި ހޯދަދީފައެވެ. ނަމަވެސް އޭގެ ހަ މިނިޓު ފަހުން ބެންފީކާގެ އެންޑްރިއަސް ޝެލްޑްރަޕްގެ ގޯލަކުން ބެންފީކާ ވަނީ މެޗުގެ ނަތީޖާ ހަމަހަމަކޮށްދީފައެވެ. އަދި ފުރަތަމަ ހާފުގެ އިތުރު ވަގުތުގައި ބެންފީކާއަށް ކުޅެމުން އަންނަ ގްރީސްގެ ފޯވާޑް، ވެންގެލިސް ޕެވްލިޑިސް ވަނީ ޕެނަލްޓީއަކުން ފުރަތަމަ ފަހަރަށް ބެންފީކާއަށް އެ މެޗުގައި ލީޑު ނަގައިދީފައެވެ.

މެޗުގެ ދެވަނަ ހާފުގެ ކުޅުން ފެށުނުތާ މާގިނަ އިރުތަކެއް ނުވެ، ބެންފީކާއިން އެ ޓީމުގެ ލީޑު ފުޅާކުރިއެވެ. މެޗުގެ 54ވަނަ މިނެޓުގައި ކާމިޔާބުކުރީ، ދެވަނަ ގޯލުވެސް ކާމިޔާބުކުރީ ޕެވްލިޑިސްއެވެ. 

ރެއާލްއިން ދެ ޓީމުގެ ދެމެދުގައި އޮތް ފަރަގު ކުޑަކުރީ އޭގެ 4 މިނެޓު ފަހުން އެމްބައްޕޭ ކާމިޔާބުކުރި އިތުރު ގޯލަކުންނެވެ. އެއީ ޗެމްޕިއަންސް ލީގުގެ ފުރަތަމަ ބުރުގައި އެމްބައްޕޭ ކާމިޔާބުކުރި 13 ވަނަ ގޯލެވެ.

ވާދަވެރި ކުޅުމެއް ފެނިގެން ގޮސްފައިވާ މި މެޗުގެ ފުރިހަމަ ވަގުތު ހަމަވެ، އިތުރު ވަގުތުގެ ކުޅުމުގެ ތެރެއިން ރެއާލްގެ ރައުލް އަސެންސިއޯ އާއި ރޮޑްރިގޯއަށް ދެވަނަ ރީނދޫ ކާޑަކާއިއެކު، ރަތް ކާޑު ދައްކާ ދަނޑުން ފޮނުވާލާފައެވެ.

އަދި މެޗު ނިމުމުގެ ކުރިން ބެންފީކާއިން ދެވަނަ ފަހަރަށް މެޗުގައި 2 ގޯލުގެ ލީޑެއް ނެގިއެވެ. ބެންފީކާގެ ގޯލުކީޕަރު އެނެޓޮލީ ޓްރުބިން ބޮލުން ކާމިޔާބުކުރި ތާރީޙީ ގޯލެކެވެ. އޭނާ މި ބޯޅަ ގޯލަށް ފޮނުވާލީ، ބެންފީކާއަށް ލިބުނު ހިލޭޖެހުމަކަށް ކުރިއަށް އަރައެވެ.

މުބާރާތުގެ ލީގު ފޭސް ނިމުނުއިރު، ނޮކްއައުޓް ބުރުގެ ސީދާ ޖާގަތައް ހޯދީ އާސެނަލް، ބެޔާން މިއުނިކް، ލިވަޕޫލް، ޓޮޓެންހަމް، ބާސެލޯނާ، ޗެލްސީ، ސްޕޯޓިން އަދި މެންޗެސްޓަރ ސިޓީއެވެ. އަދި ލީގުގެ އެއްވަނައިގައި އާސެނަލް އޮތީ ކުޅުނު 8 މެޗުން ވެސް މޮޅުވެގެންނެވެ.