ހަފްތާ 52 ގެ ކާމިޔާބީތަކާ ގުޅިގެން ހޮނިހިރު ދުވަހު ޚާއްޞަ ޢާއިލީ ހަވީރެއް

ޖެންޑަރ މިނިސްޓްރީން "ބަދަހި ޢާއިލާ - އުފާވެރި މުޖުތަމަޢު" ޝިޢާރުގެ ދަށުން ޚާއްޞަ ޢާއިލީ ހަވީރެއް ބޭއްވުމަށް ވަނީ ހަމަޖެހިފައެވެ. މި ހަވީރު ބޭއްވުމަށް ހަމަޖެހިފައިވަނީ 16 ނޮވެމްބަރު ވާ ހޮނިހިރު ދުވަހު ހުޅުމާލެ ސެންޓްރަލް ޕާކުގައި ހަވީރު 4:00 އިން 6:00 އަށެވެ.

މި ހަވީރުގެ މައިގަނޑު މަޤްޞަދަކީ ޢާއިލީ މާޙައުލެއްގައި، ޖެންޑަރ މިނިސްޓްރީން ފާއިތުވި އަހަރު ތެރޭގައި ކުރެވުނު މަސައްކަތްތަކުން ހާޞިލުކުރެވުނު ކާމިޔާބީތައް ރައްޔިތުންނާ ހިއްސާކުރުމެވެ. މީގެ އިތުރުން، އަންހެނުންނާއި، ކުޑަކުދިންނާއި، ނުކުޅެދުންތެރިކަން ހުންނަ ފަރާތްތަކާއި އަދި އިސްރަށްވެހިންނަށް އަމާޒުކޮށްގެން ކުރިއަށް ގެންދެވުނު މަސައްކަތްތަކާއި، މިނިސްޓްރީން ފޯރުކޮށްދެމުން އަންނަ ޚިދުމަތްތަކުގެ މަޢުލޫމާތު ރައްޔިތުންނަށް ޔިތުންނަށް ފޯރުކޮށްދިނުމަށްވެސް ވަނީ ހަމަޖެހިފައެވެ.

މި ޢާއިލީ ހަވީރުގައި ތަފާތު ގޭމް ސްޓޯލްތަކާއި، ކާބޯތަކެތީގެ ސްޓޯލްތަކުގެ އިތުރުން، ތަފާތު މެސްކޮޓްތަކުގެ ހަރަކާތްތައް ކުރިއަށްދާނެ ކަމަށް މިނިސްޓްރީން މަޢުލޫމާތު ދެއެވެ.

ޖެންޑަރ މިނިސްޓްރީއާއެކު މި ހަވީރުގައި އިސްކޮށް ހަރަކާތްތެރިވާނީ މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނާއި ހައުސިންގް ޑިވެލޮޕްމަންޓް ކޯޕަރޭޝަނެވެ. އަދި އުރީދޫ، މޯލްޑިވްސް ޕެންޝަން އެޑްމިނިސްޓްރޭޝަން އޮފީސް، މޯލްޑިވްސް ޕޮލިސް ސަރވިސް، ނެޝަނަލް ސޯޝަލް ޕްރޮޓެކްޝަން އޭޖެންސީ، އަދި ފެމިލީ ޕްރޮޓެކްޝަން އޮތޯރިޓީން ވެސް މި ހަވީރުގައި ބައިވެރިވާނެއެވެ.

މި ހަވީރަކީ ޖެންޑަރ މިނިސްޓްރީގެ 52 ހަފްތާގެ ކާމިޔާބީތަކާ ގުޅިގެން ބާއްވާ ޚާއްޞަ ހަރަކާތެކެވެ.