އައިލާ މަޝްރޫޢަކީ ރާއްޖޭގެ ފަތުރުވެރިކަމުގެ މުޅިން އައު ބާބެއް: ވަޒީރު މުޙައްމަދު ސަޢީދު

"އައިލާ" މަޝްރޫޢަކީ ރާއްޖޭގެ ފަތުރުވެރިކަމުގެ ސިނާއަތަށް މުޅިން އައު އިންގިލާބެއް ގެނުވާނެ، އަދި ތާރީޚީ އައު ބާބެއް ހުޅުވައިދޭނެ ފަދަ މުހިންމު މަޝްރޫއެއް ކަމަށް އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.

ވަޒީރު މިހެން ވިދާޅުވީ، ސްޕެޝަލް އިކޮނޮމިކް ޒޯން (އެސްއީޒެޑް) ގެ ދަށުން ރާއްޖޭގައި ތަރައްޤީކުރާ އެންމެ ފުރަތަމަ 'ސަސްޓެއިނަބަލް ޓައުންޝިޕް' މަޝްރޫޢުގެ ބިންގާ އެޅުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.

ވަޒީރުގެ ވާހަކަފުޅުގައި، އައިލާ މަޝްރޫޢަކީ ހަމައެކަނި އުމްރާނީ ތަރައްޤީގެ މަޝްރޫޢެއް ނޫން ކަމަށާއި، މިއީ ރާއްޖޭގެ އިޤްތިޞާދީ ކުރިއެރުމާއި ފަތުރުވެރިކަމުގެ މޮޑެލްއާ މެދު އަލުން ވިސްނާލަން ލިބުނު ރަން ފުރުޞަތެއް ކަމަށް ފާހަގަކުރެއްވިއެވެ. ދުނިޔޭގެ ފަތުރުވެރިކަމުގެ ބާޒާރުގައި ވާދަވެރިކަން އިތުރުވަމުންދާ މި ދަނޑިވަޅުގައި، އުފެއްދުންތެރި އިސްތިރާޖީ ވިސްނުންތަކާއެކު ދާއިރާ ސިންދަފާތު ކުރުމަކީ ކޮންމެހެން ކުރަންޖެހޭ ކަމެއް ކަމަށް ވަޒީރު ވިދާޅުވިއެވެ.

އައިލާ ފަދަ މަޝްރޫޢުތަކުގެ ސަބަބުން ރާއްޖެއަކީ ހަމައެކަނި ޗުއްޓީ ހޭދަކޮށްލަން އަންނަ މަންޒިލެއްގެ ބަދަލުގައި، ދިރިއުޅުމަށާއި އިންވެސްޓް ކުރުމަށް އެންމެ އެކަށީގެންވާ ތަނެއްގެ ގޮތުގައި ދުނިޔެއަށް ބަލައިގަންނާނެ. މި މަޝްރޫޢުގެ ސަބަބުން ލައިފްސްޓައިލް، ތަޢުލީމު، ވެލްނަސް އަދި ޞިއްޙީ ދާއިރާއިން ފަތުރުވެރިންނަށް ލިބޭ ތަޖުރިބާ އިތުރަށް ފުރިހަމަވެގެންދާނެ،

ވަޒީރު ސަޢީދު 

އިޤްތިޞާދީ ނަޒަރަކުން ބަލާއިރު، މި މަޝްރޫޢުގެ ސަބަބުން ޢިމާރާތްކުރުމުގެ ދާއިރާއާއި، ރީޓެއިލް، ތަޢުލީމު، އަދި ޞިއްޙީ ޚިދުމަތް ފަދަ ދާއިރާތަކަށް ބޮޑު ކުރިއެރުމެއް ލިބި، ގިނަ އަދަދެއްގެ ވަޒީފާގެ ފުރުޞަތުތައް އުފެދިގެންދާނެ ކަމަށް ސަރުކާރުން އުންމީދު ކުރެއެވެ.

ކްރިސްޓަލް ހޯލްޑިންގްސްގެ ފަރާތުން ނ. އަތޮޅުގައި ތަރައްޤީކުރާ މި ބޮޑު މަޝްރޫޢަކީ 790 މިލިޔަން އެމެރިކާ ޑޮލަރު (ގާތްގަނޑަކަށް 12.2 ބިލިޔަން ރުފިޔާ) ގެ ބިޔަ އިންވެސްޓްމަންޓެކެވެ. ޒަމާނީ ވަޞީލަތްތަކާއެކު ތަރައްޤީކުރާ މި ޓައުންޝިޕްގެ މަސައްކަތް 2028 ވަނަ އަހަރުގެ ނިޔަލަށް ނިންމާލުމަށް ވަނީ އަމާޒު ހިފާފައެވެ. ސަރުކާރުން ހާމަކުރައްވާ ގޮތުގައި، މިއީ މުޅި އިންޑިއާ ކަނޑުގެ ސަރަޙައްދުގައިވެސް ފާހަގަކޮށްލެވޭނެ ތަފާތު، ދުނިޔޭގެ ފެންވަރުގެ މަޝްރޫޢެކެވެ.