ބީއެމްއެލް އިން ރެކޯޑް ނަތީޖާއެއް, މިދިޔަ އަހަރު 3.2 ބިލިއަން ރުފިޔާގެ ފައިދާއެއް!

ބޭންކް އޮފް މޯލްޑިވްސް (ބީއެމްއެލް) އިން 2025 ވަނަ އަހަރުގެ ހަތަރުވަނަ ކުއާޓަރުގައި 828.7 މިލިއަން ރުފިޔާގެ ހިންގުމުގެ ފައިދާއަކާއެކު ރެކޯޑް މާލީ ނަތީޖާއެއް ހާސިލްކޮށްފިއެވެ.

ބޭންކުން އާންމުކޮށްފައިވާ މިދިޔަ އަހަރުގެ ހަތަރުވަނަ ކުއާޓަރުގެ މާލީ ހިސާބުތައް ދައްކާގޮތުން، އެ ބޭންކަށް ސާފު ފައިދާގެ ގޮތުގައި 837.5 މިލިއަން ރުފިޔާ ލިބިފައިވެއެވެ. މިއީ ތިންވަނަ ކުއާޓަރާ އަޅާބަލާއިރު 76.2 އިންސައްތައިގެ ބޮޑު ކުރިއެރުމެކެވެ.

މިދިޔަ އަހަރުގެ ޖުމްލަ އާމްދަނީއަށް ބަލާއިރު، ބޭންކަށް 5.5 ބިލިއަން ރުފިޔާއަށް ވުރެ މަތީ އާމްދަނީއެއް ލިބިފައިވެއެވެ. މިއީ 2024 ވަނަ އަހަރާ އަޅާބަލާއިރު 16.1 އިންސައްތައިގެ ކުރިއެރުމެކެވެ. އަދި ޓެކްސްއަށް ކެނޑުމުގެ ކުރިން ލިބުނު ފައިދާ ވަނީ 2024 ވަނަ އަހަރާ އަޅާބަލާއިރު 10 އިންސައްތަ އިތުރުވެ، ރެކޯޑް އަދަދެއް ކަމަށްވާ 3.2 ބިލިއަން ރުފިޔާއަށް އަރާފައެވެ. ބޭންކުގެ ޖުމްލަ އެސެޓް 55.7 ބިލިއަން ރުފިޔާއަށް ވުރެ މަތިވެފައިވާއިރު، މިއީ 15 އިންސައްތައިގެ ކުރިއެރުމެކެވެ.

ބޭންކުގެ މާލީ ވަރުގަދަކަން ހާމަކޮށްދޭ އެހެން ތަފާސްހިސާބުތަކަށް ބަލާއިރު، މިދިޔަ އަހަރުގެ ތެރޭގައި ވިޔަފާރިތަކާއި އާންމު ފަރުދުންނަށް 10 ބިލިއަން ރުފިޔާގެ އާ ލޯނު ދޫކޮށްފައިވެއެވެ. ބޭންކުގެ ކެޕިޓަލް އަދި ލިކުއިޑިޓީ ރޭޝިއޯ ވެސް ހުރީ ގާނޫނު ލާޒިމުކުރާ މިންގަނޑަށްވުރެ މަތީގައެވެ.

ބީއެމްއެލްގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފް ވިދާޅުވީ، މި ނަތީޖާއިން ދައްކުވައިދެނީ ބޭންކުގެ އިސްތިރާޖީ އަމާޒަށް ވާސިލްވެފައިވާ މިންވަރު ކަމަށެވެ. "ބޭންކުގެ މައިގަނޑު ވިޔަފާރީގެ ދާއިރާތަކުން ހޯދި ކުރިއެރުމާއި، ހަރުދަނާ ރިސްކް މެނޭޖްމަންޓެއްގެ ސަބަބުން، ބޭންކުގެ މާލީ ދުޅަހެޔޮކަން ދަމަހައްޓައި ވަރުގަދަ މާލީ ނަތީޖާއެއް ހާސިލްކޮށް ވަރުގަދަ ބެލެންސް ޝީޓެއް ދެމެހެއްޓިފައިވޭ،" ޝަރީފް ވިދާޅުވިއެވެ.

އިޖުތިމާއީ އަދި ޑިޖިޓަލް ކުރިއެރުންތައް
މިދިޔަ އަހަރުގެ ތެރޭގައި ބީއެމްއެލްއިން ވަނީ ގިނަ އާ ހިދުމަތްތަކެއް ތައާރަފުކޮށްފައެވެ. އޭގެ ތެރޭގައި:

• 'ގްރީން ރިސޯޓް ފައިނޭންސިން' އަދި ހައުސިން މިނިސްޓްރީއާ ގުޅިގެން 5 އިންސައްތައިގެ ކުޑަ އިންޓަރެސްޓެއްގައި 'ހިޔާވެހި ފައިނޭންސިން' ދޫކުރަން ފެށުން.
  
• ގެދޮރު ގަތުމަށް ދޫކުރާ ލޯނުތަކުގެ އިކުއިޓީ 5 އިންސައްތައަށް ދަށްކުރުން.
  
• ސޯޝަލް ހައުސިން ޔުނިޓުތަކަށް ހާއްސަކޮށް 'ބީއެމްއެލް އެފޯޑަބަލް ހޯމް ލީސިން ޕްރައިވެޓް ލިމިޓެޑް' އުފެއްދުން.
  
• ރ. ދުވާފަރުގައި ބޭންކުގެ 40 ވަނަ ބްރާންޗް ހުޅުވައި، މީހުން ދިރިއުޅޭ ހުރިހާ ރަށެއްގައި ބޭންކުގެ ހިދުމަތް ގާއިމުކުރުން.

ޑިޖިޓަލް ދާއިރާއިން ބަލާއިރު، 'ސްވައިޕް' ޑިޖިޓަލް ވޮލެޓާއި، އިންޑިއަން ރޫޕީ އަދި ޗައިނީޒް ޔުއާން އެކައުންޓްތައް ތައާރަފުކުރުން ހިމެނެއެވެ. އަދި ބައިނަލްއަގުވާމީ ޕޭމަންޓް ނެޓްވޯކްތަކާ ގުޅިގެން ރާއްޖޭގެ ޑިޖިޓަލް ޕޭމަންޓް ނިޒާމު ވަރުގަދަކޮށްފައިވެއެވެ.

މީގެއިތުރުން، އެސްޑީއެފްސީ (މިހާރު އެސްއެމްއީ ޑިޖިޓަލް) ބޭންކުގެ ދަށަށް ގެނައުމާއި، މާޗަންޓް ފީ 1 އިންސައްތައަށް ކުޑަކުރުމަކީ ކުދި އަދި މެދު ފަންތީގެ ވިޔަފާރިތަކަށް ބޭންކުން ދިން ބޮޑު ލުޔެކެވެ. މި މަސައްކަތްތަކުގެ އަގުވަޒަންކޮށް 'ކޯރަސް' އަދި މާސްޓާކާޑުން ވަނީ ބީއެމްއެލްއަށް އެވޯޑްތައް ވެސް ދީފައެވެ.