އިގުތިސާދު ސިންދަފާތުކުރުމަކީ ރާއްޖޭގެ ވިލުންތެރިކަން އިތުރުކުރުމަށް ރައީސް އަޅުއްވާ ފިޔަވަޅެއް: މިނިސްޓަރު ޝިޔާމް

ސަރުކާރުން މިހާރު ކުރަމުންދާ މަސައްކަތަކީ ރާއްޖޭގެ އިގުތިސާދީ ތަރައްގީއަށް މިހާރަށްވުރެ ހަމަޖެހޭ ބިންގަލެއް އެޅުމުގެ މަސައްކަތް ކަމުގައި ވިދާޅުވެ، ކުރީގެ ތިމާވެއްޓާ ބެހޭ ވަޒީރު އައިމިނަތު ޝައުނާއަށް، މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ރައްދު ދެއްވައިފިއެވެ.

މިނިސްޓަރު ޝިޔާމް މިފަދައިން ރައްދު ދެއްވީ، ސްޕެޝަލް އިކޮނޮމިކް ޒޯން (އެސްއީޒެޑް) ތަކުގައި ހިންގޭ އިގުތިސާދީ ހަރަކާތްތަކުގެ ލިސްޓު މުރާޖައާކުރައްވައި، އެ ލިސްޓުގައި ތެލާއި ގޭސް ކަނޑުން ހޯދުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހިމެނުއްވުމަކީ ފަތުރުވެރިކަމަށް ނުރައްކާވާނެ ކަމެއް ކަމަށް ޝައުނާ ވިދާޅުވުމާ ގުޅިގެންނެވެ.

މިކަމާ ގުޅޭގޮތުން ޝިޔާމް ވިދާޅުވީ، ޓޫރިޒަމާއި މަސްވެރިކަމަށް އެކަނި ރާއްޖޭގެ އިގުތިސާދު ބަރޯސާވެފައި އޮތް އޮތުން ނިމުމަކަށް ގެނެސް، އެހެން ސިނާއަތްތައް ތައާރަފުކޮށް އިގުތިސާދު ސިންދަފާތުކުރުމަށް ރައީސް ޑރ. މުޢިއްޒު ގެންގުޅުއްވާ ތަސައްވުރަކީ ދިގު ރާސްތާގެ ވިލުންތެރިކަމަށް އަމާޒުކުރައްވައިގެން، ހަގީގަތްތަކަށް ރިއާޔަތްކުރައްވައިގެން އަޅުއްވާ ފިޔަވަޅެއް ކަމަށެވެ.

ވަޒީރު ފާހަގަކުރެއްވި ގޮތުގައި ރާއްޖޭގެ އިގުތިސާދަކީ ބޭރުން އަންނަ ލޮޅުންތަކުން ވަރަށް ބޮޑަށް އަސަރުކުރާ އެއްޗަކަށްވާތީ، އެ ހިރާސްތައް ކުޑަކޮށް، ވަރުގަދަ އިގުތިސާދީ ބިންގަލެއް އަޅަންޖެހެއެވެ. ރާއްޖޭގެ އިގުތިސާދީ ހާއްސަ ސަރަހައްދަކީ 900,000 އަކަކިލޯމީޓަރުގެ ބޮޑު ސަރަހައްދެއް ނަމަވެސް، މިހާތަނަށް މަސްވެރިކަން ފިޔަވައި އެ ސަރަހައްދުން މަންފާ ހޯދުމަށް އެދެވޭ މަސައްކަތެއް ކުރެވިފައި ނެތްކަން އޭނާ ފާހަގަކުރެއްވިއެވެ.

ވިސްނުންތެރިކަމާއެކު މި ކަނޑުފަޅުގެ ބޮޑު އިގުތިސާދީ ފުރުސަތުތައް ހޯދުމަކީ ވަސީލަތްތައް ދެމެހެއްޓެނެވި ގޮތުގައި ބޭނުންކުރެވޭނެ މަގުތައް ފަހިވާނެ ކަމެއް ކަމަށާއި، މި މަސައްކަތުގައި ސަރުކާރުން ބައިވެރިކުރާނީ ނަން ހުރި، ގާބިލު އަދި ރާއްޖޭގެ މަސްލަހަތުތަކަށް އިސްކަންދޭނެ އިންވެސްޓަރުން ކަމަށް ޝިޔާމް ވިދާޅުވިއެވެ.

މޫސުމީ ބަދަލުތަކުގެ އަސަރު ފޯރާ ގައުމެއްގެ ހައިސިއްޔަތުން، އައު އިގުތިސާދީ ހަރަކާތްތައް ފަށާނީ ތިމާވެއްޓަށް ކުރާނެ އަސަރު ދެފުށް ފެންނަ ގޮތަށް ވަޒަންކުރުމަށްފަހު، ދިރުންތަކަށް އުނިކަމެއް ނާންނާނެހެން ކަމުގެ ޔަގީންކަން ވެސް ވަޒީރު ދެއްވިއެވެ.

މި އިގުތިސާދީ ބަދަލުތަކުގެ ސަބަބުން ރާއްޖޭގައި އުފެއްދުންތެރިކަން އިތުރުވެ، މެރިން ޖިއޮލޮޖީއާއި ސަބްސީ އިންޖިނިއަރިން ފަދަ މަތީ ފަންތީގެ ހުނަރުވެރި ވަޒީފާތައް އުފެދިގެންދާނެ ކަމަށް ޝިޔާމް ވިދާޅުވިއެވެ.

މިހާރު އޮތް ހާލަތުގައި ދެމި ތިބުމަކީ އަޅުގަނޑުމެންނަށް އޮތް ހިޔާރެއް ނޫން. އިސްނަގައިގެން މަސައްކަތްކޮށް ރާއްޖޭގެ އިގުތިސާދުގެ ވިލުންތެރިކަން އިތުރުކޮށް، އަމިއްލަ ފައިމައްޗަށް ތެދުވެވިފައިވާ މުސްތަގުބަލެއް ކަށަވަރުކުރަންޖެހޭ، ވަޒީރު