10 މީހުން ހައްޔަރުކުރި ސައިބަރ ކްރައިމް މައްސަލާގައި އިތުރު 3 މީހަކު ހައްޔަރުކޮށްފި

މީހެއްގެ ސޯޝަލް މީޑިއާ އެކައުންޓުތައް ކޮމްޕްރޮމައިޒްކޮށް، އޭނާގެ ހިއްސާ އޮންނަ ކުންފުނީގެ ބެންކު އެކައުންޓުން ގިނަ އަދަދެއްގެ ފައިސާ ނަގާފައިވާ މައްސަލާގައި އިތުރު ތިން މީހަކު ފުލުހުން ހައްޔަރުކޮށްފިއެވެ. މި މީހުން ހައްޔަރުކޮށްފައިވަނީ ކުންފުނީގެ އެކައުންޓުން 279,600 އަށްވުރެ ގިނަ ރުފިޔާ ވަގަށް ނަގާފައިވާ މައްސަލައަކާ ގުޅިގެންނެވެ.

މި މައްސަލައާ ގުޅިގެން އަލަށް ހައްޔަރުކޮށްފައިވާ ތިން މީހުންނަކީ ސ. ހުޅުދޫ / ނާދީ، މުނާޛު ޖައުފަރު (24އ) އާއި ގދ. ގައްދޫ / އަތިރީއައްސޭރި، މުޙައްމަދު ނާއިޝް ނަބީލް (24އ) އާއި ސ. ހިތަދޫ / ހާލަމް، ޙަސަން ވިއާމް (19އ) އެވެ. މި ތިން މީހުން ހައްޔަރުކޮށްފައިވަނީ ކޯޓު އަމުރެއްގެ ދަށުންނެވެ.

މި މައްސަލާގައި މީގެ ކުރިންވެސް 10 މީހަކު ވަނީ ހައްޔަރުކޮށްފައެވެ. އޭގެ ތެރޭގައި ހިމެނެނީ މުޙައްމަދު ޙަސަން (59އ)، އަލީ ޢިރުފާނު އަޙްމަދުދީދީ (26އ)، ޢަލީ ޝިރާޒު (38އ)، ޢަބްދުﷲ ނާފިޛް (39އ)، މުޙައްމަދު ޢަލީ (42އ)، މުޙައްމަދު ނުހާދު ޢަލީ (30އ)، މުޙައްމަދު ސިމާދު (38އ)، އަލީ އިމްރާން (38އ)، ޢަބްދުﷲ އިސްރާޤް (19އ) އަދި މުޙައްމަދު އިބްރާހީމް (49އ) އެވެ.

އަލަށް ހައްޔަރުކުރި ތިން މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، މުނާޛު ޖައުފަރު 15 ދުވަހަށް، މުޙައްމަދު ނާއިޝް ނަބީލް ހަތްދުވަހަށް އަދި ޙަސަން ވިއާމް 10 ދުވަހަށް ބަންދުކުރުމަށް ވަނީ އަމުރުކޮށްފައެވެ. މީގެ އިތުރުން، ކުރިން ހައްޔަރުކުރި މުޙައްމަދު ޢަލީގެ ބަންދުގެ މުއްދަތު އިތުރުކުރުމަށް ކޯޓަށް ހާޒިރުކުރުމުން އޭނާ 30 ދުވަހަށް ބަންދުކުރުމަށް ވަނީ އަމުރުކޮށްފައެވެ.

ދިވެހި ފުލުހުންގެ ޚިދުމަތުން ވިދާޅުވި ގޮތުގައި، މި މައްސަލައަކީ މީހެއްގެ ސޯޝަލް މީޑިއާ އެކައުންޓުތައް ހެކްކޮށްގެން އެމީހާގެ ކުންފުނީގެ އެކައުންޓުން ފައިސާ ނެގި މައްސަލައެކެވެ. މި މައްސަލަ މިހާރު ދަނީ ފުލުހުންގެ އެންޓި ސްކޭމް ސެންޓަރުން އިތުރަށް ތަހުގީގު ކުރަމުންނެވެ.