އޭދަފުށީގައި ހިނގި ނުރައްކާތެރި އެކްސިޑެންޓުގައި އަނިޔާވި ދުވަސްވީ މީހާ ނިޔާވެއްޖެ

ބ. އޭދަފުށީގައި ހިނގި ނުރައްކާތެރި އެކްސިޑެންޓެއްގައި އަނިޔާވި ދުވަސްވީ މީހަކަށް އައިޖީއެމްއެޗްގެ އައިސީޔޫގައި ފަރުވާދެމުންދަނިކޮށް މިއަދު ހެނދުނު ނިޔާވެއްޖެއެވެ.

މި ހާދިސާގައި ނިޔާވެފައިވަނީ އޭދަފުށީ، ސީސަންގޭ، އަބޫބަކުރު އަބްދުﷲ (83އ) އެވެ. އޭނާ ނިޔާވީ މި މަހުގެ 15 ވަނަ ދުވަހު ހިނގި އެކްސިޑެންޓުގައި ލިބުނު ސީރިއަސް އަނިޔާތަކަށް ފަރުވާ ހޯދަމުން ދަނިކޮށެވެ. އާއިލާއިން މައުލޫމާތު ދޭ ގޮތުގައި އަބޫބަކުރުގެ ކަށުނަމާދު ބޭއްވުމަށް ހަމަޖެހިފައިވަނީ މިއަދުގެ އަސުރު ނަމާދަށް ފަހުގައެވެ.

މި ނުރައްކާތެރި އެކްސިޑެންޓް ހިނގާފައިވަނީ މިދިޔަ ހަފުތާގެ ތެރޭގައި އަބޫބަކުރު މަޣްރިބު ނަމާދުން ފައިބައިގެން އަސާގަނޑެއްގެ އެހީގައި މަގުމަތިން ހިނގާފައި ދަނިކޮށް ޕިކަޕެއްގައި ޖެހިގެންނެވެ. މި ހާދިސާގައި އޭނާ ޕިކަޕްގެ ދަށުވެ، ހަށިގަނޑުގެ ބޮޑު ބަޔަކަށް ވަނީ ނުރައްކާތެރި އަނިޔާތަކެއް ލިބިފައެވެ.

އެކްސިޑެންޓަށްފަހު އަބޫބަކުރު ޕިކަޕްގެ ދަށުން ނެރެގެން ފުރަތަމަ ފަރުވާ ދީފައިވަނީ ބ. އަތޮޅު ހޮސްޕިޓަލުގައެވެ. ނަމަވެސް ހާލަތު އިތުރަށް ގޯސްވަމުން ދިއުމާ ގުޅިގެން، އިތުރު ފަރުވާއަށް އޭނާ ވަނީ މާލެ ގެނެސް އައިޖީއެމްއެޗްގައި އެޑްމިޓްކޮށްފައެވެ.

މި މައްސަލައާ ގުޅިގެން އެކްސިޑެންޓްވި ޕިކަޕް ދުއްވަން އިން މީހާ މިހާރު ހުރީ ފުލުހުންގެ ބަންދުގައެވެ. ފުލުހުން ދަނީ މި ހާދިސާ ހިނގަން މެދުވެރިވި ސަބަބު އިތުރަށް ތަހުގީގު ކުރަމުންނެވެ.