އެމްއޭސީއެލް ގެ މުވައްޒަފުންގެ ދުޅަހެޔޮކަމާއި ސިއްހީ ރައްކާތެރިކަމަށް "ސްޓްރެޗިން ޕްރޮގްރާމް" ރަސްމީކޮށް އިފުތިތާހުކޮށްފި

މޯލްޑިވްސް އެއަރޕޯޓްސް ކޮމްޕެނީ (އެމްއޭސީއެލް) ގެ މުވައްޒަފުންގެ ދުޅަހެޔޮކަމާއި ސިއްހީ ރައްކާތެރިކަމަށް އަމާޒުކޮށްގެން "ސްޓްރެޗިން ޕްރޮގްރާމް" ރަސްމީކޮށް އިފުތިތާހުކޮށް، "ސްޓްރެޗް އެންޑް ވެލްނެސް"ގެ ނަމުގައި ހާއްސަ ފެއާއެއް މިއަދު ބާއްވައިފިއެވެ.

ހުޅުލޭގައި މިއަދު ބޭއްވި މި ފެއާއަކީ މަސައްކަތުގެ މާހައުލުގައި ދިމާވާ ސިއްހީ ނުރައްކާތަކަށް މުވައްޒަފުން ހޭލުންތެރިކުރުވުމަށާއި، ދުޅަހެޔޮ ދިރިއުޅުމުގެ އާދަތަކަށް ބާރުއެޅުމަށް ބޭއްވި ހަރަކާތެކެވެ. މީގެ އިތުރުން މަސްތަކާއި ކަށިތަކަށް ލިބޭ އަނިޔާތައް ކުރިއާލާ ދެނެގަނެ، އެފަދަ ކަންކަމުން ރައްކާތެރިވުމުގެ މުހިންމުކަން މުވައްޒަފުންނަށް ކިޔައިދިނުމަކީ ވެސް މި ފެއާގެ މައިގަނޑު އެއް މަގުސަދު ކަމަށް އެމްއޭސީއެލް އިން ބުނެއެވެ.

މި ފެއާގެ ތެރެއިން މިއަދު އިފުތިތާހުކުރި "ސްޓްރެޗިން ޕްރޮގްރާމް" އަކީ މަސައްކަތުގެ މާހައުލުގައި، ހާއްސަކޮށް އޮޕަރޭޝަނަލް ދާއިރާތަކުގައި މަސައްކަތްކުރާ މުވައްޒަފުން ގަވާއިދުން ކަސްރަތުކުރުމާއި އަނިޔާއިން ރައްކާތެރިވުމުގެ އާދަތައް އަށަގެންނެވުމަށް ފެށި މުހިންމު މަސައްކަތެކެވެ.

މި ފެއާ ކުރިއަށް ގެންގޮސްފައިވަނީ ސިއްހީ ދާއިރާގެ ގިނަ މުއައްސަސާތަކަކާއި ފިޓްނަސް ސެންޓަރުތަކެއްގެ އެހީތެރިކަމާ އެކުގައެވެ. އޭގެ ތެރޭގައި އޭޑީކޭ، ވެލްނެސް ކްލަބް މެނޭޖްޑް ބައި ހީޓް، ރިވައިވް ފިޓްނަސް، ފިޒިއޯ ސޮލިއުޝަންސް، އޭއެމްޑީސީ، ލެގަސީ ފިޓްނަސް، ޝީ، ތަސައްލީ މެޑިކަލް ކެއާ އަދި އެޗްޑީސީ ހިމެނެއެވެ.

ފެއާގެ ތެރޭގައި މުވައްޒަފުންނަށް ހާއްސަ ކޮމްބެޓް ފިޓްނެސް ސެޝަންއަކާއި ވޯކިން އެކްސަސައިޒް ދަސްކޮށްދޭ ސްޓޭޖް ހަރަކާތްތަކެއް ވަނީ ކުރިއަށް ގެންގޮސްފައެވެ. މީގެ އިތުރުން، ފެއާގައި ބައިވެރިވި ފަރާތްތަކުން ވަނީ މުވައްޒަފުންގެ ކަށިތަކާއި މަސްތަކުގެ ޓެސްޓުތައް ހިލޭ ހަދައިދީ، ހެލްތު ޕެކޭޖުތަކާއި ފިޓްނަސް ޕްރޮގްރާމްތަކުން ހާއްސަ ޑިސްކައުންޓުތަކެއް ވެސް ފޯރުކޮށްދީފައެވެ.

އެމްއޭސީއެލް އިން ބުނީ މިފަދަ ޕްރޮގްރާމްތަކުގެ ސަބަބުން މުވައްޒަފުންގެ ސިއްހީ ދުޅަހެޔޮކަން އިތުރުވެ، މަސައްކަތުގެ މާހައުލުގައި ލިބޭ އަނިޔާތައް މަދުކުރުމަށް ބޮޑު އެހީތެރިކަމެއް ލިބިގެންދާނެ ކަމަށެވެ.