ތިލަފުށީގައި ބީއެމްއެލްގެ އޭޓީއެމްގެ ޚިދުމަތް ރަސްމީކޮށް ފަށައިފި

ކ. ތިލަފުށީގައި މަސައްކަތްކުރާ ފަރާތްތަކަށާއި ވިޔަފާރިތަކަށް ބޭންކިންގ ޚިދުމަތް ހޯދުމުގައި ދިމާވާ ދަތިތަކަށް ހައްލެއް ހޯދައިދިނުމުގެ ގޮތުން، ބޭންކް އޮފް މޯލްޑިވްސް (ބީއެމްއެލް) އިން އެރަށުގައި އޭޓީއެމްގެ ޚިދުމަތް ރަސްމީކޮށް ފަށައިފިއެވެ.

ތިލަފުށީގައި ބޭއްވި ޚާއްސަ ރަސްމިއްޔާތެއްގައި މި ޚިދުމަތް ރަސްމީކޮށް ފަށްޓަވައިދެއްވީ އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދެވެ. މި ރަސްމިއްޔާތުގައި ބީއެމްއެލްގެ ޗެއާޕަރސަން އަޙްމަދު ޢަލީ ޙަބީބާއި، ބޭންކުގެ ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފްގެ އިތުރުން ބޭންކުގެ އިސްވެރިން ބައިވެރިވެވަޑައިގެންނެވިއެވެ.

މި ރަސްމިއްޔާތުގައި ވާހަކަފުޅު ދައްކަވަމުން ވަޒީރު މުޙައްމަދު ސަޢީދު ވިދާޅުވީ، ރާއްޖޭގެ އެންމެ ބޮޑު އެއް ސިނާޢީ ސަރަހައްދުގައި މި ޚިދުމަތް ޤާއިމްކުރެވިގެން ދިއުމަކީ ލިބިގެންދިޔަ ވަރަށް ބޮޑު ކުރިއެރުމެއް ކަމަށެވެ. އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިޔަފާރިވެރިންނާ ބައްދަލުކުރެއްވުމުން، އެފަރާތްތަކުން އެންމެ ބޮޑަށް އެދުނު އެއް ކަމަކީ ތިލަފުށީގައި އޭޓީއެމްގެ ޚިދުމަތް ޤާއިމްކޮށްދިނުން ކަން ވަޒީރު ފާހަގަކުރެއްވިއެވެ.

"މި ހިދުމަތާއެކު، ލޮޖިސްޓިކްސްގެ ގޮތުންނާއި އެހެނިހެން ބޭނުންތަކަށް ފައިސާ ނެގުމަށް މާލެއަށް ކުރަންޖެހޭ ދަތުރުތަކަށް ނިމުމެއް އަންނާނެ. މިއީ ތިލަފުށީގައި މަސައްކަތްކުރާ މުވައްޒަފުންނަށާއި ވިޔަފާރިތަކަށް ވަގުތާއި ހަރަދު ސަލާމަތްކުރެވޭނެ މުހިންމު ފިޔަވަޅެއް،" ވަޒީރު ވިދާޅުވިއެވެ.

ތިލަފުށީގައި ބަހައްޓާފައިވާ އޭޓީއެމް މެދުވެރިކޮށް 24 ގަޑިއިރު ފައިސާ ނެގުމާއި، ޖަމާކުރުމާއި، ބިލްތަކަށް ފައިސާ ދެއްކުމުގެ އިތުރުން ޓްރާންސްފަރ ކުރުމުގެ ޚިދުމަތް ލިބޭނެއެވެ. މިއީ "މުޅި ރާއްޖެއަށް ބީއެމްއެލް އޭޓީއެމް" މަޝްރޫއުގެ ދަށުން ކުރިއަށްގެންދާ މަސައްކަތެކެވެ.

ބީއެމްއެލްއިން ބުނި ގޮތުގައި، މިދިޔަ އަހަރުގެ ފެބްރުއަރީ މަހު ފެށި މި މަޝްރޫއުގެ ދަށުން، އެންމެ 9 މަސް ދުވަހުގެ ތެރޭގައި ރާއްޖޭގެ 20 އަތޮޅުގެ 105 ރަށެއްގައި ވަނީ އޭޓީއެމް ޤާއިމްކޮށްފައެވެ. އަދި މި މަޝްރޫއު ހިންގުމުގައި ޚަރަދު ކުޑަކުރުމަށް އިސްކަންދީގެން ކުރި މަސައްކަތުން، މީގެ ކުރިން އޭޓީއެމް ޤާއިމްކުރުމަށް ކުރާ ޚަރަދަށްވުރެ %33 ޚަރަދު ކުޑަކުރެވިފައިވާ ކަމަށްވެސް ބޭންކުން ބުނެއެވެ.