މިއީ ތަރައްޤީގެ އަސްލު އިހުސާސް ރައްޔިތުންނަށް ވެގެންދާނެ ބަދަލެއް - ވަޒީރު އިޙްސާން

ދެކުނުގެ އަތޮޅުތައް ސީޕްލޭންގެ ޚިދުމަތުން ގުޅާލުމަކީ ތަރައްޤީގެ އަސްލު އިހުސާސް ރައްޔިތުންނަށް ވެގެންދާނެ ބޮޑު ބަދަލެއް ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.

ވަޒީރު މިހެން ވިދާޅުވީ، ދެކުނުގެ 4 އަތޮޅު މޯލްޑިވިއަންގެ ސީޕްލޭންގެ ޚިދުމަތުން ގުޅުވާލުމަށްޓަކައި އައްޑޫ ސިޓީ، ގަން އިންޓަރނޭޝަނަލް އެއަރޕޯޓުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ. މި ރަސްމިއްޔާތުގައި ވަޒީރު ވަނީ ދެކުނުގެ ދަތުރުފަތުރުގެ ނިޒާމަށް މިހާތަނަށް އައިސްފައިވާ ބަދަލުތަކުގެ މައްޗަށް އަލިއަޅުއްވާލައްވާފައެވެ.

ވަޒީރު އިޙްސާން ވިދާޅުވީ، ދެކުނު އަތޮޅުތައް ސީޕްލޭނުން ގުޅާލުމަކީ އުމްރާނީ ވަސީލަތްތަކަށް އަންނަ ބަދަލުތަކާއެކު، އެތަންތަނުގެ އަސްލު މަންފާ ރައްޔިތުންނަށް ލިބޭނެ ފަދަ ތަޞައްވުރެއް ޤައުމުގެ ވެރިއަކު ގެންގުޅުއްވައި، އެކަން ހަގީގަތަކަށް ހެއްދެވުމަށް ކުރައްވާ މަސައްކަތެއް ކަމަށެވެ. ރާއްޖޭގައި ސީޕްލޭންގެ ޚިދުމަތާއި އެފަދަ ބޯޓުތައް އޮޕަރޭޓް ކުރެވޭނެ ވަސީލަތްތައް ހުންނަތާ އެތައް ޒަމާނެއް ވެފައިވީ ނަމަވެސް، މީގެ ކުރިން މި ޚިދުމަތް ދެކުނުގައި ފެށިފައިނުވާކަން ވަޒީރު ފާހަގަކުރެއްވިއެވެ.

މިއަދު މި ޚިދުމަތް ފެށިގެން މިދަނީ ރައްޔިތުންނަށް ޚިދުމަތެއް ދިނުމުން އެ ޚިދުމަތަކުން ރައްޔިތު މީހާގެ ދިރިއުޅުމަށް ފަސޭހަކަމެއް ގެނެސްދޭނެ ކަމުގެ އިހްސާސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ވެވަޑައިގަންނަވާތީ، ވަޒީރު 

މި ޚިދުމަތަކީ ރައީސުލްޖުމްހޫރިއްޔާ ދެކުނުގެ ރައްޔިތުންނާ ގާތުން ބައްދަލުކުރައްވައި، އެ ރައްޔިތުންގެ އިޙްސާސްތައް ދެނެވަޑައިގެން، ކަމާބެހޭ ކުންފުނިތަކަށް އިރުޝާދު ދެއްވައިގެން ފެއްޓެވި މަސައްކަތެއްކަން ވަޒީރު ފާހަގަކުރެއްވިއެވެ. މީގެ ސަބަބުން އެއް ރަށުން އަނެއް ރަށަށް ޚިދުމަތް ހޯދަން ދަތުރުކުރާ ރައްޔިތުންނަށް ބޮޑެތި ލުއިތަކެއް ލިބިގެންދާނެއެވެ.

ކަނޑު ދަތުރުފަތުރަށް އައި ބަދަލުތަކަށް އިޝާރާތް ކުރައްވަމުން ވަޒީރު ވިދާޅުވީ، މީގެ ކުރިން ކަނޑު ރަނގަޅު ދުވަސްވަރު ފަސް ގަޑިއިރުން ނުވަތަ ދޮޅު ގަޑިއިރުން ކުރި ދަތުރުތައް، މިހާރު 20 މިނެޓަށް ކުރުވެގެން ގޮސްފައިވާ ކަމަށެވެ. އަދި ކަނޑުގަދަވުމުގެ ސަބަބުން ދަތުރުތައް މެދުކަނޑާލަންޖެހުމާއި، ދިގުލައިގެންދިއުމުގެ ސަބަބުން ރައްޔިތުންނަށް ދިމާވި ތަކުލީފުތަކަށް މި ނިންމުމާއެކު ނިމުމެއް އަންނާނެ ކަމަށް ވިދާޅުވިއެވެ. "މިއީ އަޅުގަނޑުމެންގެ ހަޔާތަށް ތަރައްގީއޭ މިކިޔާ އަސްލު އިހުސާސްވާކަހަލަ ބަދަލެއް ގެނެވޭ ނިންމުމެއް،" ވަޒީރު ވިދާޅުވިއެވެ.

މީގެ އިތުރުން، ފަތުރުވެރިކަމުގެ ދާއިރާއަށް ކުރާނެ ފައިދާއާ ގުޅޭގޮތުން ވާހަކަދައްކަވަމުން ވަޒީރު ވިދާޅުވީ، ދެކުނުގައި ފަތުރުވެރިން މަޑުކުރާ ރޭގެ އަދަދު (ބެޑްނައިޓްސް) އިތުރުކުރުމަށް މި ޚިދުމަތަކީ ވަރަށް މުހިންމު ފުރުސަތެއް ކަމަށެވެ. އެކި ރަށްރަށަށް ފަސޭހައިން ދަތުރުކުރެވޭނެ ގޮތް ވުމަކީ ދެކުނުގެ ގުޅިފައިވާ ޓޫރިޒަމްގެ "އިކޯ ސިސްޓަމެއް" ބިނާވެގެންދާނެ ކަމެއް ކަމަށްވެސް ވަޒީރު ޢަލީ އިޙްސާން ވިދާޅުވިއެވެ.