ކިޑްނީ އާއި ފުރަމޭގެ ބަލިތައް ހުންނަ މީހުން ދުރުހެލިވާންޖެހޭ ސަޕްލިމެންޓްތައް

ގިނަ ބަޔަކު ގަބޫލުކުރާ ގޮތުގައި ސަޕްލިމެންޓްތަކަކީ ގުދުރަތީ އެއްޗެހި ކަމަށްވާތީ އެއީ ބޭނުންކުރަން ރައްކާތެރި އެއްޗެހިތަކެކެވެ. ނަމަވެސް، ސިއްހީ މާހިރުން އިންޒާރު ދެއްވާ ގޮތުގައި ބައެއް ކަހަލަ ޑައިޓަރީ އަދި ހާބަލް ސަޕްލިމެންޓްތަކުގެ ސަބަބުން ބަލިކަށިވެފައިވާ ގުރުދާ (ކިޑްނީ) އާއި ފުރަމޭ (ލިވަރ) އަށް އިތުރު ބުރަބޮޑުވެ، ނުރައްކާތަކާ ކުރިމަތިވެއެވެ. ޚާއްޞަކޮށް، ޑޮކްޓަރެއްގެ ލަފާނެތި މިންވަރަށްވުރެ ގިނައިން ސަޕްލިމެންޓް ބޭނުންކުރުމަކީ މި ގުނަވަންތަކަށް ފޫނުބެއްދޭވަރުގެ ބޮޑެތި ގެއްލުންތަކެއް ލިބިދާނެ ކަމެކެވެ.

ގުރުދާ އާއި ފުރަމޭގެ ބަލިތައް ހުންނަ މީހުން ޚާއްޞަކޮށް ދުރުހެލިވާންޖެހޭ ސަޕްލިމެންޓްތަކުގެ ތެރޭގައި ހިމެނެނީ:

ގްރީން ޓީ އެކްސްޓްރެކްޓް: ސައިފަތުގެ ގޮތުގައި ގްރީން ޓީ ބޭނުންކުރުމަކީ ރައްކާތެރި ކަމެއް ނަމަވެސް، ކެޕްސޫލް ނުވަތަ ގުޅަ ބޭނުންކުރާއިރު އޭގައި ހުންނަ މާއްދާތައް ގިނަވުމުގެ ސަބަބުން ފުރަމޭ ދުޅަވެ، ބޮޑެތި ގެއްލުންތައް ލިބެއެވެ.

ޕްރޮޓީން ޕައުޑަރު: ބޭނުންވާ މިންވަރަށްވުރެ ގިނައިން ޕްރޮޓީން ބޭނުންކުރުމަކީ ގުރުދާގެ މައްސަލަ ހުންނަ މީހުންނަށް ނުރައްކާތެރި ކަމެކެވެ. މީގެ ސަބަބުން ގުރުދާއަށް ކުރާ ބާރު ބޮޑުވެ، ބަލި އިތުރަށް ގޯސްވެއެވެ.

މިންވަރަށްވުރެ ގިނަ ވިޓަމިން (އޭ،ޑީ،އީ،ކޭ): ތެލަށް ގިނަވާ މި ވިޓަމިންތަކަކީ ހަށިގަނޑުގައި ޖަމާވާ އެއްޗެއްސެވެ. މީގެ ތެރެއިން ވިޓަމިން އޭ ގިނަވުމަކީ ފުރަމޭއަށް ސީދާ ގެއްލުންދޭ ކަމެކެވެ.

އަޔަން (ދަގަނޑު) ސަޕްލިމެންޓް: ޓެސްޓު ކުރުމެއް ނެތި އަޔަން ސަޕްލިމެންޓް ބޭނުންކުރުމުން ފުރަމޭގައި ދަގަނޑުގެ މާއްދާ ގިނަވެ، 'ހީމޯކްރޮމަޓޯސިސް' ފަދަ ނުރައްކާތެރި ބަލިތަކަށް މަގުފަހިވެއެވެ.

ގެއްލުންދެނިވި ހާބަލް ބޭސްތައް: 'ކޮމްފްރީ'، 'ބްލެކް ކޯހޮޝް' އަދި 'ގާސީނިއާ ކެމްބޯޖިއާ' ފަދަ ތަކެއްޗަކީ ފުރަމޭއަށް ނުރައްކާތެރި އެއްޗެހިކަން ދިރާސާތަކުން ވަނީ ދައްކާފައެވެ.

ލިކޮރިޝް ރޫޓް : މީގެ ސަބަބުން ލޭގެ ޕްރެޝަރ (ބްލަޑް ޕްރެޝަރ) މަތިވެ، ހަށިގަނޑުން ޕޮޓޭސިއަމް މަދުވެއެވެ. މިއީ ގުރުދާ އާއި ހިތުގެ ބަލިމީހުންނަށް ނުރައްކާތެރި ކަމެކެވެ.

ޕޮޓޭސިއަމް ނުވަތަ ފޮސްފަރަސް ހުންނަ ސަޕްލިމެންޓް: ގުރުދާގެ ބަލި ހުންނަ މީހުންގެ ހަށިގަނޑުގައި މި މާއްދާތައް ނުރައްކާތެރި މިންވަރަކަށް މަތިވުމުގެ ފުރުސަތު އޮވެއެވެ.

ބަރުދަން ލުއިކުރާ އަދި ޑިޓޮކްސް އުފެއްދުންތައް: ސައްހަކަން ކަށަވަރުނުވާ މިފަދަ އުފެއްދުންތަކުގައި ހުންނަ ނޭނގޭ މާއްދާތަކުގެ ސަބަބުން ފުރަމޭ އާއި ގުރުދާގެ މަސައްކަތަށް ބުރޫއަރައެވެ.

ކަންމިހެން ހުރުމާއެކު، ހަށިގަނޑުން ވިހަ މާއްދާތައް ބޭރުކޮށްދޭ މައިގަނޑު ދެ ގުނަވަން ކަމަށްވާ ގުރުދާ އާއި ފުރަމޭ ބަލިކަށިވެފައިވާނަމަ، އެއްވެސް ކަހަލަ ސަޕްލިމެންޓެއް ބޭނުންކުރުމުގެ ކުރިން ޑޮކްޓަރެއްގެ ލަފާ ހޯދުމަކީ ކޮންމެހެން ކުރަންޖެހޭ ކަމެކެވެ. ސަޕްލިމެންޓްތަކަކީ އާންމު ބޭސްތަކާ އެއްވަރަށް ފެންވަރު ހިފެހެއްޓުމަށް ބެލޭ އެއްޗެއްސަށް ނުވާތީ، އޭގައި ނުރައްކާތެރި މާއްދާތައް ހިމެނުމުގެ ފުރުސަތު އޮވެއެވެ. އެހެންކަމުން، ސިއްހަތަށް ރައްކާތެރިވުމުގެ ގޮތުން މިފަދަ ތަކެތި ބޭނުންކުރުމުގައި ނުހަނު ސަމާލުވާންޖެހެއެވެ.