ދަރަވަންދޫ އެއާޕޯޓުގެ ރަންވޭ ބޮޑުކުރުމަށް ބިން ހިއްކުމަށް އުޅޭކަމަށް ބުނެ ދައްކަމުންދާ ވާހަކަތައް ސަރުކާރުން ދޮގުކޮށްފި

ބ. ދަރަވަންދޫ އެއާޕޯޓުގެ ރަންވޭ ބޮޑުކުރުމަށް ބިން ހިއްކުމަށް އުޅޭކަމަށް ބުނެ ދައްކަމުންދާ ވާހަކަތައް އަދުގެ ސަރުކާރުން ދޮގުކޮށްފި އެވެ.

މިކަމާއި ގުޅިގެން އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބު "އެކްސް" ގައި ކުރެއްވި ޕޯސްޓެއްގައި ވިދާޅުވީ، ދަރަވަންދޫ ބިން ހިއްކުމުގެ އެއްވެސް މަޝްރޫޢެއް ކުރިއަށް ނުގެންދާ ކަމަށެވެ. ހަމަ އެހެންމެ، މިދިޔަ އަހަރުގެ މެދުތެރޭގައި ޕްރިލިމިނަރީ ކޮންސެޕްޓެއް ދިރާސާ ކުރި ނަމަވެސް، ދަރަވަންދޫ ބިން ހިއްކުމުގެ އެއްވެސް މަޝްރޫޢަކަށް އަދި ހުއްދަ ދީފައި ނުވާކަން ވަޒީރު ފާހަގަކުރެއްވިއެވެ. އަދި އެފަދަ ޕްރޮޖެކްޓެއް އޮތްނަމަ، ރަށު ކައުންސިލާ ރަސްމީކޮށް މުޢާމަލާތްކޮށް ޕްރޮޖެކްޓްގެ އެއްބަސްވުމެއް އެކުލަވާލާނެކަމަށް ވަޒީރު ވިދާޅުވިއެވެ.

މީގެ އިތުރުން މި ޙަޤީގަތެއް ނެތް ވާހަކަތަކަށް ރައްދު ދެއްވަމުން ދަތުރުފަތުރާއި މަދަނީ އުދުހުންތަކާއި ބެހޭ ވަޒީރު މުހައްމަދު އަމީން ވިދާޅުވީ، ދަރަވަންދޫ އެއާޕޯޓުގެ ރަންވޭ ދިގުކުރުމަށް ބޭނުންވާ ބިން ހިއްކުމުގެ އެއްވެސް މަޝްރޫޢެއް މި ވަގުތު ސަރުކާރުން ރާވާފައި ނެތް ކަމަށެވެ. ހަމަ އެހެންމެ، އަދުގެ ސަރުކާރުން އިސްކަންދެނީ ދަރަވަންދޫ އެއާޕޯޓުގައި މިހާރު ހުރި ވަޞީލަތްތައް އިތުރަށް ތަރައްޤީކުރުމަށް ކަމަށް ވަޒީރު އަމީން ވަނީ ވިދާޅުވެފައެވެ.

ދަރަވަންދޫ އަކީ، އެ ސަރަޙައްދުގައި މަޝްހޫރު 'ހަނިފަރު-ބޭ' އާ ކިލޯމީޓަރެއްހާ ދުރުގައި އޮންނަ ރަށެއްކަމުން އެތަނަކަށް ގެއްލުންވާނެހެން އެ ސަރަޙައްދުގައި އެއްވެސް މަޝްރޫޢެއް ނުހިންގުމަށް ރައްޔިތުން ވަނީ އެދިފައެވެ.

ކޯސްޓްލައިން ހޮޓެލްސް އެންޑް ރިސޯޓްސްއިން ތަރައްޤީކުރުމަށްފަހު، 2012 ވަނަ އަހަރުގެ އޮކްޓޫބަރު މަހުގެ 17 ވަނަ ދުވަހު ހުޅުވި ދަރަވަންދޫ އެއާޕޯޓު މިހާރު އޮޕަރޭޓް ކުރަމުން އަންނަނީ އައިލޭންޑް އޭވިއޭޝަނުންނެވެ.