ނެޝަނަލް ހެލްތު ލެބޯޓަރީ އިމާރާތް ކުރުމަށްޓަކައި އަންނަ ޖުލައި މަސްތެރޭގައި ބީލަމަށް ހުޅުވާލަނީ

ނެޝަނަލް ހެލްތު ލެބޯޓަރީ އިމާރާތް ކުރުމަށްޓަކައި އަންނަ ޖުލައި މަސްތެރޭގައި ބީލަމަށް ހުޅުވާލެވޭނެ ކަމަށް ޞިއްޙީ ވަޒީރު ޢަބްދުﷲ ނާޘިމް އިބްރާހިމް ވިދާޅުވެއްޖެއެވެ.

ވަޒީރު މިފަދައިން ވިދާޅުވީ، ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުމުގައި ވާހަކަދުޅު ދައްކަވަމުންނެވެ.

ނެޝަނަލް ހެލްތު ލެބޯޓަރީ ޑިޒައިންކޮށް ފީސިބިލިޓީ ސްޓަޑީ ހެދުމާއި ކޮންސަލްޓަންސީގެ ޚިދުމަތް ހޯދުމަށް ބައިނަލްއަޤްވާމީ ވާދަވެރި ބީލަމަކަށް ހުޅުވާލައިގެން ޓެންޑަރކޮށް ހޮވިފައިވާ ޖަރުމަނުގެ ކުންފުނި "ޖައިޓެކް" އާއިއެކު ޞިއްޙީ ވުޒާރާއިން 09 ނޮވެމްބަރ 2025 ގައި ވަނީ އެއްބަސްވުމެއްގައި ސޮއިކޮށްފައެވެ. މި މަސައްކަތް ކުރުމަށް 1.2 މިލިޔަން ޑޮލަރަށް އެކުންފުންޏަށް ހަވާލުކޮށްފައިވާއިރު، މަސައްކަތުގެ ބޮޑުބައި ނިމިފައިވާކަން ވަޒީރު ވަނީ ފާހަގަކުރައްވާފައެވެ.

ނެޝަނަލް ހެލްތު ލެބޯޓަރީގެ މައިގަނޑު މަސައްކަތްތަކުގެ ތެރޭގައި ކާބޯތަކެއްޗާއި ބޭހުގެ ރައްކާތެރިކަމާއި ފެންވަރު ދެނެގަތުމަށް ކުރަންޖެހޭ ކެމިކަލް އަދި މައިކްރޯބައޮލޮޖިކަލް ތަހުލީލުތައް ކުރުމާއި، ލެބޯޓަރީގައި ކުރާ ޓެސްޓްތަކަކީ ބައިނަލްއަޤްވާމީ ފެންވަރުގެ ޓެސްޓްތަކެއް ކަމުގައި ހެދުމަށް ކުރަންޖެހޭ މަސައްކަތްތައް ކުރުމާއި، ރާއްޖޭގެ މަސްވެރިކަމާއި، ފަތުރުވެރިކަމުގެ ސިނާޢަތާއި އަދި މިނޫންވެސް އެކި މުއައްސަސާތަކުގެ ބޭނުންތަކަށް ކުރަންޖެހޭ ތަޙުލީލުތައް ކުރުން ހިމެނެއެވެ.

ވަޒީރު ވިދާޅުވީ، މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އަށް މި އަހަރާއި އަންނަ އަހަރު ގެނެވޭ އެންމެ ބޮޑު ކުރިއެރުމަކީ ޤައުމީ ޞިއްޙީ ލެބޯޓަރީ ޤާއިމްކުރުމުގެ މަސައްކަތް ކަމަށެވެ. ސަބަބަކީ މިހާރު ޤައުމީ ލެބޯޓަރީ ހިންގަނީ ޞިއްޙީ ވުޒާރާ ހިންގަމުންދާ އިމާރާތުގައި ކަމަށާއި، މި އިމާރާތަކީ މިފަދަ ތަނެއް ހިންގުމަށް ޖާގައިގެ ގޮތުންނާއި އެހެނިހެން ގޮތްތަކުންވެސް އެންމެ އެކަށީގެންވާ އިމާރާތެއް ނޫންކަމަށް ވަޒީރު ވިދާޅުވިއެވެ.

ވަޒީރު އިތުރަށް ވިދާޅުވީ، އަލަށް އިމާރާތް ކުރުމަށް ހަމަޖެހިފައިވާ ނެޝަނަލް ހެލްތު ލެބޯޓަރީއަކީ 9 ފަންގިފިލާގެ އިމާރާތެއް ކަމަށެވެ. އަދި ޖާގަ ތަނަވަސް މި ލެބޯޓަރީން ދޭވޭނެ ޚިދުމަތްތަކުގެ ތެރޭގައި ވައިރޮލޮޖީ ރިސްކު ލެވެލް 2 އަދި 3 ގެ ވައިރަސްތައް ތަހުލީލުކުރުމާއި، ބެކްޓޮރޮލޮޖީގެ ދާއިރާއިން ބެކްޓީރީއާއި ގުޅުންހުރި ތަހުލީލުތައް ކުރުމުގެ އިތުރުން ކާބޯތަކެއްޗާއި ބޭސް ތަހުލީލު ކުރުމުގެ މަސައްކަތް އިތުރަށް ފުޅާވެގެންދާނެކަމަށް ވަޒީރު ވިދާޅުވިއެވެ.