މެލޭޝިޔާގައި ހުންނަ ދިވެހިރާއްޖޭގެ ހައިކޮމިޝަނުން އިންތިޒާމްކޮށްގެން 'އިޤްރައުލް ޤުރްއާން' ގެ ނަމުގައި މުބާރާތެއް ބާއްވައިފި

މެލޭޝިޔާގައި ހުންނަ ދިވެހިރާއްޖޭގެ ހައިކޮމިޝަނުން އިންތިޒާމްކޮށްގެން 'އިޤްރައުލް ޤުރްއާން 1447' ގެ ނަމުގައި މުބާރާތެއް ބާއްވައިފި

އިޤްރައުލް ޤުރްއާން މުބާރާތަކީ އެހެން އަހަރުތަކެކޭވެސް އެއްގޮތަށް މެލޭޝިޔާގައި ހުންނަ ދިވެހި ހައިކޮމިޝަނުން އިންތިޒާމްކޮށްގެން ކޮންމެ ރަމަޟާން މަހަކު މެލޭޝިޔާގައި ދިރިއުޅޭ ދިވެހި ދަރިވަރުންނަށް އަމާޒުކޮށްގެން ބާއްވަމުން އަންނަ މުބާރާތެކެވެ. މި އަހަރުގެ މުބާރާތުގައި އެކި އުމުރުފުރާއިން 5 ކެޓަގަރީއަކުން ޖުމްލަ 42 ކުދީން ބައިވެރިވެފައިވެއެވެ. މި މުބާރާތުގެ މަޤްޞަދަކީ، މޭލޭޝިޔާގައި ދިރިއުޅޭ ދަރިވަރުންގެ ހިތްތަކުގައި ކީރިތި ޤުރުއާނާ މެދު ލޯބި އުފައްދާ، ތަޖުވީދުމަގުން ޤުރުއާން ކިޔެވުމަށް ބާރުއަޅައި، ދިރިއުޅުމުގައި ޤުރުއާނުގެ މުހިންމުކަން އަންގައިދީ ހަނދާން ކޮށްދިނުމެވެ.

މުބާރާތުގެ ބައިވެރިންނާއި އަދި ބެލެނިވެރިންނާ މުޚާތަބްކުރައްވާ ވާހަކަފުޅުދައްކަވަމުން މެލޭޝިޔާއަށް ކަނޑައަޅާފައި ހުންނަވާ ދިވެހިރާއްޖޭގެ ސަފީރު، ޑރ. މަރިޔަމް ޝަބީނާ އަޙްމަދު ވަނީ، މުބާރާތުން ވަނަވަނައަށް ދިޔަ ދަރިވަރުންނަށް މަރްޙަބާ ދަންނަވައި، މުބާރާތުގައި ބައިވެރިވި ހުރިހާ ދަރިވަރުންނަށް އައްސަރިބަހާއި ސާބަސްދެއްވާފައެވެ. އަދި ކާމިޔާބީއަކީ ހަމައެކަނި ލިބޭ މެޑެއްޔެއް ނޫންކަމާއި އަސްލު ކާމިޔާބީއަކީ ކީރިތި ޤުރުއާނާ ގާތްވުމަށް ދަރިވަރުން ކުރެއްވި މުހިންމު މަސައަކަތް ކަމުގައި ސަފީރު ފާހަގަކުރެއްވި އެވެ.

މީގެ އިތުރުން، ސަފީރު ވިދާޅުވިގޮތުގައި ދިވެހިރާއްޖެއާ ދުރުގައި، ބޭރު ޤައުމެއްގައި ދިރިއުޅޭއިރު، ދިވެހީންގެ ދީނީ ސަގާފަތް ހިފެހެއްޓުމަކީ ވަރަށް މުހިއްމު ކަމެއްކަމާއި، ޚާއްޞަކޮށް ކީރިތި ޤުރުއާނަކީ އަޅުގަނޑުމެންގެ ދިރިއުޅުމުގެ ކޮންމެ ފިޔަވަޅެއްގައިވެސް މަގުދައްކައިދޭ ނޫރު ކަމުގައި ވިދާޅުވިއެވެ. އަދި އަޅުގަނޑުމެންގެ އީމާންތެރިކަން ވަރުގަދަކޮށްދީ، ރަނގަޅު މަގުގައި ސާބިތުކަމާއެކު ތިބުމަށްޓަކައި ކީރިތި ޤުރުއާނުގައި ހިފެހެއްޓުމަކީ ކޮންމެހެން ކުރަންޖެހޭނެ ކަމެއް ކަމަށް ވިދާޅުވިއެވެ.

ޚާއްޞަކޮށް ބަރަކާތްތެރި ރަމަޟާން މަހަކީ ޤުރުއާނުގެ މައްސަރުކަން ހަނދާންކުރަންޖެހޭ ކަމަށާއި، މި ބަރަކާތްތެރި މައްސަރުގައި ޤުރުއާން ކިޔެވުމާއި، އޭގެ މާނަ ދެނެގަތުމަށް އިތުރު ވަގުތު ހުސްކުރުމަކީ އަޅުގަނޑުމެންގެ ރޫޙާނީ ދިރުން އިތުރުކޮށްދޭނެ ކަމެއް ކަމުގައި ސަފީރު ވިދާޅުވިއެވެ. ސަފީރުގެ ވާހަކަ ފުޅުގައި ފާހަގަކުރެއްވި މުހިންމު އެއްކަމަކީ، ހައިކޮމިޝަނުން އިންތިޒާމްކޮށްގެ ބާއްވަން ފެށުނު މި ޤުރުއާން މުބާރާތް ފެށިފަހުން އަހަރަކަށްފަހު އަހަރެއް މި މުބާރާތުގައި ބައިވެރިވާ ކުދީންގެ އަދަދު ގިނަވަމުންދާކަމެވެ. އަދި އެކަމަށްޓަކައި ބެލެނިވެރީންނަށް ސަފީރު ޝުކުރު ދަންނަވައި ދަރިންނަށް ދީނީ ތަރުބިއްޔަތު ދިނުމަކީ މުޅި މުޖުތަމަޢަށް އޭގެ ފައިދާ ކުރާނެ ކަމެއް ކަމުގައި ވިދާޅުވިއެވެ.

ސަފީރު އިތުރަށް ވިދާޅުވީ، މެލޭޝިޔާގައި ދިރިއުޅޭ ދަރިވަރުންނަށް ޤުރުއާން ކިޔަވައިދިނުމަކީ ހައިކޮމިޝަނުގެ ފަރާތުން ވަރަށް މުހިންމުކަމެއް ދޭކަމެއް ކަމާއި، މިގޮތުން، ކީރިތި ޤުރުއާނާ ބެހޭ ޤައުމީ މަރުކަޒުން އޮންލައިކޮށް ކިޔަވައިދެމުން އައި ޤުރުއާން ކްލާހަށް މިދިޔަ އަހަރުގެ އޮކްޓޯބަރު މަހުން ފެށިގެން ބަދަލުގެނެވި، މިހާރު އެކްލާސްތައް ހައިކޮމިޝަނުގެ ދަށުން ޤާއިމް ކުރެވިފައިވާ މޯލްޑިވްސް ސެންޓަރުން ސީދާ ބަލަހައްޓާގޮތަށް ހަމަޖެހިފައިވާ ކަމަށެވެ.

މިފަހަރުގެ މުބާރާތުގެ އިންތިޒާމްތައް ހަމަޖެހިފައިވަނީ އެހެން އަހަރުތަކުގައި ބާއްވަމުން އަންނަ ޤުރުއާން މުބަރާތާ ތަފާތުކޮށް، ޒަމާނަށް އައިސްފައިވާ ހެޔޮ ބަދަލާއެކު ޓެކްނޮލޮޖީގެ އެހީ ބޭނުންކޮށްގެންކަމަށް ޚާރިޖީ ވުޒާރާއިން މަޢުލޫމާތުދެއެވެ. މީގެއިތުރުން، މިއަހަރުގެ މުބާރާތުގައި "ޚާއްޞަ ކެޓަގަރީ" ގެ ނަމުގައި ޚާއްޞަ އެހީއަށް ބޭނުންވާ ދަރިވަރުންނަށް މުބާރާތުގައި ބައިވެރިވުމަށް ފުރުޞަތު ހުޅުވާލާފައިވާއިރު، ކުރިއަށް އޮންނަ މުބާރާތްތަކުގައި ވެސް މި ކެޓަގަރީ ހިމެނިގެންދާނެކަމަށް އެ ވުޒާރާއިން ވަނީ ވިދާޅުވެފައެވެ.

މި މުބާރާތް އިންސާފްކޮށްދެއްވީ މެލޭޝިޔާގައި ދިރިއުޅޭ ކޮމިއުނިޓީގެ ފަރާތުން 2 ބޭފުޅެކެވެ. ހަމަ އެހެންމެ، މެލެޝިޔާގެ އިންޓަރނޭޝަމަލް އިސްލާމިކް ޔުނިވާރސިޓީ (އައި.އައި.ޔޫ.އެމް) ގެ ފަރާތުން ޚާއްޞަ އޮބްޒާވަރެއް ވަނީ މިމުބާރާތުގައި ބައިވެރިވެފައެވެ.

މި މުބާރާތުގެ ވަނަތައް ހާޞިލްކުރި ދަރިވަރުންނަށް ޓްރޮފީ، މެޑަލް އަދި ސެޓްފިކެޓް ދީފައިވާއިރު، ހުރިހާ ކެޓަގަރީއަކުން އެއް ވަނަ ހާޞިލް ކުރައްވާފައިވާ ދަރިވަރުންނަށް އިނާމު ދެއްވީ ސަފީރު، ޑރ. މަރިޔަމް ޝަބީނާ އަހުމަދެވެ.