ތިން އަހަރަށްފަހު އެފްއޭއެމްގެ އޯޑިނަރީ ކޮންގްރެސް ބާއްވައިފި

ރާއްޖޭގެ ފުޓުބޯޅައިގެ މައި އިދާރާ، ފުޓުބޯޅަ އެސޯސިއޭޝަން އޮފް ދަ މޯލްޑިވްސް (އެފްއޭއެމް)ގެ އޯޑިނަރީ ކޮންގްރެސް ތިން އަހަރަށްފަހު އިއްޔެ ބާއްވައިފިއެވެ.

މީރުމާ ހޮޓަލުގައި ބޭއްވި މި ބައްދަލުވުމުގައި އެފްއޭއެމްގެ މެންބަރު ގިނަ ކްލަބުތަކެއް ބައިވެރިވިއެވެ. އެގޮތުން މި ސީޒަންގައި ފުރަތަމަ ޑިވިޝަން ކުޅުނު 10 ޓީމުގެ ތެރެއިން 8 ޓީމެއް ބައިވެރިވިއެވެ. އަދި ދެވަނަ ޑިވިޝަނުގެ 14 ކްލަބުގެ ތެރެއިން 11 ކްލަބެއް ވަނީ ބައިވެރިވެފައެވެ.

މި ކޮންގްރެސްގައި ފުރަތަމަ ޑިވިޝަނުގެ ކޮންމެ ޓީމަކުން ދެ މަންދޫބަކު ބައިވެރި ކުރުމުގެ ފުރުސަތު ލިބޭއިރު، ދެވަނަ ޑިވިޝަނަށް ލިބެނީ އެއް ފުރުސަތެވެ. މި މަންދޫބުންނާއެކު ކޮންގްރެސްގެ ކޯރަމް ހަމަކުރުމަށް 16 މަންދޫބުން ބޭނުންވެއެވެ.

މި ކޮންގްރެސްގައި ޖުމްލަ 18 ކަމެއް ހުށަހަޅާފައިވެއެވެ. މީގެތެރެއިން ވޯޓަށް އެހި ހުރިހާ ކަމެއް ވެސް، ކޮންގްރެސްގައި ބައިވެރިވި މެމްބަރުންގެ އަގުލަބިއްޔަތުން ވަނީ ފާސްކޮށްފައެވެ. 

އޭގެ ތެރޭގައި، އެފްއޭއެމްގެ 2026 ވަނަ އަހަރު ބަޖެޓު ފާސްކުރުން ވެސް ހިމެނެއެވެ. އެފްއޭއެމް އިން ފާސްކޮށްފައި ވަނީ 48،458،511ރ ގެ ބަޖެޓެކެވެ.

އެފްއޭއެމްއިން އެންމެ ފަހުން އޯޑިނަރީ ކޮންގްރެސްއެއް ބާއްވާފައި ވަނީ 2023ވަނަ އަހަރުގެ މެއި މަހުއެވެ. ނަމަވެސް ނޯމަލައިޒިން ކޮމިޓީއާ އެފްއޭއެމްގެ ހިންގުން ހަވާލުކުރިފަހުން މިދިޔަ އަހަރުގެ ތެރޭގައި ތިން ފަހަރެއްގެ މަތިން އެކްސްޓްރާއޯޑިނަރީ ކޮންގްރެސްތަކެއް ބާއްވާފައިވެއެވެ.