އާރްޓީއެލް ފެރީއެއްގެ ތެރޭގައި އަންހެނަކު ދުވަސްނުފުރާ ވިހައިފި

އާރްޓީއެލް ފެރީއެއްގެ ތެރޭގައި އަންހެނަކު ދުވަސް ނުފުރާ ވިހައިފިއެވެ.

މިކަމަކީ ގދ. ވާދޫ އިން ގދ.ތިނަދޫ އަށް ދަތުރުކުރި އާރްޓީއެލް ފެރީއެއްގެ ތެރޭގައި ހިނގި ކަމެކެވެ.

ފެރީގެ ތެރޭގައި ދުވަސްނުފުރާ ވިހެއި އަންހެނަކީ ގދ.ވާދޫ ޖަމާލުއްދީން ސްކޫލްގައި މަސައްކަތް ކުރާ އިންޑިއާ އަށް ނިސްބަތްވާ މުދައްރިސެކެވެ. އޭނާ ވިހެއީ ބަނޑަށް 17 ހަފްތާގައި ކަމަށާއި ވިހޭއިރުވެސް ކުއްޖާ މަރުވެފައިވާ ކަމަށް މީޑިތަކުން ބުނެފައިވެއެވެ. 

މިކަމާއި ގުޅޭގޮތުން “އާރްޓީއެލް ޒޯން 5” އޮޕަރޭޝަންސް އިން މީޑިއާ އަކަށް މަޢުލޫމާތު ދެމުން ބުނެފައިވަނީ ގދ.ވާދޫ އިން ގދ.ތިނަދޫ އަށް ދަތުރުކުރުމަށް މާބަނޑު އަންހެނަކު އައުމުން މޫސުން ގޯސް ދުވަހެއް ކަމުން ދަތުރުކުރުން ރައްކާތެރި ނޫން ކަމަށް އެއޮޕަރޭޝަނުން އިރުޝާދު ދީފައިވާކަމަށެވެ. 

ނަމަވެސް އެއިރުޝާދާއި ދެކޮޅަށް އަންހެން މީހާ ދަތުރުކުރަން ބޭނުންވުމުން ވާދޫ ޞިއްޙީ މަރުކަޒުން ޑޮކްޓަރަކާއި ނަރުހަކު ހަމަޖައްސައި ދަތުރު ފެށިކަމަށެވެ. އަދި ދަތުރު ފެށިތާ 25 ހަކަށް މިނިޓް ފަހުން އަންހެން މީހާގެ ބަނޑުގައި ރިއްސަން ފެށުމުން އޭނާ އާއި އެކު ދަތުރުކުރި ޑޮކްޓަރާއި ނަރުސް އޭނާއަށް ފަރުވާދޭން ފެށި ކަމަށާއި، ނަމަވެސް މާގިނަ އިރުތަކެއް ނުވެ އެއަންހެން މީހާ ވިހައިފައިވާކަމަށެވެ. 

އަދި ވިހޭއިރުވެސް ކުއްޖާ ނިޔާވެފައިވާ ކަމަށާއި، އަންހެން މީހާއާއި ހަވާލުވި ޑޮކްޓަރާއި ނަރުހުގެ އިތުރުން އެފެރީގައި އޭރު ދަތުރުކުރި ދިވެހި ޑޮކްޓަރަކުވެސް އަންހެން މީހާއާއި ތުއްތު ކުއްޖާއަށް ފަރުވާ ދިނުމަށް މަސައްކަތް ކޮށްފައިވާ ކަމަށް އާރްޓީއެލް ޒޯން 5 އިން ވަނީ ބުނެފައެވެ. 

އެދިވެހި ޑޮކްޓަރަކީ އެމްއެންޔޫ އިން އެންމެ ފުރަތަމަ ގްރެޖުއޭޓްވި ޑޮކްޓަރުންގެ ތެރެއިން ޑޮކްޓަރެއްކަމަށްވެސް ވަނީ ބުނެފައެވެ. 

މިހާދިސާއަށް ފަހު އެއަންހެން މީހާ ވަނީ ތިނަދޫ ޑރ ޢަބްދުޞަމަދު މެމޯރިއަލް ހޮސްޕޮޓަލަށް ގެންގޮސް ފަރުވާދޭން ފަށައިފައެވެ. އަދި މިހާރު އޭނާގެ ޙާލު ރަނގަޅު ކަމަށްވެސް ވަނީ މަޢުލޫމާތުި ލިބިފައިވެއެވެ.