ރޮބްލޮކްސް އިން 13 އަހަރުން ދަށުގެ ކުދިންނަށް މެސެޖު ކުރުން މަނާކުރަނީ

އޮންލައިން ގޭމިންގ ޕްލެޓްފޯމް ރޮބްލޮކްސް އިން ކުޑަކުދިން ރައްކާތެރިކުރުމަށް އަޅާ ފިޔަވަޅުތަކުގެ ތެރެއިން 13 އަހަރުން ދަށުގެ ކުދިންނަށް އެހެން ފަރާތްތަކާ މެސެޖު ކުރުން މަނާކުރާނެ ކަމަށް އިއުލާނު ކޮށްފިއެވެ.

މި ބަދަލާ އެކު، ކުޑަކުދިންނަށް ގޭމްތަކުގައި ސީދާ މެސެޖު ކުރެވޭނީ ވެރިފައިކޮށްފައިވާ ބެލެނިވެރިއެއް ނުވަތަ ބަލަދުވެރިއެއްގެ ހުއްދައާ އެކުގައެވެ. މީގެ އިތުރުން، ބެލެނިވެރިންނަށް ދަރިންގެ އެކައުންޓް ބަލައި މެނޭޖު ކުރެވޭނެއެވެ. މިގޮތުން އޮންލައިން ރައްޓެހިންގެ ލިސްޓު ބެލުމާއި ކުޅޭ ވަގުތު ކަނޑައެޅުން ހިމެނެއެވެ.

އޮފްކޮމްގެ ދިރާސާއަކުން ދައްކާ ގޮތުގައި ރޮބްލޮކްސް އަކީ އިނގިރޭސިވިލާތުގައި 8 އަހަރާއި 12 އަހަރާ ދެމެދުގެ ކުދިންގެ މެދުގައި އެންމެ މަޤުބޫލު ގޭމިންގ ޕްލެޓްފޯމެވެ. ނަމަވެސް ކުޑަކުދިންނަށް އިތުރަށް ރައްކާތެރި މާހައުލެއް ހޯދައިދިނުމަށް ގޮވާލެވިފައިވެއެވެ.

ކުންފުނިން ބުނާ ގޮތުގައި މި ބަދަލުތައް ތަންފީޒުކުރަން ފަށާނީ ހޯމަ ދުވަހުން ފެށިގެންނެވެ. އަދި 2025 ވަނަ އަހަރުގެ މާރިޗު މަހުގެ ނިޔަލަށް މި ބަދަލުތައް ފުރިހަމައަށް ތަންފީޒުކުރެވޭނެއެވެ.

ރޮބްލޮކްސްގެ ޗީފް ސޭފްޓީ އޮފިސަރ މެޓް ކޯފްމަން ވިދާޅުވި ގޮތުގައި މި ގޭމު ކުޅެނީ ދުވާލަކު 88 މިލިއަން މީހުންނެވެ. އަދި ކުންފުނީގެ މުވައްޒަފުންގެ 10 އިންސައްތައަށްވުރެ ގިނަ މުވައްޒަފުން މަސައްކަތް ކުރަނީ ޕްލެޓްފޯމްގެ ސަލާމަތީ ކަންކަމުގައެވެ.