ކައްކާ ގޭސް ރައްކާކުރުމުގެ ގާބިލްކަން އިތުރުކުރުމަށް 70 މިލިއަން ރުފިޔާގެ މަޝްރޫޢެއް

ކައްކާ ގޭސް ރައްކާކުރުމުގެ ގާބިލްކަން އިތުރުކުރުމަށް ގާތްގަނޑަކަށް 70 މިލިއަން ރުފިޔާގެ މަޝްރޫޢެއް ފަށާފައިވާ ކަމަށް މޯލްޑިވް ގޭސް ޕްރައިވެޓް ލިމިޓެޑްގެ މެނޭޖިން ޑިރެކްޓަރ ޢަބްދުﷲ މުޙައްމަދު ވިދާޅުވެއްޖެއެވެ.

ޕީއެސްއެމް ނިއުސްގެ ހަފްތާ 52 ޕްރޮގްރާމުގައި ވާހަކަދައްކަވަމުން ޢަބްދުﷲ މުޙައްމަދު ވިދާޅުވީ، ވޭތުވެދިޔަ 25 އަހަރު ކުންފުންޏަށް އޮތް އެންމެ ބޮޑު ގޮންޖެހުމަކީ ގޭހުގެ ސްޓޯރޭޖްގެ ދަތިކަން ކަމަށެވެ. މިހާރު މުޅި ރާއްޖެއަށް ބޭނުންވާ ކައްކާ ގޭސް ރައްކާކުރެވެނީ އެންމެ އެއް މަސް ދުވަހަށް ކަމަށާއި، ނަމަވެސް މި އައު މަޝްރޫޢާއެކު 4 ނުވަތަ 5 މަސް ދުވަހަށް ގޭސް ރައްކާކުރުމުގެ ގާބިލްކަން އިތުރުވެގެންދާނެ ކަމަށް އޭނާ ވިދާޅުވިއެވެ.

މި މަޝްރޫޢު އަންނަ އަހަރުތެރޭ ނިމޭނެ ކަމަށާއި، މިއާއެކު ކައްކާ ގޭސް ރައްކާކުރުމުގެ ގާބިލްކަން 3 ގުނައަށް އިތުރުވެގެންދާނެ ކަމަށްވެސް ޢަބްދުﷲ މުޙައްމަދު ވިދާޅުވިއެވެ.

މީގެއިތުރުން، މޯލްޑިވް ގޭސްއަކީ ކުންފުންޏަށް ލިބޭ އާމްދަނީން ހިންގަމުން އަންނަ ފައިދާވާ ކުންފުންޏެއްކަމަށް ފާހަގަކުރައްވަމުން، ވޭތުވެދިޔަ އެއް އަހަރު 33 އިންސައްތައިގެ ކުރިއެރުމެއް ލިބިފައިވާ ކަމަށް އޭނާ ވިދާޅުވިއެވެ. މި ކުރިއެރުން ލިބެނީ ސަރުކާރުގެ ސިޔާސަތުގެ ސަބަބުން ކަމަށްވެސް އޭނާ ފާހަގަކުރެއްވިއެވެ.

ޢަބްދުﷲ މުޙައްމަދު އިތުރަށް ވިދާޅުވީ، ކުންފުނި ހިންގަމުންދަނީ ޚާއްސަ އަމާޒުތަކެއް ކަނޑައަޅައި، އެ އަމާޒުތައް ހާސިލްކުރުމަށް މުވައްޒަފުން ގުޅިގެން މަސައްކަތްކުރުމުގެ ރޫހުގައި ކަމަށެވެ. މިގޮތުން މިއަހަރުތެރޭގައި ހޯދާފައިވާ ކާމިޔާބީތަކާއެކު 3 ފަހަރެއްގެ މަތިން މުވައްޒަފުންނަށް ބޯނަސް ދީފައިވާ ކަމަށްވެސް  ހާމަކުރެއްވިއެވެ.