މުޅި އަހަރު ދުވަހު ރޯދަ ހިފުމުގެ ހެޔޮކަން ލިބިގަތުމަށް ޝައްވާލު މަހުގެ 6 ރޯދަ ހިފަމާ!

 ބަރަކާތްތެރި ރަމަޟާންމަސް މިވަނީ ފާއިތުވެ ގޮސްފައެވެ. ރަމަޟާމަސް ފެށުމުގެ ކުރިން، ހަފްތާތަކަކަށް ދެމިގެންދާ ރޯދަހިފުމުގެ ޚިޔާލަކީ ބިރުވެރި ކަމެއްގެ ގޮތުގައި އިހުސާސް ކުރެވުނު ކަމުގައި ވިޔަސް، އަހަރެމެންގެ ތެރެއިން ގިނަ ބަޔަކަށް އެ ވަގުތު ފާއިތުވެގެން ދިޔައީ އެސްފިޔަޖަހާލާހާ ކުޑަ ހިނދުކޮޅެއްގެ ތެރޭގައެވެ.

މަސް ނިމުމުން އަހަރެމެންނަށް މިވަނީ ފޮނި އަދި ހިތްދަތި އިހުސާސްތަކެއް ކުރެވިފައެވެ. "ދެން އަހަރެން ކުރާނީ ކީއް؟" އަހަރެމެން އަމިއްލަ ނަފްސާ ސުވާލުކޮށްފާނެއެވެ. "ރަމަޟާންމަހުގެ އެ ރޫހު އަހަރެން ދަމަހައްޓާނީ ކިހިނެއް؟" ރޯދަމަހަށްފަހު ވަގުތުން އަންނަ މަސް ކަމަށްވާ ޝައްވާލު މަހު 6 ރޯދަ ހިފުމަށް ބާރުއަޅުއްވައި، ކީރިތި ރަސޫލާ ﷺ ވަނީ އަހަރެމެންނަށް ބޭނުންވާ ހައްލު ދައްކަވައިދެއްވާފައެވެ. ޝައްވާލު މަހުގެ 6 ރޯދަ ހިފުމަކީ ވާޖިބު ކަމެއް ނޫނެވެ. ނަމަވެސް އެއީ އޭގެ ސަވާބާއި ދަރުމައަށް އެދިގެން ކުރެވޭ ސުންނަތް އަޅުކަމެކެވެ.

މީގެ އިތުރުން، މި ރޯދަތައް ވިދިވިދިގެން ހިފުމަކީ ލާޒިމު ކަމެއް ނޫނެވެ. އެ މަހުގެ ތެރެއިން ކޮންމެ ހަ ދުވަހަކު ރޯދަ ހިފުމުން ވެސް ފުދޭނެއެވެ.

ޝައްވާލު މަހު ރޯދަ ހިފުމުގެ ފައިދާ

 1. ޝައްވާލު މަހުގެ ހަރޯދަ ހިފުމުން މުޅި އަހަރު ދުވަހު ރޯދަ ހިފުމުގެ ސަވާބު ލިބުން ކީރިތި ރަސޫލާ ﷺ ހަދީޘް ކުރެއްވިއެވެ. "ރަމަޟާން މަހު ރޯދަ ހިފުމަށްފަހު، ޝައްވާލު މަހުން ހަ ދުވަހު ރޯދަ ހިފި މީހާ، މުޅި އަހަރު ދުވަހު ރޯދަ ހިފި ފަދައެވެ." [ޞަޙީޙް މުސްލިމް] ޢިލްމުވެރިން މިކަން ތަފްސީރު ކޮށްދެއްވަނީ، އަހަރެމެން ކުރާ ކޮންމެ ހެޔޮ އަމަލަކަށް 10 ގުނަ ދަރުމަ ދެއްވާނެ ކަމަށް ﷲ ވަޢުދުވެވޮޑިގެންފައިވާތީއެވެ. އެހެންކަމުން، ރަމަޟާން މަހުގެ އެއް މަސް ދުވަހުގެ ރޯދައަކީ 10 މަސް ދުވަހުގެ ރޯދައާ އެއްވަރުގެ ކަމެކެވެ. އަދި ޝައްވާލު މަހުގެ 6 ރޯދައަކީ 60 ދުވަހުގެ (އެބަހީ 2 މަސް ދުވަހުގެ) ރޯދައާ އެއްވަރުގެ ކަމެކެވެ. މިއީ ޖުމްލަ މުޅި އަހަރު ދުވަހުގެ ރޯދައެވެ. ކޮންމެ އަހަރަކު ރަމަޟާން މަހުގެ ރޯދައަށްފަހު ޝައްވާލު މަހުގެ 6 ރޯދަ ހިފާ މީހުންނަށް މީގެ މާނައަކީ ކޮބައިކަން ތަޞައްވުރު ކޮށްލައްވާށެވެ. އެބައިމީހުން ﷲ އާ ބައްދަލުކުރާނީ މުޅި އުމުރު ދުވަހު ރޯދަ ހިފި ބައެއްގެ ގޮތުގައެވެ!

2. ރަމަޟާން މަހުގެ ރޫހު އާލާކުރުން ތިޔަބޭފުޅުންނާއެކު ރޯދަ ހިފުމަށް ރަހުމަތްތެރިންނާއި އާއިލާއަށް ހިތްވަރުދީގެން، ޝައްވާލު މަހުގެ ރޯދައިގެ ތެރެއަށް ރަމަޟާން މަހުގެ ރޫހު ގެންނަވާށެވެ. އެގޮތުން، އެކަކު އަނެކަކަށް ހިތްވަރު ދިނުމާއެކު، އެކުގައި ރޯދަ ވީއްލުމުގެ އުފާވެރިކަން ވެސް ތަޖުރިބާ ކުރެވޭނެއެވެ.

 3. ރަމަޟާން މަހުގެ އުނިކަންތައްތައް ފޫބެއްދުމަށް އެހީތެރިވެދިނުން ކީރިތި ރަސޫލާ ﷺ ހަދީޘް ކުރެއްވިއެވެ. "ޤިޔާމަތް ދުވަހު މީހާގެ އަމަލުތަކުގެ ތެރެއިން އެންމެ ފުރަތަމަ ހިސާބު ބެއްލެވޭނީ ނަމާދާ މެދުގައެވެ. އެ ނަމާދު ފުރިހަމަވެއްޖެ ނަމަ، އޭނާގެ ސުންނަތް ނަމާދުތައް ވެސް (އިތުރުވުމެއްގެ ގޮތުގައި) ލިޔެވޭނެއެވެ. އެ ނަމާދު ފުރިހަމަ ނުވާނަމަ، ﷲ މަލާއިކަތުންނަށް ވަޙީ ކުރައްވާނެއެވެ: 'ތިމަން ރަސްކަލާނގެ އަޅާގެ ސުންނަތް ނަމާދެއް ހުރިތޯ ބަލާށެވެ. އަދި އޭނާގެ ފަރުޟު ނަމާދުތަކުން އުނިވި ބައި އެއިން ފޫބައްދާށެވެ.' ދެން އެހެން ހުރިހާ އަމަލުތަކެއްގެ ހިސާބު ބެއްލެވޭނީ ވެސް އެފަދައިންނެވެ." [ސުނަން އިބްނު މާޖާ] އަހަރެމެންގެ ސުންނަތް ރޯދަތަކަކީ ޤިޔާމަތް ދުވަހު އަހަރެމެންގެ ހެޔޮ އަމަލުތައް އިތުރުކުރުމަށާއި، ރަމަޟާން މަހު ރޯދަ ހިފިއިރު އުނިވި ކަންތައްތައް ފޫބެއްދުމަށް ބޭނުންކުރެވޭނެ އަމަލުތަކެކެވެ.

4. ރަމަޟާން މަހަށްފަހު ހެޔޮ އަމަލުތަކުގެ ބާރު ދަމަހައްޓައި، ދާއިމީ އާދަތަކެއް ބިނާކުރުން ހެޔޮ އަމަލުތަކުގައި މަސް ދުވަސް ހޭދަކުރުމަށްފަހު، ރަމަޟާން މަސް ނިމުމުން އެ ދިރިއުޅުން ކުރިއަށް ގެންދިއުމަކީ ނުވާނެ ކަމެއް ކަމަށް އަހަރެމެންގެ ތެރެއިން ގިނަ ބަޔަކަށް ހީވެއެވެ. ނަމަވެސް މިއީ ދުވަހަކުވެސް އޭގެ މަޤްޞަދެއް ނޫނެވެ. ރަމަޟާން މަހަކީ އަމިއްލަ ނަފްސު އަލުން ތަރުތީބުކޮށްލުމަށް ލިބޭ ފުރުސަތެކެވެ. ކީރިތި ރަސޫލާ ﷺ ވަޢުދުވެވަޑައިގެންފައިވާ ފަދައިން، މުޅި މަސް ދުވަހު ފުރިހަމަ އީމާންތެރިކަމާއެކު އަޅުކަން ފުރިހަމަކޮށްފި ނަމަ، އެ މަސް ނިމިގެންދާނީ އަހަރެމެންގެ ފާފަތައް ފުހެވިގެންވާ ހާލުގައެވެ.ފާފަތަކުން ސާފުވެ، އާ ރޫޙަކާއެކު، ރަމަޟާން މަހުގެ ބައެއް އަމަލުތައް އާދައަކަށް ބަދަލުކޮށްލުމަށް މިއީ އެންމެ ރަނގަޅު ވަގުތެވެ. މިސާލަކަށް، ޝައްވާލު މަހުގެ ހަ ރޯދަ މުޅި މަހަށް ބަހާލައިގެން ހިފިދާނެއެވެ. ކޮންމެ ހޯމަ އަދި ބުރާސްފަތި ދުވަހަކު، ނުވަތަ ކޮންމެ ހިޖުރީ މަހެއްގެ މެދުތެރޭގެ ތިން ދުވަހު (އައްޔާމުލް ބީޟްގައި) ރޯދަ ހިފިދާނެއެވެ. މިއީ ރަސޫލާ ﷺ ގެ ސުންނަތުން ސާބިތުވާ ކަންކަމެވެ. މީގެ ސަބަބުން، ދާއިމީ ގޮތެއްގައި އެ ދުވަސްތަކުގައި ރޯދަހިފުމުގެ އާދަ އަށަގަންނުވަން އެހީތެރިވެދޭނެއެވެ. ހަނދާންކުރާށެވެ؛ މާތްﷲ އެންމެ ލޯބިވެވޮޑިގެންވަނީ، މަދު މިންވަރަކަށް ނަމަވެސް، މެދުނުކެނޑި ކުރެވޭ އަމަލުތަކަށްކަން ރަސޫލާ ﷺ ވަނީ ބަޔާންކޮށްދެއްވާފައެވެ. ކާމިޔާބީއަކީ ދެމެހެއްޓެނިވި ގޮތެއްގައި ކުރިއަށްދިއުމެވެ.

 5. ޝުކުރުވެރިވުމުގެ ސިފަ އަށަގަތުން: ރޯދަހިފުމުގެ ރޫޙާނީ އެއް ފައިދާއަކީ މުއުމިނާގެ ހިތުގައި ޝުކުރުވެރިވުމުގެ ސިފަ އާލާކޮށްދިނުމެވެ. އަޅުގަނޑުމެން ގިނައިން ރޯދަހިފިވަރަކަށް، މާތްﷲ އަޅުގަނޑުމެންނަށް ދެއްވާފައިވާ ނިޢުމަތްތަކަށް އޮންނަ ހޭލުންތެރިކަން އިތުރުވެއެވެ. ކެއުމާއި ބުއިމުން ދުރުހެލިވުމުން، އެއީވެސް އަޅުގަނޑުމެންނަށް އާދައިގެ ކަމެއްގެ ގޮތުގައި ފެނުނު ކަމުގައިވިޔަސް، މާތްﷲގެ ބޮޑުވެގެންވާ ނިޢުމަތްތަކެއްކަން ހަނދާންކޮށްދެއެވެ.