މިއުޒިއަމަކުން ވަގަށް ނެގި 2،500 އަހަރުވީ ރަނުގެ ހެލްމެޓެއް ފެނިއްޖެ

ނެދަލޭންޑްސްގެ މިއުޒިއަމަކުން މިދިޔަ އަހަރު ވަގަށް ނެގި ރޫމޭނިއާގެ އަގުބޮޑު އާސާރީ ރަނުގެ ހެލްމެޓެއް ފެނިފައިވާކަމަށް އެ ގައުމުގެ ކަމާބެހޭ ފަރާތްތަކުން ބުރާސްފަތި ދުވަހު އިއުލާނުކޮށްފިއެވެ. 2،500 އަހަރުވީ މި 'ކޮޓޮފެނެސްޓީ' ހެލްމެޓަކީ ރޫމޭނިއާގެ 'ޑޭސިއާ' ތަހުޒީބުގެ އެންމެ މުހިންމު އެއް ގައުމީ ހަޒާނާއެވެ.

ނެދަލޭންޑްސްގެ އިރުމަތީ ސިޓީއެއް ކަމަށްވާ އަސެންގައި ބޭއްވި ނޫސްވެރިންގެ ބައްދަލުވުމެއްގައި މި ހެލްމެޓް ދައްކާލާފައިވަނީ ހަތިޔާރު އެޅި ފުލުހުންގެ ވަރުގަދަ ސަލާމަތީ ރައްކާތެރިކަމާ އެކުގައެވެ. ޕްރޮސެކިއުޝަން ސާވިސްގެ ކޮރިއަން ފަހްނާ ވިދާޅުވީ، މި އާސާރީ އެތި ފެނުމުން ވަރަށް ބޮޑު އުފަލެއް ލިބިފައިވާ ކަމަށާއި، މިއީ ހާއްސަކޮށް ރޫމޭނިއާ އަށާއި ޑްރެންޓްސް މިއުޒިއަމްގެ މުވައްޒަފުންނަށް ލިބުނު ބޮޑު ހިތްހަމަޖެހުމެއް ކަމަށެވެ.

މި ހެލްމެޓް ވަގަށް ނަގާފައިވަނީ ޖެނުއަރީ 2025 ގައި، ހަ މަސް ދުވަހުގެ މުއްދަތަށް ކުރިއަށްދިޔަ މައުރަޒެއްގެ އެންމެ ފަހު ހަފްތާ ބަންދުގައި ޑްރެންޓްސް މިއުޒިއަމް ފަޅާލައިގެންނެވެ. ހެލްމެޓާއެކު ރަނުގެ ތިން އަތްބޭންޑް (wristbands) ވެސް ވަގަށް ނަގާފައިވެއެވެ. މި ތަކެއްޗަކީ ދުނިޔެއަށް މަޝްހޫރު އަދި ފާހަގަކުރަން ފަސޭހަ އެއްޗެހިތަކަކަށް ވުމުން، އެ ތަކެތި ނުވިއްކޭނެތީ ވަގުން އެ ވިރުވާލަފާނެ ކަމުގެ ބިރު އޭރު އޮތެވެ.

ފުލުހުން ބުނި ގޮތުގައި، ހެލްމެޓްގެ އިތުރުން ގެއްލުނު ތިން އަތްބޭންޑްގެ ތެރެއިން ދެ އަތްބޭންޑް ވެސް މިހާރު ވަނީ ފެނިފައެވެ. މިއީ މި ވައްކަމުގެ މައްސަލައިގައި ހައްޔަރުކުރި ތިން މީހުންނާއެކު ޕްރޮސެކިއުޓަރުން ހެދި އެއްބަސްވުމެއްގެ ދަށުން ހޯދި ތަކެއްޗެވެ. މި މީހުންގެ ޝަރީއަތް މި އޭޕްރީލް މަހުގެ ފަހުކޮޅު ފެށުމަށް ވަނީ ހަމަޖެހިފައެވެ. އަދި ގެއްލިފައިވާ ތިންވަނަ އަތްބޭންޑް ހޯދުމުގެ މަސައްކަތް އަދިވެސް ދަނީ ކުރަމުންނެވެ.

މި ވައްކަން ހިންގުމުގައި ވަގުން ވަނީ އަމިއްލައަށް ތައްޔާރުކޮށްފައިވާ ގޮވާ އެއްޗަކާއި ބޮޑު މަރުތޭލައެއް ބޭނުންކޮށްފައެވެ. ސެކިއުރިޓީ ކެމެރާގެ ފުޓޭޖްތަކުން ފެންނަ ގޮތުގައި، ތިން މީހަކުވެގެން މިއުޒިއަމްގެ ދޮރެއް ހުޅުވަން މަސައްކަތް ކުރަނިކޮށް ބާރުގަދަ ގޮވުމެއް ގޮވާ މަންޒަރު ފެނެއެވެ. މި ހާދިސާގެ ސަބަބުން ހެލްމެޓަށް ކޮންމެވެސް ވަރެއްގެ ގެއްލުންތަކެއް ލިބިފައިވާ ކަމަށް ރިޕޯޓްތައް ބުނެއެވެ.

މި ވައްކަމުގެ ސަބަބުން ނެދަލޭންޑްސް އާއި ރޫމޭނިއާގެ ގުޅުމަށް ވެސް ނުތަނަވަސްކަން އުފެދުނެވެ. ރޫމޭނިއާގެ ޖަސްޓިސް މިނިސްޓަރު ރާޑޫ މަރިނެސްކޫ މިދިޔަ އަހަރު ވިދާޅުވެފައިވަނީ، މިއީ އެ ގައުމާ ދެކޮޅަށް ހިންގި ޖަރީމާއެއް ކަމަށާއި، މި އާސާރީ ތަކެތި ހޯދުމަކީ ގައުމުގެ އެންމެ އިސް އިސްކަންދޭ ކަންތައް ކަމަށެވެ.