ޣައްޒާގެ ހިސާރު މުގުރާލުމަށް އާންމުންގެ އެންމެ ބޮޑު ފްލޮޓިލާ އޭޕްރީލް 12 ގައި ބާސެލޯނާއިން ފުރަނީ

އިސްރާއީލުން ޣައްޒާއަށް ކުރިމަތިކޮށްފައިވާ ލާއިންސާނީ ހިސާރު މުގުރާލުމަށްޓަކައި، ތާރީޚުގައި މިހާތަނަށް ހިންގާ އާންމުންގެ އެންމެ ބޮޑު ކަނޑުގެ މިޝަން "ގްލޯބަލް ސުމޫދު ފްލޮޓިލާ" އަންނަ އޭޕްރީލް މަހުގެ 12 ވަނަ ދުވަހު ސްޕެއިންގެ ބާސެލޯނާއިން ފުރުމަށް ނިންމައިފިއެވެ.

މި މިޝަނުގައި ދުނިޔޭގެ އެކި ކަންކޮޅުތަކުން 80 އަށްވުރެ ގިނަ އުޅަނދާއި 1،000 އަށްވުރެ ގިނަ ބައިވެރިން ބައިވެރިވާނެއެވެ.

މި ހަރަކާތް އިންތިޒާމުކުރާ ފަރާތްތަކުން ހާމަކުރި ގޮތުގައި، މި މިޝަނަކީ ޣައްޒާގައި ގޯސްވަމުންދާ އިންސާނީ ހާލަތާ ގުޅިގެން ހިންގާ ސުލްހަވެރި ހަރަކާތެކެވެ. މި ހަރަކާތުގެ މައިގަނޑު މަގުސަދަކީ ޣައްޒާއަށް އިންސާނީ އެހީ ފޯރުކޮށްދިނުމަށް މަގުފަހިކުރުމާއި، އިންސާނީ ކަރާމާތް ދެމެހެއްޓުމުގެ އިތުރުން ބައިނަލްއަގުވާމީ ފެންވަރުގައި އިސްރާއީލު ޖަވާބުދާރީ ކުރުވުމެވެ. މި ކޯލިޝަނުގައި އެކްޓިވިސްޓުންނާއި، ގާނޫނީ ވަކީލުންނާއި، އާންމު ޖަމިއްޔާތައް ހިމެނޭއިރު، ފްލޮޓިލާ ދަތުރުކުރަމުންދާ ވަގުތު އެކި ގައުމުތަކުގައި މުޒާހަރާތަކާއި ވަކާލާތު ކުރުމުގެ ކެމްޕޭންތައް ކުރިއަށް ގެންދިއުމަށް ވަނީ ރޭވިފައެވެ.

ފްލޮޓިލާ ފުރުމުގެ ކުރިން، ބާސެލޯނާގެ ބަނދަރުގައި ތިން ދުވަހުގެ މީޑިއާ ޕްރޮގްރާމެއް ކުރިއަށް ގެންދާނެއެވެ. މީގެ އިތުރުން، އެ ސިޓީގައި ސަގާފީ ހަރަކާތްތަކާއި، ސިޔާސީ މަޝްވަރާތަކާއި، އާންމު އެއްވުންތައް ބޭއްވުމަށް ވަނީ ހަމަޖެހިފައެވެ. މި ހަރަކާތްތަކުގެ ބޭނުމަކީ ބައިނަލްއަގުވާމީ އެއްބައިވަންތަކަމުގެ ހަރަކާތްތައް ވަރުގަދަކޮށް، ޣައްޒާގެ ހިސާރު ނިމުމަކަށް ގެނައުމަށް ގޮވާލާ އަޑުތައް ގަދަކުރުމެވެ.

މި ފްލޮޓިލާގައި ޑޮކްޓަރުންނާއި، މުދައްރިސުންނާއި، އިންޖިނޭރުން ފަދަ އެކި ދާއިރާތަކުގެ ފަންނީ މީހުން ހިމެނޭ ޓީމުތައް ބައިވެރިވެއެވެ. މި ޓީމުތަކުގެ މަގުސަދަކީ ފަލަސްތީނުގެ ރައްޔިތުންނާ ގުޅިގެން އިންސާނީ އެހީތެރިކަން ފޯރުކޮށްދިނުމާއި، އަލުން އާރާސްތުކުރުމުގެ މަސައްކަތްތަކުގައި އެހީތެރިވުމެވެ. ފްލޮޓިލާ ދަތުރުކުރަމުންދާ ވަގުތު، ދުނިޔޭގެ އެކި ކަންކޮޅުތަކުގައި ތިބި އެހީތެރިވާ ގްރޫޕްތަކުން ސިޔާސީ އަދި ގާނޫނީ ފިއްތުންތައް ކުރިމަތިކުރުމަށް މަސައްކަތް ކުރާނެއެވެ.

މިދިޔަ އަހަރުގެ އޮކްޓޯބަރު މަހު، ގްލޯބަލް ސުމޫދު ފްލޮޓިލާގެ ދަށުން ބައިނަލްއަގުވާމީ ކަނޑުގެ ސަރަހައްދުގައި ދަތުރުކުރަމުންދިޔަ އެތައް އުޅަނދަކަށް އިސްރާއީލުގެ ކަނޑުގެ ސިފައިން ވަނީ ހަމަލާދީފައެވެ. އެ ހާދިސާގައި އުޅަނދުތައް ހިފަހައްޓައި، އޭގައި ތިބި ސަތޭކައަށްވުރެ ގިނަ ބައިނަލްއަގުވާމީ އެކްޓިވިސްޓުން ހައްޔަރުކޮށް، އަނިޔާކޮށްފައިވާކަން ފާހަގަކުރެވެއެވެ.